ފަނޑިޔާރު ކަމަށް ކުރިމަތިލާ ފަރާތްތަކުގެ ފެންވަރު ވަޒަންކުރުމަށްޓަކައި އެޕްލިކޭޝަން ޕްރޮސަސްގެ ތެރެއިން އިމްތިހާނެއް ފުރިހަމަ ކުރަން ޖެހޭ ގޮތަށް ޖުޑިޝަލް ސާވިސް ކޮމިޝަން (ޖޭއެސްސީ)އިން އުސޫލެއް އެކުލަވާލައި އާންމުކޮށްފިއެވެ. 

މި އުސޫލު އެކުލަވާލައި ޖޭއެސްއީ އިން ނެރުނު ބަޔާނެއްގައި ބުނެފައިވަނީ، ފަނޑިޔާރު ކަމަށް ކުރިމަތިލުމުގެ އެޕްލިކޭޝަން މަރުހަލާގެ ތެރެއިން އިމްތިހާނެއް ފުރިހަމަ ކުރަން ޖެހޭ ގޮތަށް ފަނޑިޔާރުން އައްޔަން ކުރުުމުގެ ސިޔާސަތަށް ބަދަލު ގެނެސްފައިވާ ކަމަށާއި މި ގޮތަށް ބަދަލުގެނެވުނީ ކޯޓުތަކަށް އައްޔަން ކުރާ ފަނޑިޔާރުންނަކީ ގާބީލު ބައެއްކަން ކަށަވަރު ކުރުމުގެ ގޮތުން ކަމަށްވެސް އެ ކޮމިޝަނުގެ ބަޔާނުގައި ވެއެވެ. 

ޖޭއެސްއީން އަލަށް އެކުލަވާލި މި އުސޫލަށް އަމަލުކުރަން ފެށުމަށް ހަމަޖެހިފައިވަނީ ކުރިއަށް އޮތް 2024 ވަނަ އަހަރުގެ ޖެނުއަރީ މަހުން ފެށިގެންނެވެ. 

Advertisement

ފަނޑިޔާރުކަމަށް ކުރިމަތިލާ ފަރާތްތަކަށް ދެވޭ އިމްތިހާނުން ފަނޑިޔާރު ކަމަށް ކުރިމަތިލާ މީހުންގެ ގާނޫނީ އިލްމު ހުރި ވަރާއި ފެންވަރު ވަޒަން ކުރެވޭނެ ކަމަށްވެސް ޖޭއެސްސީގެ ބަޔާނުގައި ބުނެފައިވެއެވެ. 

މީގެ އިތުރުން ފަނޑިޔާރު ކަމަށް ކުރިމަތިލާ މީހުންގެ ތެރެއިން އެންމެ ރަނގަޅަށް ގާނޫނުތަކާއި އިޖުރާއަތުތައް ތަތުބީގު ކުރާ މީހުންނާއި ސުލޫކީ ގޮތުން ވެސް އަމަލުތައް ބަހައްޓަން ޖެހޭ ގޮތް އެންމެ ރަނގަޅަށް އެނގޭ މީހުން ވަޒަން ކުރެވޭނެ ކަމަށް ވެސް ކޮމިޝަނުން ބުނެފައިވާއިރު ، ޖޭއެސްއީން އިތުރަށްބުނީ، އެ ބަދަލުގެ ސަބަބުން ކޯޓުތަކަށް ކުރިމަތިލާ މީހުންގެ ތެރެއިން އެންމެ ފެންވަރު ރަނގަޅު، ރައްޔިތުންގެ ހައްގުތައް ދަމަހައްޓާ، އިންސާފުވެރި ފަނޑިޔާރުން އައްޔަން ކުރެވެވި، ޖުޑިޝަރީއަށް އާންމުން ކުރާ އިތުބާރު ވެސް ބޮޑުވާނެ ކަމަށެވެ.