އިދިކޮޅު އިއްތިހާދުގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުالله ޔާމީން އަބްދުލް ގައްޔޫމްއަށް ރިޔާސީ އިންތިހާބުގައި ވާދަކުރެވޭނެ ކަމާ މެދު ސުވާލު އުފެދިފައިވާތީވެ އެމަނިކުފާނުގެ ލަފާފުޅުގެ މަތިން ޕީއެންސީން ވަކި ކެންޑިޑޭޓެއް ނެރުމަށް އެތެރޭގައި މަޝްވަރާ ކުރަން ފަށައިފިއެވެ.

އިދިކޮޅު ކޯލިޝަނުން ނެރުނު ބަޔާނެއްގައި ބުނީ، އެ ކޯލިޝަނުގެ ތެރޭގައި، ޕީއެންސީ އިން ވަކި ކެންޑިޑޭޓަކާއި ރަނިންމޭޓަކު ނެރުމުގެ މަޝްވަރާތައް ކުރިއަށް ގެންދާ ކަމަށާ އެހެންނަމަވެސް، އެކަމާއި މެދު އަދި ވަކި ގޮތެއް ނިންމާފައި ނުވާ ކަމަށެވެ. 

މީގެ އިތުރުން އެ ކޯލިޝަނުން ބުނީ، ޕީއެންސީ އިން ކެންޑިޑޭޓަކު ނެރުމާއި މެދު ގޮތެއް ނިންމުމުގެ އިޚްތިޔާރު، ޕީޕީއެމް/ޕީއެންސީގެ ލީޑަރ ރައީސް ޔާމީން އަށް ދިނުމަށް ނިންމާފައިވާ ކަމަށާ، ޕީޕީއެމް/ޕީއެންސީ ގެ މުހިންމު ބޮޑެތި ނިންމުންތައް ނިންމުމުގައި ރައީސް ޔާމީންގެ ލަފާ އާއި މަޝްވަރާ ހޯދާނެ ކަމަށެވެ. 

Advertisement

ރައީސް ޔާމީން މިވަގުތު ހުންނެވީ، ވ. އާރަށް ކުއްޔަށް ދިނުމާއި ގުޅޭ މައްސަލާގައި އެމަނިކުފާނުގެ މައްޗަށް އުފުލާފައިވާ ދައުވާތައް ސާބިތުވާ ކަމަށް ކަނޑައަޅައި ކްރިމިނަލް ކޯޓުން ކޮށްފައިވާ 11 އަހަރުގެ ޖަލު ހުކުމް ތަންފީޒް ކުރައްވަން ޖަލުގައެވެ. އެހެންކަމުން އެމަނިކުފާނުގެ ކެންޑިޑެސީ އާއި މެދު ގިނަ ސުވާލު ތަކެއް ވަނީ އުފެދިފައެވެ.

ނަމަވެސް އީސީގެ ރައީސް ފުއާދު ތައުފީގު ވިދާޅުވެފައި ވަނީ ޔާމީންގެ ކެންޑިޑެސީ ފޯމު އީސީއަށް ބަލައިގަންނާނެ ކަމަށެވެ. ނަމަވެސް، ކެންޑިޑެސީ ބަލައިގަތުމާއިމެދު ގޮތެއް ނިންމާނީ އީސީގެ މެންބަރުން ކަމަށް ފުއާދު ވިދާޅުވި އެވެ.