ރައީސް ޢަބްދުﷲ ޔާމިން ޢަބްދުލްޤައްޔޫމަށް ވާދަނުކުރެވި އިދިކޮޅު ކެނޑިޑޭޓޭއްގެ ގޮތުގައި ވާދަކުރައްވައި ކާމިޔާބު ވެއްޖެނަމަ އެންމެ ފުރަތަމަދުވަހު އެންމެ ފުރަތަމައަށްވެސް ކުރައްވާނެ ކަމަކީ ރައީސް ޔާމިން ޖަލުން މިނިވަންކުރުން ކަމަށް ޕީއެންސީގެ ރިޔާސީ ކެނޑިޑޭޓް އަދި މާލޭ މޭޔަރ ޑރ މުޙައްމަދު މުޢިއްޒު ވިދާޅުވެއްޖެއެވެ.

މުޢިއްޒު މިހެންވިދާޅުވީ މިއަދު ބޭއްވުނު ޕީއެންސީގެ އިންތިޚާބު ކާމިޔާބު ކުރެއްވުމަށްފަހު މީޑިއާ ތަކާއި ވާހަކަދައްކަވަމުންނެވެ.

"ރައީސް ޔާމިންގެ ލަފަޔާއި އިރުޝާދާއި އެކީގަ މިދެޕާޓީ އިންވެސް މަސައްކަތް ކުރާނީ، ދެޕާޓީވެސް، އަޅުގަނޑުމެން ދެމީހުންވެސް، އަޅުގަނޑުމެންގެ ހުރިހާވެސް ވިސްނުމަކީ ރައީސް ޔާމިން" މުޢިއްޒު ވިދާޅުވިއެވެ.

މުޢިއްޒު ޕީއެންސީގެ ކެނޑިޑެސީ ހޯއްދެވީ މަޑުއްވަރީ ދާއިރާގެ މެމްބަރު އާދަމް ޝަރީފާއި ވާދަ ކުރައްވައިގެނެވެ. އާދަމް ޝަރީފަށް ލިބިވަޑައިގަތީ 23 ވޯޓެވެ. މުޢިއްޒަށް ލިބިވަޑައިގަތީ 25 ވޯޓެވެ.

ޕީއެންސީގެ ތެރެއިން ކެނޑިޑޭކަ ނެރެފައިމިވަނީ ޕީޕީއެމްގެ ކެނޑިޑޭޓް ރައީސް ޢަބްދުﷲ ޔާމިން ޢަބްދުލް ޤައްޔޫމްގެ ކެނޑިޑެސީ އިލެކްޝަންސް ކޮމިޝަނުން ބަލައިނުގަތުމާއި ގުޅިގެންނެވެ. މިހާރު އެމައްސަލަ ވަނީ ރައީސް ޔާމިންގެ ފަރާތްޕުޅުން ސްޕްރީމް ކޯޓަށް ހުށައަޅައިފައެވެ.

އީސީ އިން ރައީސް ޔާމިންގެ ކެނޑިޑެސީ ބަލައިނުގަތީ އެމަނިކުފާނަކީ ޖަލު ޙުކުމެއް ތަންފީޒު ކުރައްވަމުންދާ ބޭފުޅެއްކަމަށް ބުނެއެވެ.

ޕީޕީއެމް ޕީއެންސީ ކޯލިޝަން ތަމްސީލު ކުރައްވާ ކެނޑިޑޭޓަކަށް ޑރ މުޢިއްޒު ހޮވި ވަޑައިގަތަސް، ކެނޑިޑެސީ ފޯމު އީސީއަށް ހުށަހަޅުއްވާނީ ސުޕްރީމް ކޯޓަށް ހުށަހަޅާފައިވާ މައްސަލަ ނިމި ރައީސް ޔާމީނަށް އެއްކޮށް ފުރުސަތު ބަންދުވުމުން ކަމަށް މުޢިއްޒުވަނީ ވިދާޅުވެފައެވެ. މީގެއިތުރުން މުޢިއްޒު ވިދާޅުވީ އަބަދުގެވެސް އެދުމަކީ ރައީސް ޔާމީނަށް އިންސާފު ލިބި، މި ފަހަރުގެ ރިޔާސީ އިންތިޚާބުން އެ މަނިކުފާނަށް ފުރުސަތު ލިބުން ކަމަށެވެ.

ރައީސް ޔާމިންގެ ކެނޑިޑެސީގެ މައްސަލައިގެ އަޑު އެހުން މާދަމައަށް ތާވަލުކޮށްފައިވާއިރު، މިމައްސަލައަށް މިހާރު ޕީޕީއެމުން ވަނީ ތަދައްޚުލު ވެފައެވެ. އަދި ދައުލަތުގެ ބަންޑާރަ ނާއިބުވެސް މިމައްސަލަ އަށް ތަދައްޚުލު ވެފައިވެއެވެ.