މިއަހަރުގެ ރިޔާސީ އިންތިހާބުގައި ވާދަކުރުމަށްޓަކައި އެމަނިކުފާނުންގެ ކެނޑިޑެސީ އެންމެ ލަސްވެގެން ހުކުރު ދުވަހު އިލެކްޝަންސް ކޮމިޝަނަށް ހުށަހަޅާނެ ކަމުގައްޔާއި އަދި ރަނިންމޭޓެއްގެ ގޮތުގައި ބުރާސްފަތި ދުވަހުގެ ނިޔަލަށް ބޭފުޅަކު ކަނޑައަޅުއްވާނެ ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ. 

އެ މަނިކުފާނުން މިފަދައިން ވިދާޅުވެފައިވަނީ ކުރިއަށް އޮތް ރިޔާސީ އިންތިހާބުގެ ކެމްޕެއިންއަށް ހއ އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގައި މީޑިޔާތަކާއި މުޚާތަބުކުރައްވައި ދެއްވި އިންޓަވިއުއެއްގައެވެ. 

އެގޮތުން މި އަހަރުގެ ރިޔާސީ އިންތިހާބުގައި އެ ސަރަހައްދުން ބޮޑު އަގުލަބިއްޔަތެއް ލިބޭނެ ކަމުގެ ސާފު މަންޒަރު މި ދަތުރުފުޅުގައި ފެނިވަޑައިގެންފައިވާކަމުގައި ރައީސް ވަނީ ވިދާޅުވެފައެވެ. 

Advertisement

މީގެ އިތުރުން ރައީސް ވިދަޅުވީ މަޝްވަރާ ކުރަންޖެހޭ ފަރާތްތަކާއި މަޝްވަރާ ކުރެއްވުމަށްފަހު މާދަމާގެ ވަގުތެއްގައި ރަނިންގ މޭޓެއް އިއުާނުކުރައްވާނެ ކަމުގައްޔާއި އެމަނިކުފާނުގެ އަތްޕުޅުގައި މިހާރުވެސް ބައެއް ބޭބޭފުޅުންގެ ނަންތައް އެބަ ހުރި ކަމުގައެވެ. 

ހަމަ އެޔާއެކު އެ ފުރުސަތު މިހާރުގެ ނައިބުރައީސް ފައިސަލް ނަސީމްއަށް ވެސް ލިބުމުގެ ފުރުސަތު އެބަ އޮތްކަމުގައި މީޑިޔާއަކުން ކުރެއްވި ސުވާލަކަށް ޖަވާބުދެއްވައި ރައީސް ވިދާޅުވިއެވެ. 

ރައީސް މީގެ އިތުރުންވެސް ވިދާޅުވީ ޕީޕީއެމްއިން އިންތިހާބުގައި ވާދަކުރެއްވި ކަމުގައިވިޔަސް އެއީ އެމަނިކުފާނަށް އޮތް މާބޮޑު ގޮން ޖެހުމެއް ކަމުގައި ދެކިނުލައްވާކަމަށާއި، ލަސްނުކޮށް ޝަރުތު ހަމަވާ ކެނޑިޑޭޓަކާއެކު ކެމްޕެއިން ފެށުމަށް ރައީސްވަނީ ޕީޕީއެމްއަށް ގޮވާލައްވައިފައެވެ. 

އަދި އެޔާއެކު މި އިންތިހާބަށް ޝަރުތު ހަމަވާ ވީހާވެސް ގިނަ ފަރާތްތަކުން އިންތިހާބުގައި ވާދަ ކުރެއްވުމަކީ އެމަނިކުފާނުންވެސް އެދިލައްވާގޮތްކަމުގައި ރައީސް ސޯލިހު ވިދާޅުވިއެވެ. 

މިއަހަރުގެ ރިޔާސި އިންތިހާބުގައި ވާދަކުރައްވާނެކަން ގިނަ ޕާޓީތަކުން އިއުލާނުކޮށްފައިވީކަމުގައި ވިޔަސް އަދިވެސް އެމްޑީޕީއާއި ގުޅުމުގެ ފުރުސަތު ހުޅުވާލެވިފައިވާކަމަށާއި، އެންމެ ފަހުގެ ނިންމުން ބުރާސްފަތި / ހުކުރު ދުވަހު ނިންމުމާއި ހަމައަށް އެ ޕާޓީއާއި ކޯލިޝަން ހެދުމުގެ ފުރުސަތު ހުޅިވާލެވިފައިވާނެކަމުގައި ރައީސް ސޯލިހު ވިދާޅުވިއެވެ. 

މި އަހަރުގެ ރިޔާސީ އިންތިހާބަށް ކެނޑިޑެސީ ހުށަހެޅުމުގެ ވަގުތު މި މަހުގެ ހަތް ވަނަ ދުވަހަށް ހަމަވާއިރު، އިންތިހާބުގައި ވާދަކުރައްވާނެކަން އިއުލާނުކުރެއްވި ބޭފުޅުންގެ ތެރެއިން މިހާތަނަށް ކެނޑިޑެސީ ހުށަހަޅާފައިވަނީ މަދު ޕާޓީއަކުންނެވެ.