ރާއްޖޭގެ ސިޔާސީ މަސްރަޙް ދައްކާގޮތުން، ރިޔާސީ އިންތިހާބުގައި ވާދަކުރާނީ ޕީޕީއެމާއި އެމްޑީޕީ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރިޔާސީ އިންތިޚާބަށް ކެމްޕޭނު ކުރެއްވުމަށް ށ އަތޮޅަށް ރައީސް ޞާލިހާއި އެމަނިކުފާނުގެ ޓީމުން ކުރައްވަމުންގެންދަވާ ދަތުރުފުޅުގައި އެ އަތޮޅު ފޮނަދޫ ގައި ބޭއްވި ބައްދަލުވުމުގައި ވާހަކަދައްކަވަމުން ރައީސް ޞާލިޙް ވިދާޅުވީ ކުރިއަށްއޮތް ރިޔާސީ އިންތިޚާބުގައި ވޯޓުލާއިރު ވަރަށް ވިސްނަން ޖެހޭކަމަށެވެ. ވާދަވެރިންނަކީ ކޮބައިތޯ ވިސްނަންޖެހޭ ކަމަށްވެސް ރައީސް ވިދާޅުވިއެވެ.

"ބައެއް ޕާޓީތަކުން އެބަކުރިމަތިލައްވާ، ތިން ހަތަރު ބޭފުޅެއްގެ ނަން އެބަ އިވޭ، އެހެންނަމަވެސް ރާއްޖޭގެ ސިޔާސީ މަސްރަޙް މިހާރު އޮތްގޮތުން ހަމަ ވާދަކުރާނީ އެމްޑީޕީއާއި ޕީޕީއެމް، އެނޫން ބަޔަކަށް އެބުނާވަރުގެ ތާއީދެއް އޮތްތަނެއް އަޅުގަނޑަކަށް ނުފެނޭ، އެހެންވީމަ ތިބޭފުޅުން ނިންމަވަންވީ 2018ގެ ކުރިން އަޅުގަނޑުމެން އޮތް ޙާލަތައް އެނބުރި ދާނީތޯ، ނޫނިއްޔާ ފެށިފައި މިއޮތް ތަރައްޤީގެ މަޝްރޫޢުތަކާއި އެކު މިރަށްވެސް ހިމެނޭގޮތައް މިއަތޮޅުވެސް ހިމެނޭގޮތައް ކުރިއަށްދާނީތޯ" ރައީސް ޞާލިޙް ވިދާޅުވިއެވެ.

Advertisement

ރައީސް ޞާލިޙްގެ ވާހަކަފުޅުގައި އިތުރަށް ވިދާޅުވީ ރައްޔިތުން ދަތި ޙާލަތާއި އެކު ދަތިކަން ތަހައްމަލުކުރި 5 އަހަރެއް ތަޖުރިބާ ކޮށްފިކަމަށާއި އެޙާލަތު ހަނދާނުގައި ބެހެއްޓުމަށް ވެސް ވިދާޅުވިއެވެ. އެހެންކަމުން 9 ސެޕްޓެމްބަރ ގައި ނިންމަވާ ނިންމުމަކީ ޤައުމުގެ މުސްތަޤްބަލަށް ވަރަށް ބޮޑަށް  ނިންމެވުމަށް ކަމަށް ރައީސް ވިދާޅުވިއެވެ.

 ރައީސް ޞާލިޙް ވިދާޅުވީ ވިސްނުންބަހައްޓަންވީ ތަރައްޤީއާއެކީ މިއަންނަ ބޮޑު ބަދަލާއި އެކީގައި ކުރިއަށް ދިޔުމަށް ކަމަށާއި،  އެއްވެސް ބޭފުޅަކު މީގެން ބާކީވެގެނެއް ނުދާނެ ކަމަށް ރައީސް ވިދާޅުވިއެވެ.

އަދި ކުރިއަށް އޮތީ އުފާވެރި އަމާން ރާއްޖެއެއް ކަމަށާއި، އެމްޑީޕީކޯލިޝަނުން އުފާވެރި ރާއްޖެއެއް ހޯދުމަށް ކުރާ މަސައްކަތް 9 ސެޕްޓެމްބަރު ވާ ދުވަހު ބޮޑު އަޣްލަބިއްޔަތަކާއި އެކު اللهގެ ރަޙްމަތުން ކާމިޔާބު ވާނެ ކަމަށް ރައީސް ޞާލިޙް ވިދާޅުވިއެވެ.