މިއަދު ފެށުމަށް ހަމަޖެހިފައިވާ އުރީދޫ މަސްރޭސް 2023ގެ ގިފްޓް ޕާޓްނަރ ސީ ގިޔަރ މޯލްޑިވްސްގެ ފަރާތުން އެންމެ ބަރު މަސް ބާނާ ފަރާތްތަކަށް އަގުހުރި އިނާމްތަކެއް ދޭން ނިންމާފައިވާ ކަމަށް އުރީދޫއިން ބުނެފިއެވެ. 

އެގޮތުން ސީ ގިޔަރ މޯލްޑިވްސް އިން ވަނީ، އުރީދޫ މަސްރޭހުގައި ހަތަރު ސިޓީން ވެސް ބައިވެރިވާ ފަރާތްތަކުގެ ތެރެއިން ކޮންމެ ސިޓީ އަކުންވެސް އެންމެ ބަރު މަސް ބާނާ ފަރާތަކަށް ޖުމްލަ -/875 ރުފިޔާގެ އަގުހުރި އިނާމްތަކެއް ދޭން ނިންމާފައި ކަމަށް އުރީދޫއިން މައުލޫމާތު ދެއެވެ.

އެގޮތުން ދިނުމަށް ނިންމާފައިވާ ހަދިޔާ ތަކަކީ؛ 

1) 7 ފޫޓުގެ، ބީ އެންޑް އެމް، ސިލްވަރ ކެޓް އެލައިޓް ރޮޑް ސްޕިނީ

2) ޑައިވާ އެއާރޑް އާއިއެކު 7 ފޫޓުގެ ރޮޑް ކާސްޓިން

3) 112 ސެންޓިމީޓަރުގެ ވްރެތް ސްޕިނިންގ ރީލް

4) 74 ސެންޓިމީޓަރުގެ މެކްސް ޕްރޯ ސްޕިނިންގ ރީލް

5) 10 ލީޓަރ ގެ ޑްރައި ޓިޔުބް ސީއެސް

6) އަތް ދިގު ރޭޝް ގާޑެއް

އުރީދޫ މަސްރޭސް 2023، މިއަދު މާލޭގައި ފަށަނީ 34 ޓީމަކާއި އެކުގައި ކަމަށް އެކުންފުނިން މައުލޫމާތު ދީފައިވެއެވެ.

އުރީދޫ އިން ބުނީ ރާއްޖޭގެ އެކި ކަންކޮޅުތަކުގައި ދިރިއުޅޭ މަސްވެރިކަމަށް ޝައުގުވެރިވާ ފަރާތުން ހީވެސް ނުކުރާ ވަރުގެ ތަރުހީބަކާއެކު މިއަހަރުގެ މަސްރޭސްގައި ބައިވެރިވުމަށް ޖުމްލަ ރެޖިސްޓަރ ކުރި 83 ޓީމާއެކު ބާއްވާ މި އަހަރުގެ އުރީދޫ މަސްރޭސް ވެގެންދާނީ ރާއްޖޭގައި ބާއްވާ އެންމެ ބޮޑު މަސްވެރިކަމުގެ މުބާރާތައްކަމަށެވެ.

މިއަދު މެންދުރު 2:30 ގައި ޓީމުތައް މަސްވެރިންގެ ޕާކުން މަހަށް ފުރާއިރު، މަސް ކިރުމަށް ހުރިހާ ޓީމްތަކުން އުސްފަސްގަނޑަށް މާދަން ރޭ 9ގެ ކުރިން އަންނަންވާނެ ކަމަށް އުރީދޫ އިން ބުނެއެވެ. 

އުރީދޫ މޯލްޑިވްސްގެ 18 ވަނަ އަހަރީ ދުވަސް ފާހަގަކުރުމުގެ ގޮތުން މަސްރޭސް 2023 ވަނީ މާލެ ސިޓީ، ކުޅުދުއްފުށި ސިޓީ، އައްޑޫ ސިޓީ އަދި ފުވައްމުލައް ސިޓީއަށް ވަނީ ފުޅާކޮށްފައި ކަމަށް އުރީދޫއިން ބުނެއެވެ.

