ކުރީގެ ރައީސް އަބްދުالله ޔާމީން އަބްދުލް ޤައްޔޫމަށް ކުރިއަށް އޮތް ރިޔާސީ އިންތިހާބުގައި ވާދަ ނުކުރެއްވިއްޖެނަމަ، ބަދަލުގައި އިދިކޮޅުން ކެންޑިޑޭޓަކު ހޮވުމަށް ނިންމައި، ހުޅުވާލި ފުރުސަތުގައި، ޝައުގުވެރިކަން ފާޅުކުރެއްވި މާލެ ސިޓީ ކައުންސިލްގެ މޭޔަރު އަދި ކުރީގެ ހައުސިން މިނިސްޓަރު ޑރ.މުހައްމަދު މުއިއްޒު އެ މަގާމަށް އިންތިހާބުވެވަޑައިގެންފިއެވެ. 

ޕީއެންސީން ރިޔާސީ އިންތިހާބުގައި ވާދަކުރަން ނިންމައި، ކެންޑިޑޭޓެއްގެ ގޮތުގައި ވާދަކުރުމުގެ ޝައުވެރިކަން ހުރި ފަރާތްތަކަށް އެ ފުރުސަތު ހުޅުވާލުމުން، ޕީޕީއެމްގެ ނާއިބު ރައީސްގެ މަގާމުގައި ހުންނެވުމަށްފަހު ޕީޕީއެމުން ވަކިވެ މުއިއްޒު ވަނީ މިއަދު ޕީއެންސީ އާއި ގުޅިވަޑައިގެންފައެވެ.

އެއަށްފަހު ރިޔާސީ ޓިކެޓަށް ވާދަކުރެއްވުމުގެ ޝައުގުވެރިކަން އޭނާ ފާޅުކުރައްވައި، ސިޓީ ލާފައި ވާއިރު، އެ އިންތިހާބުގައި މުއިއްޒު އާއި ވާދަކުރެއްވީ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް އުމަރުއެވެ. 

މިއިންތިހާބުގައި ވޯޓުލުމުގެ ހައްގު ލިބިގެންވާ ޕީއެންސީ ސެނެޓުގެ 48 މެންބަރުންވެސް އިންތިހާބުގައި ވޯޓު ލާފައިވާކަން އެ ޕާޓީން ފާހަގަކުރެއެވެ. 

އިންތިހާބުގެ ވޯޓުލުމަށްފަހު, ވޯޓު ގުނުން ކުރިއަށް ގެންގޮސްފައިވާއިރު, އޭގެ ނަތީޖާ ދައްކާ ގޮތުން ވޯޓުލީ މީހުންގެ ތެރެއިން 25 މީހުން ވޯޓު ލާފައިވަނީ ޑރ. މުއިއްޒު އަށެވެ. އަނެއް 23 މީހުން ވޯޓުލީ އާދަމް ޝަރީފް އުމަރަށެވެ. އެހެންކަމުން، ރައީސް ޔާމީން އަށް ވާދަ ނުކުރެވޭ ހާލަތެއްގައި ޕީއެންސީގެ ރިޔާސީ ކެންޑިޑޭޓް ގެ ގޮތުގައި ވާދަކުރާނީ މުޢިއްޒު ކަމުގައި ވަނީ ކަނޑައަޅައިފަ އެވެ. 

ޕީއެންސީގެ ރިޔާސީ ކެންޑިޑޭޓަށް މުޢިއްޒު އިންތިހާބު ވެވަޑައިގެންފައިވާއިރު، އޭނާގެ އުއްމީދަކީ ސްޕްރީމްކޯޓަށް މިހާރު ހުށަހަޅާފައިވާ ކެންޑިޑެސީ މައްސަލަ ރައީސް ޔާމީނަށް ކާމިޔާބުވެ، އެމަނިކުފާނު އިންތިހާބުގައި ވާދަކުރެއްވުން ކަމަށް މުޢިއްޒު ވަނީ ވިދާޅުވެފަ އެވެ. 

ވ. އާރަށް މައްސަލާގައި ރައީސް ޔާމީންގެ މައްޗަށް ކޮށްފައިވާ ދައުވާތައް ސާބިތުވާ ކަމަށް ކަނޑައަޅައި، ކްރިމިނަލް ކޯޓުން ކުރި ހުކުމާއި ގުޅިގެން ރައީސް ޔާމީން މިވަގުތު ޖަލުގައި ހުންނެވުމުން، އެމަނިކުފާނުގެ ކެންޑިޑެސީ ގަބޫލު ނުކުރަން އީސީން ވަނީ ނިންމާފައެވެ.

ނަމަވެސް އެ މައްސަލަ ޕީޕީއެމުން މިހާރު ސްޕްރީމް ކޯޓަށް ހުށަހަޅާފައިވާއިރު، ޕީޕީއެމުން ބުނަނީ މައްސަލަ ނިމޭނީ ރައީސް ޔާމީނާއި އެއްކޮޅަށެވެ. އަދި އެފަދައިން ވެއްޖެ ނަމަ، ޕީއެންސީގެ ކެންޑިޑޭޓު އިންތިހާބުގައި ވާދަ ނުކުރާނެ ކަމަށްވެސް އެ ޕާޓީން ބުނެއެވެ.