މި އަހަރުގެ ސްޓޫޑެންޓް ލޯން ލިބުނު ދަރިވަރުންނަށް ސްޕޮންސަރ ލެޓަރ މިހާރު ދޫކުރަމުންދާ ކަމުގައި މިނިސްޓަރ އޮފް ހަޔަރ އެޑިއުކޭޝަން، ޑރ އިބްރާހިމް ހަސަން ވިދާޅުވެއްޖެއެވެ. 

މިކަން ހާމަކޮށް އެ މިނިސްޓަރ މިއަދު ބުނެފައިވަނީ، ސްޓޫޑެންޓް ލޯނު ދިނުމުގެ މަސައްކަތް ހަލުވި ދުވެލީގައި މިހާރު ކުރިއަށް ދާކަމަށާއި، ލޯނު ލިބޭ ދަރުވަރުންނަށް ދޫކުރެވޭ ސްޕޮންސަރ ލެޓަރއިން އެ ދަރިވަރަކީ ހަޔަރ އެޑިއުކޭޝަން މިނިސްޓްރީގެ ސްޓޫޑެންޓް ލޯނު ލިބިފައިވާ ދަރިވަރެއްކަން އެނގިގެންދާނެކަމަށެވެ. 

އަދި މީގެ އިތުރުންވެސް ސްޕޮންސަރ ލެޓަރ ލިބޭ ދަރުވަރުންނަށް ލޯނުގެ ފައިސާ ވީހާވެސް އަވަހަށް ހަމަ ޖެހިގެންދާނެ ކަމުގައި ހަޔަރ އެޑއުކޭޝަން މިނިސްޓަރ ވިދާޅުވެފައިވެއެވެ. 

Advertisement

މީގެ އިތުރުން ހަޔަރ އެޑިއުކޭޝަން މިނިސްޓްރީން ބުނެފައިވަނީ ލޯނު ލިބުނުކަމުގެ ލިޔުމާއެކު ކޮންމެ ދަރިވަރަކަށްވެސް ލޯނުގެ ފައިސާ ހޯދުމުގައި އަމަލުކުރަންޖެހޭ ގޮތުގެ ތަފްސީލު ލިޔުމެއް މެއިލް ކުރެވިފައިވާނެ ކަމަށާއި، އެ ލިޔުމަށް ޚާއްސަ ސަމާލުކަމެއް ދިނުމަށްވެސް މިނިސްޓަރ އިބްރާހިމް ހަސަން ވަނީ އެދިލައްވައިފައެވެ.

މިއަހަރުގެ ލޯނު ލިބުނު ދަރިވަރުންނަށް އަހަރުގެ ފުރަތަމަ ސެމިސްޓަރުގެ ފައިސާވެސް ލޯނުގެ ތެރެއިން ހަމަ ޖެހިގެން ދާއިރު ލޯނު ފައިސާ ލިބުން އަވަސްކުރުމަށްޓަކައި ލޯނު ލިބުނު ކަން އަންގައި ފޮނުވާފައިވާ މެއިލްގައިވާގޮތަށް ލިޔެކިޔުންތައް ހަމަކުރުމަށްފަހު، ([email protected]) އަށް ފޮނުވުމަށް ހަޔަރ އެޑިއުކޭޝަން މިނިސްޓްރީން ވަނީ އެދިފައެވެ. 

ސްޓޫޑެންޓް ލޯނާއި ގުޅޭގޮތުން ދަރުވަރުންނަށް މައުލޫމާތު ހިއްސާކޮށް ސުވާލުތަކަސް ޖަވާބު ދިނުމުގެ ސެޝަންއެއް 2023 އޯގަސްޓް 3 ވަނަ ދުވަހުގެ ހެނދުނު މިނިސްޓްރީގެ ފޭސްބުކް ފޭޖްމެދުވެރިކޮށް ގެންދިއުމަށް ހަމަޖެހިފައިވާކަމުގައިވެސް އެ މިނިސްޓްރީން ބުނެއެވެ. 

ރާއްޖެއާއި ރާއްޖެއިން ބޭރުން މަތީ ތައުލީމާއި ތަމްރީނު ހޯދަން މިއަހަރު ހުޅުވާލި 720 ފުރުސަތަށް އެދި 1507 ފަރާތަކުންވަނީ ކުރިމަތިފައިފައެވެ. އެހެންވުމާއެކު ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހުގެ އަމިއްލަ ނިންމެވުމުގެ މަތިން މި އަހަރުގެ ލޯނަށް ޝަރުތު ހަމަވާ 1275 ފަރާތަކަށް ސްޓޫޑެންޓް ލޯނު ދިނުމަށްވަނީ ނިންމާފައެވެ.