މިއަހަރުގެ ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިހާބުގައި އިދިކޮޅު ޕީޕީއެމް/ޕީއެންސީގެ ފަރާތުން ވާދަކުރައްވާ ކުރީގެ ރައީސް އަބްދުالله ޔާމީން އަބްދުލްގައްޔޫމްގެ ކެންޑިޑެސީ ފޯމު އިލެކްޝަންސް ކޮމިޝަނަށް ހުށަހަޅައިފިއެވެ.

ރަސްމީ ހަރަކާތަކާއި އެކު ރައީސް ޔާމީން ގެ ކެންޑިޑެސީ ފޯމު ހަވާލު ކުރުމަށް ދަރުބާރުގެއަށް މިއަދު އިދިކޮޅު ލީޑަރުންނާއި ރައީސް ޔާމީންގެ ސަޕޯޓަރުން ވަޑައިގެންފައިވާއިރު، އެ ފޯމު، އިލެކްޝަންސް ކޮމިޝަންގެ ރައީސް ފުއާދު ތައުފީގު އަށް އަރުވާފައިވަނީ ޕީޕީއެމްގެ ސެކެރެޓަރީ ޖެނެރަލް މުހައްމަދު ތޮލާލް އެވެ. 

ފޯމު ހުށަހެޅުމަށް ދަރުބާރުގެއަށް ދިޔަ މަގުމަތީގައި މީޑިއާއަށް ދެއްވި ބަސްދީގަތުމެއްގައި ރައީސް ޔާމީން ގެ ނާއިބު ރައީސް ޑރ މުހައްމަދު ޖަމީލް އަހުމަދު ވަނީ، ރައީސް ޔާމީންގެ ކެންޑިޑެސީ ފޯމް އިލެކްޝަންސް އިން ބަލައި ގަނެ، އެމަނިކުފާނަށް ރިޔާސީ އިންތިހާބުގައި ވާދަކުރެވޭނެ ކަމުގެ ޔަގީންކަން އޮތް ކަމަށް ވިދާޅުވެފައެވެ. 

ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓަކީ ޔާމީން ކަމުގައި ނިންމާފައި ވަނީ މިދިޔަ އަހަރުގެ ޖުލައި 31 ވަނަ ދުވަހު ޕީޕީއެމް އަދި ޕީއެންސީ ސެނެޓްގެ އިއްތިފާގުންނެވެ. އަދި އެ ކޯލިޝަނުން ރައީސް ޔާމީނަށް ޓިކެޓު އަރުވާފައި ވަނީ މިދިޔަ އޮގަސްޓް މަހުގެ 19 ވަނަ ދުވަހުއެވެ.

ރައީސް ޔާމީންގެ ފޯމު އީސީއަށް ހުށަހަޅާފައިވާއިރު، އެމަނިކުފާނު މިވަގުތު ހުންނެވީ، ވ. އާރަށް ކުއްޔަށް ދިނުމާއި ގުޅޭ މައްސަލާގައި އެމަނިކުފާނުގެ މައްޗަށް އުފުލާފައިވާ ދައުވާތައް ސާބިތުވާ ކަމަށް ކަނޑައަޅައި ކްރިމިނަލް ކޯޓުން ކޮށްފައިވާ 11 އަހަރުގެ ޖަލު ހުކުމް ތަންފީޒް ކުރައްވަން ޖަލުގައެވެ.