އެގޮތުން މާލެ ސިޓީގައި  އޮގަސްޓް މަހުގެ 4 ވަނަ ދުވަހު މިމުބާރާތް ބާއްވާއިރު ކުޅުދުއްފުށި ސިޓީގައި ބާއްވާނީ އޮގަސްޓް 11 ގައެވެ. އަދި އައްޑޫ ސިޓީގައި އޮގަސްޓް 18 ގައި ބާއްވާއިރު ފުވައްމުލައް ސިޓީ ގައި އޮގަސްޓް 25ގައި މިމުބާރާތް އޮންނާނެ ކަމަށް އުރީދޫއިން މައުލޫމާތުދެއެވެ.

"މާލެއިން 34 ޓީމު ބައިވެރިވާ އިރު ކުޅުދުއްފުށި ސިޓީން 23 ޓީމާއި އައްޑޫ ސިޓީގެ 13 ޓީމަކާއި ފުވައްމުލައް ސިޓީގެ 13 ޓީމަކާއެކު ކޮންމެ ޓީމެއްވެސް އެ ޓީމެއްގެ ސިޓީގައި ޗެމްޕިއަންކަން ހޯދުމަށް ވާދަކުރާއިރު މުބާރާތުގެ ފޯރި އާއި ވާދަވެރިކަން އެހެން އަހަރުތަކަށް ވުރެ ވަރުގަދަވެގެންދާނެ" އުރީދޫ އިން ބުނެފައިވެއެވެ.

އުރީދޫ މަސްރޭސް ރެކޯޑް މުގުރާލާ މިދިޔަ އަހަރު ޗެމްޕިއަންކަން ހޯދި ސްޓެލްކޯ ކަނބަލުން ޓީމުން މިއަހަރުވެސް ވާދަކުރާކަން އެކުންފުނިން ވަނީ ބުނެފައިކަމަށާއި، އަންހެން ޓީމަކުން ނިކުމެ ރިކޯޑް އަދަދެއްގެ މަސްބާނާ ހޯދި މި ކާމިޔާބީން ދައްކުވައިދެނީ ހަމަހަމަކަމުގެ ރޫހު ކަމަށް އުރީދޫއިން ބުނެއެވެ.

މިމުބާރާތުގެ އިނާމަށް ޖުމްލަ 160،000 ރުފިޔާގެ އިނާމު ދިނުމަށް ހަމަޖެހިފައިވާ ކަމަށް އުރީދޫއިން ބުނެއެވެ.

އަދި އޭގެ ތެރޭއިން ކޮންމެ ސިޓީއަކުން މޮޅުވާ ޓީމުތަކަށް އެއްވަނަ ޓީމަށް 25،000 ރުފިޔާ، ދެ ވަނަ ޓީމަށް 10،000 ރުފިޔާ އަދި 3 ވަނަ ޓީމަށް 5000 ރުފިޔާ ލިބޭނެ ކަމަށް އުރީދޫއިން ބުނެއެވެ.

މީގެ އިތުރުން އެންމެ މޮޅު ފިރިހެން ކެޔޮޅަށް 1000 ރުފިޔާ އަދި އެންމެ މޮޅު އަންހެން ކެޔޮޅަށް 1000 ރުފިޔާ ދިނުމަށް ހަމަޖެހިފައިވާ ކަމަށްވެސް އުރީދޫއިން ބުނެއެވެ.

އުރީދޫ މޯލްޑިވްސްއިން ވަނީ މަސްރޭސް 2023 އަށް ރަޖިސްޓްރީކުރި ހުރިހާ ޓީމަކަށް ވަރަށް އިޚްލާޞްތެރިކަމާއެކު ޝުކުރު އަދާކޮށްފައެވެ. މިމުބާރާތައް ލިބުނު ބޮޑު އެއްބާރުލުމަކީ މި ހަރަކާތުގެ ސަބަބުން މަސްވެރިކަމަށް ލޯބި ކުރާ ފަރާތްތަކުގެ ތެރޭގައި އުފެދުނު އުފާވެރިކަމާއި ޝައުގުވެރިކަން ދައްކުވައިދޭ ކަމެއް ކަމަށްވެސް ބުނެފައިވެއެވެ.

އުރީދޫ މަސްރޭހުގެ ކުޅިވަރު ބަލާލުމަށް އެންމެހައި ފަރާތްތަކަށް އުސްފަސްގަނޑު ސަރަހައްދަށް އުރީދޫ މޯލްޑިވްސް އިން ދައުވަތު ދީފައިވެއެވެ.