އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމްގެ ކެންޑިޑެސީ ގަބޫލި ނުކުރި ލިޔުން ބަދަލު ކުރުމަށްފަހު އެ ލިޔުމާއި ހަވާލުވާން އައުމަށް އިލެކްޝަންސް ކޮމިޝަން (އީސީ) އިން ރޭގެ ވަގުތެއްގައި ގުޅާފައިވާ ކަމަށް ޕީޕީއެމުން ބުނެފި އެވެ. 

މިއަހަރުގެ ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިހާބުގައި އިދިކޮޅު ޕީޕީއެމް/ޕީއެންސީގެ ފަރާތުން ވާދަކުރައްވާ ކުރީގެ ރައީސް އަބްދުالله ޔާމީން އަބްދުލްގައްޔޫމްގެ ކެންޑިޑެސީ ފޯމު އިލެކްޝަންސް ކޮމިޝަނަށް އިއްޔެ ހުށަހަޅާފައިވާއިރު، އީސީން ވަނީ އެމަނިކުފާނުގެ ކެންޑިޑެސީ ބަލައި ނުގަންނަން ނިންމައި ޕީޕީއެމަށް ލިޔުން ފޮނުވާފައެވެ.  

"ޖިނާއީ ކުށެއް ސާބިތުވެ، 12 މަސް ދުވަހަށް ވުރެ ދިގު މުއްދަތެއް (11 އަހަރު) ހުކުމެއް އައިސްފައިވާ މީހަކަށް ވުމާއި އެކު، އެ ހުކުމް، ތަންފީޒުކޮށް ނިމިފައި ނުވާ ކަން، ލިބިފައިވާ ކުށުގެ ރިކޯޑަށް ބެލުމުން އެނގެން އޮންނާތީ، ގާނޫނު އަސާސީގެ 109 ވަނަ މާއްދާގެ (ޅ) ގައި ބަޔާންކުރާ ޝަރުތު އަބްދުالله ޔާމިން އަބްދުލްގައްޔޫމް ކިބައިގައި ފުރިހަމަ ނުވުން" ރައީސް ޔާމީން ގެ ކެންޑިޑެސީ ގަބޫލު ނުކުރި ސަބަބު ހާމަކޮށް އީސީން ބުނެފައިވެއެވެ.

Advertisement

އީސީގެ މި ނިންމުން ބަލައި ނުގަންނަ ކަމަށް ބުނެ، މައްސަލަ ސްޕްރީމް ކޯޓަށް ހުށަހެޅުމަށް ޕީޕީއެމުން ތައްޔާރު ވަމުން ދަނިކޮށް، އެ ކޮމިޝަންގެ ލިޔުން ބަދަލު ކުރުމަށްފަހު، ލިޔުމާއި ހަވާލުވާން އައުމަށް އެދިފައިވާ ކަމަށް ޕީޕީއެމްގެ ސެކެރެޓަރީ ޖެނެރަލް މުހައްމަދު ޠޮލާލް ރޭ ވަނީ ވިދާޅުވެފަ އެވެ. 

"އަޅުގަނޑު ދެންނެވިން ކެންޑިޑެސީ ގަބޫލު ނުކުރާކަން ބަޔާންކޮށް ފޮނުވި ލިޔުން އޮތީ ލިބިފައޭ. އިތުރު ލިޔުމެއް ފޮނުވަން ޖެހޭ ކަމަށް ގަބޫލެއް ނުކުރާ ކަމަށް. އަދި އިތުރު ލިޔުމަކާއި ހަވާލު ނުވާނެ ކަމަށްވެސް ދެންނެވިން." ޠޮލާލް ވިދާޅުވި އެވެ. 

މީގެ އިތުރުން ކެންޑިޑެސީ ބަލައި ނުގަތް މައްސަލާގައި ދެން އީސީއާއި މުޢާމަލާތް ކުރާނީ ސްޕްރީމް ކޯޓުގައި ކަމަށްވެސް އެ ކޮމިޝަނަށް އަންގާފައިވާނެ ކަމަށް ޠޮލާލް ވިދާޅުވި އެވެ.