ޕީއެންސީގެ ރިޔާސީ ކެންޑިޑޭޓެއްގެ ގޮތުގައި ވާދަކުރުމުގެ ޝައުވެރިކަން ފާޅުކުރައްވާފައިވީ ނަމަވެސް، އުއްމީދަކީ އެޕާޓީގެ ބަދަލުގައި، ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް އިންތިޚާބުގައި ވާދަކުރެއްވުން ކަމަށް ނާލެ ސިޓީ ކައުންސިލްގެ މޭޔަރު ޑރ މުހައްމަދު ވިދާޅުވެއްޖެއެވެ.
ޕީއެންސީން ރިޔާސީ އިންތިހާބުގައި ވާދަކުރަން ނިންމައި، ކެންޑިޑޭޓެއްގެ ގޮތުގައި ވާދަކުރުމުގެ ޝައުވެރިކަން ހުރި ފަރާތްތަކަށް އެ ފުރުސަތު ހުޅުވާލުމުން، ޕީޕީއެމްގެ ނާއިބު ރައީސްގެ މަގާމުގައި ހުންނެވުމަށްފަހު ޕީޕީއެމުން ވަކިވެ މުއިއްޒު ވަނީ މިއަދު ޕީއެންސީ އާއި ގުޅިވަޑައިގެންފައެވެ. އެއަށްފަހު އޭނާ ވަނީ ރިޔާސީ ޓިކެޓަށް ޝައުގުވެރިކަން ފާޅުކުރައްވައި ޕީއެންސީއަށް ލިޔުން ވެސް ފޮނުވާފައެވެ.
އެކަމާއި ގުޅިގެން'ވޮއިސް' އަށް ދެއްވި ޚާއްސަ ބަސްދީގަތުމެއްގައި މުޢިއްޒު ވިދާޅުވީ، ރައީސް ޔާމީންއަށް ވާދަ ނުކުރެއްވޭ ހާލަތެއްގައި، ޕީއެންސީގެ ފަރާތުން އެހެން ކެންޑިޑޭޓެއް ނެރުމަށް އެމަނިކުފާނު ލަފާ އަރުއްވާފައިވާ ކަމަށާ، އެހެން ނަމަވެސް، އުއްމީދަކީ ސްޕްރީމްކޯޓަށް މިހާރު ހުށަހަޅާފައިވާ ކެންޑިޑެސީ މައްސަލަ ރައީސް ޔާމީނަށް ކާމިޔާބުވެ، އެމަނިކުފާނު އިންތިހާބުގައި ވާދަކުރެއްވުން ކަމަށެވެ.
"އެހެން ނަމަވެސް، އެކަމުގައި ކާމިޔާބު ނުލިބި، ވަގުތު ހަމަވެއްޖެ ނަމަ، ޕީޕީއެމް/ޕީއެންސީން އެއްވެސް އޮޕްޝަނެއް ކަނޑަނާޅާ އޮވެއްޖެނަމަ، ޕީޕީއެމް/ޕީއެންސީ މަގުމަތިވީ. މި ރާއްޖޭގެ މުސްތަގުބަލް ބަނަވާނެ. އެހެންވީމާ ރައީސް ޔާމީން ނިންމެވީ ބެކްއަޕް ކެންޑިޑޭޓެއްގެ ގޮތުގައި ޕީއެންސީގެ ފަރާތުން މީހަކު ކަނޑައަޅާފައި ބަހަށްޓަން. އެންމެ ފަހު ވަގުތު ރައީސް ޔާމީން އަށް ފުރުސަތު ނުދެއްވައިފި ނަމަ، ކުރިއަށްދާން."
މާލެ ސިޓީ ކައުންސިލްގެ މޭޔަރު ޑރ. މުހައްމަދު މުޢިއްޒު
ބެކްއަޕް ކެންޑިޑޭޓެއްގެ ގޮތުގައި ޕީއެންސީން ކެންޑިޑޭޓެއް ނެރުމަށް ރައީސް ޔާމީން ނިންމެވި ނިންމުމަކީ އެމަނިކުފާނު ދިވެހި ގައުމާއިމެދު ވިސްނާ ކަމުގެ ހެއްކެއް ކަމަށް މުޢިއްޒު ވިދާޅުވިއެވެ.
އަދި ޕީއެންސީން ރިޔާސީ އިންތިހާބުގައި ވާދަކުރުމަށް ކެންޑިޑޭޓެއް ބެހެއްޓުމަށް ރައީސް ޔާމީން ދެއްވި ފުރުސަތުގެ ބޭނުން ހިފަން ނިންމެވީ، އެމަނިކުފާނު ޖަލުން މިނިވަން ކުރުމަށް މަސައްކަތް ތަކެއް ކުރެވޭނެ ކަމަށް ގަބޫލު ކުރައްވާތީ ކަމަށްވެސް މުއިއްޒު ވިދާޅުވިއެވެ.
