ކުރިއަށް އޮތް ރިޔާސީ އިންތިޚާބު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް އެއްބުރުން ކާމިޔާބު ކުރެވޭނެ ފޯމިއުލާއަކީ ކުރީގެ ނައިބް ރައީސް، އަދި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ގެ ރަނިންމޭޓު، ޑރ.ޖަމީލް ޕީޕީއެމް/ޕީއެންސީގެ ފަރާތުން އިންތިޚާބުގައި ވާދަކުރެއްވުން ކަމުގައި ހޯމް މިނިސްޓަރ އަދި އަދާލަތު ޕާޓީގެ ރައީސް އިމްރާން އަބްދުالله ވިދާޅުވެއްޖެއެވެ.

އިމްރާން ކުރެއްވި ޓްވީޓެއްގައި ވިދާޅުވީ އިދިކޮޅު ޕީޕީއެމް-ޕީއެންސީގެ ރިޔާސީ ކެނޑިޑޭޓަކީ ޖަމީލް ކަމަށް ނިންމާނަމަ ހާދަ ރަނގަޅޭ ބައެއް ފަހަރު ހިތަށް އަރާ ކަމަށެވެ.

އެއީ ރައީސް ސޯލިހަށް އިންތިހާބު އެއްބުރުން ކާމިޔާބު ކުރުމަށް އެންމެ ފަސޭހަ ފޯމިއުލާއަކަށް ވާނީ އެ ފޯމިއުލާ ކަމަށްވާތީ ކަމަށް އިމްރާން ވިދާޅުވެފައިވެއެވެ.

Advertisement

ޢިމްރާން މިފަދައިން ވިދާޅުވެފައި ވާއިރު, ޕީޕީއެމްގެ ރިޔާސީ ކެންޑިޑޭޓް ރައީސް ޔާމީންގެ ކެންޑިޑެސީ ފޯމް އިއްޔެ އީސީއަށް ހުށަހެޅުމުން އެ ކޮމިޝަނުން ވަނީ އެމަނިކުފާނުގެ ކެންޑިޑެސީ ގަބޫލު ނުކުރަން ނިންމާފައެވެ. 

އެއާއެކު ޕީޕީއެމުން އެ މައްސަލަ މިހާރު ސްޕްރީމް ކޯޓަށް ހުށަހަޅާފައިވާއިރު، ސްޕްރީމް ކޯޓުން ވަނީ އެ މައްސަލަ ބަލައިވެސް ގަނެފައެވެ. 

ގާނޫނު ގައިވާގޮތުން، ކެންޑިޑެސީ ގަބޫލު ނުކުރަން އީސީން ނިންމާ ނިންމުން ސުޕްރީމް ކޯޓަށް ހުށަހެޅުމުން، އެ ހުށަހަޅާތާ ހަތް ދުވަހުގެ ތެރޭގައި އެ މައްސަލަ ނިންމަން ޖެހެއެވެ. 

ރައީސް ޔާމީނަށް ވާދަނުކުރެވޭ ހާލަތުގައި އިދިކޮޅު ޕީއެންސީން ވަކި ކެންޑިޑޭޓަކު ނެރެން އެ ޕާޓީން އަންނަނީ ރައީސް ޔާމީންގެ ލަފާފުޅާއި މަޝްވަރާ ހޯދަމުން ކަމަށް ދާދިފަހުން އިދިކޮޅުުން ވަނީ ބުނެފައެވެ. ނަމަވެސް އެކަމާއި މެދު ގޮތެއް ނިންމަވާނީ ރައީސް ޔާމީން ކަމަށްވެސް އިދިކޮޅުުން ބުނެއެވެ.