މި ސަރުކާރަށް ދެވަނަ ދައުރެއް ދޭން ބޭނުންވާ މީހަކު ކިނބިދޫގައި ނެތް ކަމުގައި އެސްޓީއޯގެ އެމްޑީކަން ކުރިން ކުރައްވައިފައިވާ ހުސައިން އަމްރު ވިދާޅުވެއްޖެއެވެ. 

އަމްރު މިފަދައިން ވިދާޅުވީ 2018 ގެ ރިޔާސީ އިންތިޚާބުގެ ކެމްޕެއިންގައި ކިނބިދޫއާއި ވޭމަންޑޫ ކޯޒްވޭއަކުން ގުޅާލާނެކަމަށް ވިދާޅުވެ ރައީސް ސޯލިހު ވެ ވަޑައިގެން ވައުދަށް މިހާތަަނަށް އަމަލީ އެއްވެސް މަސައްކަތެއް ފެށިފައިނުވުމުން އެކަމަށް ފާޑުވިދާޅުވެ ކުރެއްވި ޓުވީޓެއްގައެވެ. 

އެގޮތުން އަމްރު ވިދާޅުވީ 2018 ގައި ވެރިކަމަށް އަންނަން މި ސަރުކާރުން ވައުދުވީ ވަރަށް ތިލަ، އެއް ފަޅެއްގެ ތެރޭގަ އޮންނަ ކިނބިދޫ އާ ވޭމަންޑޫ ގުޅުވާލަން ކަމަށެވެ.

"5 އަހަރު ވެރިކަމުގަ ހުރެ ނިންމާލާއިރު އެކަން ހަނދާނެއްވެސް ނެތް. ކިނބިދޫގަ މި ސަރުކާރަށް އިތުރު ދައުރެއް ދޭން ބޭނުންވާ މީހަކު ނެތް." އަމްރު ވިދާޅުވި އެވެ. 

އެއް ފަޅެއްގެ ތެރޭގައި އޮންނަ ތ އަތޮޅު ކިނބިދޫއާއި ވޭމަންޑޫ ކޯޒްވޭއަކުން ގުޅާލުމަކީ ރައީސް ސޯލިހުގެ 2018 ވަނަ އަހަރުގެ ރިޔާސީ ވައުދެކެވެ. އަދި އޭގެ ފަހުން 2021 ވަނަ އަހަރު އެ ރަށަށް ވަޑައިގެން އެ ރަށު ކައުންސިލާއި ބައްދަލުކޮށް  ވޭމަންޑޫއާއި ކިނބިދޫ ކޯޒްވޭއަކުން ގުޅާލުމަށް ހަދަން ޖެހޭ ފީސިބިލިޓީ ސްޓަޑީތައް ވެސް އޭރު ކުރިއަށް ދާކަމުގައި ރައީސް ވަނީ ވިދާޅުވެފައެވެ. 

އެހެންނަމަވެސް މި މަސައްކަތަށް އަމަލީ އެއްވެސް ކުލަވަރެއް ގެނެސް ނުދެވި ދައުރު ނިމުމަކާއި ހަމައަށް އައިސްފައިވާއިރު މިއީ އެރަށުގެ ގިނަ އަދަދެއްގެ ރައްޔިތުންގެ ކަންބޮޑުވުމެއްކަން ފާހަގަކޮށްލެވެއެވެ.