ޕީޕީއެމުން ރައީސް ޢަބްދުالله ޔާމިން ޢަބްދުޤައްޔޫމް ސްޕްރީމް ކޯޓަށް ހުށައަޅުއްވައިފައިވާ އިލެކްޝަންސް ކޮމިޝަނުން އެމަނިކުފާނުގެ ކެނޑިޑެސީ ބަލައިނުގަތް މައްސަލައަށް ތަދައްޚުލް ވެއްޖެ ކަމަށް އެޕާޓީ އިން ހާމަކޮށްފިއެވެ.

ރައީސް ޔާމިންގެ އިންތިޚާބީ އެޖެންޓް އަދި ޕީޕީއެމްގެ ސެކެޓްރީ ޖެނެރަލް މުޙައްމަދު ޠަލާލް ކުރައްވާފައިވާ ޓްވީޓެއްގައި ވިދާޅުވެފައިވަނީ ދިވެހީންގެ ރިޔާސީ ކެނޑިޑޭޓް ރައީސް ޔާމިންގެ ފަރާތްޕުޅުން ސްޕްރީމް ކޯޓަށް ހުށައަޅުއްވާ އެކޯޓުން ބަލަމުންދާ މައްސަލައަށް، އެމަނުކުފާނަށް ތާއީދު ކުރައްވާ އެންމެހާ ރައްޔިތުންގެ ޙައްޤުތައް ހިމާޔަތްކޮށްދިނުމަށްޓަކައި ޕީޕީއެމުން ތަދައްޚުލުވެފައިވާ ކަމަށެވެ.

ޕީޕީއެމް ޕީއެންސީ ކޯލިޝަންގެ ކެނޑިޑޭޓެއްގެ ގޮތުގައި ރައީސް ޔާމީންގެ ނަންފުޅު އެކޯލިޝަނުން އިލެކްޝަންސް ކޮމިޝަނަށް ހުށައެޅީ އޮގަސްޓު 1ވަނަ ދުވަހުއެވެ. ހަމަ އެދުވަހު އީސީ އިން ވަނީ އެމަނިކުފާނުގެ ކެނޑިޑެސީ ބަލައި ނުގަންނާނެ ކަމަށް ނިންމައި އެކޯލިޝަނަށް އެކަން އަންގާފައެވެ.

އަދި ކެނޑިޑެސީ ބަލައި ނުގަތް ސަބަބެއް ކަމަށް އީސީ އިން ބުނެފައިވަނީ ރައީސް ޔާމިން ޖަލު ޙުކުމެއް ތަންފީޒު ކުރައްވަމުން ދިޔުމެވެ.

އީސީ އިން އެމަނިކުފާނުގެ ކެނޑިޑެސީ ބަލައި ނުގަތުމުން ރައީސް ޔާމިންގެ ފަރާތްޕުޅުން އެމަނިކުފާނުގެ ވަކީލުން ވަނީ އެމައްސަލަ ސްޕްރީމް ކޯޓަށް ވައްދައިފައެވެ. އަދި އެކޯޓުން ވަނީ އެކޮމިޝަނަށް އެމައްސަލައަށް ޖަވާބުދާރީ ވުމަށް އަންގައިފައެވެ. ސްޕްރީމް ކޯޓުން ވަނީ މިއަދު 3:00 ގެ ކުރިން އެމައްސަލައަށް ޖަވާބުދާރީ ވުމަށް އިލެކްޝަންސް ކޮމިޝަނަށް އަންގައިފައެވެ.

މިމައްސަލައިގެ އަޑު އެހުން މިހާރުވަނީ ހުކުރުދުވަހަށް ތާވަލުކޮށްފައެވެ.

މިމައްސަލައިގެ އަޑު އެހުމާއި މިމައްސަލައިގެ ގޮތް ނިންމުން ވެގެންދާނީ ރާއްޖޭގެ މިހާރުގެ ސިޔާސީ މަސްރަޙަށް ބޮޑު ބަދަލެއް އަންނާނެ ކަމަކަށެވެ. މިމައްސަލައިގައި ސްޕްރީމް ކޯޓުން ނިންމާ ގޮތަކުން ރާއްޖޭގެ މަސްރަޙް ވަރަށް ބޮޑަށް ހޫނުވެގެން ދިޔުމަކީ އެކަށީގެންވާ ކަމެކެވެ.