މުޢިއްޒު ވިދާޅުވީ، ރައީސް ޔާމިން އަށް ވާދަ ނުކުރެވި، އޭނާ ރިޔާސީ އިންތިހާބުގައި ވާދަކުރައްވަން ޖެހިއްޖެ ހާލަތެއްގައިވެސް، އިސްކުރައްވާނީ ރައީސް ޔާމީންގެ ގައުމީ އަދި ތަރައްގީގެ ފިކުރު ކަމަށެވެ. އަދި އޭނާ އެފަދައިން ކަން ކުރައްވާނެ ކަމުގެ ޔަގީންކަން ރައީސް ޔާމީންގެ ހިތުގައި އޮންނާނެ ކަމަށްވެސް މުއިއްޒު ވިދާޅުވި އެވެ. އެހެންކަމުން، ރިޔާސީ އިންތިހާބުގައި ވާދަކުރާ ހާލަތަކަށް ހިނގައްޖެ ނަމަ، ރައްޔިތުންގެ ތާއީދުވެސް މުއިއްޒު އަށް އޮންނާނެ ކަމަށް ގަބޫލު ކުރައްވާ ކަމަށް އޭނާ ވިދާޅުވި އެވެ.
އެހެންނަމަވެސް، އުއްމީދަކީ އޭނާ ރީޔާސީ އިންތިހާބުގައި ވާދަނުކޮށް ރައީސް ޔާމީން އަށް ވާދަކުރެއްވުން ކަމަށްވެސް މުއިއްޒު ވިދާޅުވި އެވެ.
އަޅުގަނޑު އުއްމީދު ކުރަނީ، ކުރިއަށް އެބައޮތް ދެތިން ދުވަސް، އޮގަސްޓު 7 އާއި ހަމައަށް، އަޅުގަނޑުމެން މި ކުރާ މަސައްކަތަކީ ވަގުތީ ކަމަކަށް ވާން. މިއަދު މި ބާއްވާ އިންތިޚާބަށްފަހު ހޮވޭ ފަރާތެއްގެ އެޕްލިކޭޝަންއަކީ އަޅުގަނޑުމެން ފައިލް ކުރަން ނުޖެހޭ އެއްޗަކަށްވެ، ރައީސް ޔާމީން ގެ އެޕްލިކޭޝަން އާ އެކީގައި ކުރިއަށް ދެވޭނެ ކަމަށް އަޅުގަނޑު އުއްމީދު ކުރަން.
މާލެ ސިޓީ ކައުންސިލްގެ މޭޔަރު ޑރ. މުހައްމަދު މުޢިއްޒު
މުއިއްޒު އިތުރަށް ވިދާޅުވީ، އޭނާ ރިޔާސީ ކެންޑިޑޭޓެއް ގޮތުގައި ކަނޑައެޅިއްޖެ ނަމަ، ރަނިންމޭޓަކަށް ވާނެ ފަރާތެއް އަދި މިހާތަނަށް ޚިޔާރު ކޮށްފައި ނުވާ ކަމަށާ، އެހެން ނަމަވެސް ރައީސް ޔާމީން އިރުޝާދު ދެއްވާފައިވަނީ، ރިޔާސީ ކެންޑިޑޭޓެއްގެ ގޮތުގައި ކަނޑައެޅޭ ފަރާތެއް އަމިއްްލައަށް ރަނިންމޭޓަކު ކަނޑައަޅަން ކަމަށެވެ.
ޕީއެންސީގެ ފަރާތުން ރިޔާސީ އިންތިހާބުގައި ވާދަކުރުމުގެ ޝައުވެރިކަން ފާޅުކުރައްވާފައި ވަނީ މުއިއްޒުގެ އިތުރުން މަޑުއްވަރީ ދާއިރާގެ މެންބަރު އާދަމް ޝަރީފް އުމަރެވެ. އެތަނުން އެ ޕާޓީގެ ރިޔާސީ ޓިކެޓް އަރުވާނެ ފަރާތެއް ކަނޑައަޅާނީ މިއަދު ހަވީރު 16:00 ގައި ބާއްވާ ޕާޓީގެ މަޝްވަރާ މަޖިލީހުންކަމަށް އެ ޕާޓީން ބުނެއެވެ.
Advertisement
This content is created and paid for by advertisers and does not involve Voice Journalists
