ކުރިއަށް އޮތް ރިޔާސީ އިންތިޚާބުގައި ޕްރޮގްރެސިވް ކޮންގްރެސް ކޯލިޝަނުގައި ހިމެނޭ ޕީއެންސީން ވާދަކުރަން އެ ޕާޓީގެ މަޝްވަރާ މަޖިލީހުގެ އަގުލަބިއްޔަތުން މިއަދު ފާސްކުރުމާއެކު، އެ ޕާޓީގެ ރިޔާސީ ޓިކެޓަށް ކުރިމަތިލުމުގެ ފުރުސަތު ހުޅުވާލައިފިއެވެ. 

ރިޔާސީ އިންތިހާބުގައި ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފަރާތުން ވާދަކުރުމަށް އެ ޕާޓީގެ 3/2023 މަޝްވަރާ މަޖިލީހުގައި ބައިވެރިވި 47 މެމްބަރުންގެ ތެރެއިން 44 މެމްބަރުންގެ އަގްލަބިއްޔަތުން މިއަދު ވަނީ ފާސްކޮށްފައެވެ. 

ވުމާއެކު އެ މި އަހަރުގެ ސެޕްޓެމްބަރު މަހުގެ 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ވާދަކުރުމަށް ޝައުގުވެރިވެލައްވާ ފަރާތްތަކަށް އެ ފުރުސަތު ހުޅުވައިލާ ޕީއެންސީން ނެރުނު ބަޔާނެއްގައި ބުނެފައިވަނީ،  ރިޔާސީ ޓިކެޓަށް ޝައުގުވެރިވެލައްވާ ފަރާތްތަކުން އެ ޕާޓީގެ ރައީސްއަށް އެޑްރެސްކޮށް ޝައުގުވެރިކަން ފާޅުކުރައްވައި ލިޔުމެއް، މިއަދުގެ 14:00 ގެ ކުރިން ފޮނުވުމަށް ބުނެފައިވެއެވެ. 

Advertisement

މީގެ އިތުރުން އެބަޔާނުގައި ބުނެފައިވަނީ ޝައުގުވެރިކަން ފާޅުކުރައްވާ ފަރާތްތަކުގެ ތެރެއިން އެ ޕާޓީގެ ރިޔާސީ ޓިކެޓް އަރުވާނެ ފަރާތެއް ކަނޑައަޅާނީ މިއަދު ހަވީރު 16:00 ގައި ބާއްވާ ޕާޓީގެ މަޝްވަރާ މަޖިލީހުންކަމުގައެވެ. 

އިދިކޮޅު ޕީޕީއެމް/ޕީއެންސީ ގެ ފަރާތުން މި އަހަރުގެ ރިޔާސީ އިންތިޚާބުގައި ވާދަކުރުމަށްޓަކައި ކުރީގެ ރައީސް ޔާމީން ގެ ކެނޑިޑެސީ އިލެކްޝަންސް ކޮމިޝަނަށް ހުށަހެޅި ނަމަވެސް އެ ކޮމިޝަނުން ވަނީ އެމަނިކުފާނުގެ ކެނޑިޑެސީ ބަލައިނުގަތުމަށް ނިންމައިފައެވެ. 

އެއާއެކު އެ މައްސަލަ ކޯލޝަނުގެ ފަރާތުން ސުޕްރީމް ކޯޓަށް ހުށަހަޅައި، މި މައްސަލައިގައި ޖަވާބުދާރީވުމަށް ސުޕްރީމްކޯޓުން ވަނީ އިލެކްޝަންސް ކޮމިޝަނަށްވެސް އަންގައިފައެވެ. 

މިކަމާއި ގުޅިގެން އިލެކްޝަންސް ކޮމިޝަންސްގެ ނައިބްރައީސް އިސްމާއިލް ހަބީބް ވަނީ އެ ކޮމިޝަނުގެ ފަރާތުން މިއަދު 15:00 ކުރިން ސުޕްރީމް ކޯޓަށް ޖަވާބުދާރީ ވާނެކަމުގައި ބުނެފައެވެ.