ޖިނާއީ ހުކުމަކުން ކަނޑައަޅާ ޖޫރިމަނާއަކީ ސާބިތު ދަރަންޏެއް ނޫން ކަމަށާއި އެއީ އުގޫބާތުގެ ވައްތަރުތަގެ ތެރެއިން މާލީ އުގޫބާތުގެ ވައްތަރެއް ކަމުގައި ކުރީގެ އުއްތަމަ ފަނޑިޔާރު ޑރ އަހްމަދު އަބްދުﷲ ދީދީ ވިދާޅުވެއްޖެއެވެ. 

އެބޭފުޅާ މިފަދައިން ވިދާޅުވީ، ސުޕްރިމް ކޯޓުގައި އިއްޔެ އާއި ރޭ ކުރިއަށް ގެންދިޔަ ކުރީގެ ރައީސް އަދި ޕީޕީއެމްގެ ރިޔާސީ ކެންޑިޑޭޓް، އަބްދުﷲ ޔާމީން އަބްދުލް ގައްޔޫމް ގެ ކެނޑިޑެސީ އިލެކްޝަންސް ކޮމިޝަނުން ބަލައި ނުގަތުމާއި ދެކޮޅަށް ހުށަހެޅި މައްސަލައިގެ އަޑު އެހުންތައްް ކުރިއަށް ދިޔަ ވަގުތު ކުރެއްވި ޓުވީޓެއްގައެވެ. 

މި މައްސަލައިގައި އިލެކްޝަންސް ކޮމިޝަނުން ވަނީ . އާރަށް ކުއްޔަަށް ދިނުމުގެ މައްސަލާގައި މަނީ ލޯންޑްރިންނާއި ރިޝްވަތު ހިފުމުގެ ކުށް ސާބިތުވެ، ކުރީގެ ރައީސް އަބްދުﷲ ޔާމީންގެ މައްޗަށް އިއްވި 11 އަހަރުގެ ޖަލު ހުކުމާ އެކު ދައްކަން އަމުރުކޮށްފައިވާ 5 މިލިއަން ޑޮލަރުގެ ޖޫރިމަނާ ނުދައްކާ އޮތުމުން އެ މަނިކުފާނު ގެ މައްޗަށް ސާބިތު ދަރަންޏެއް އޮތް ކަމަށާއި އެކަމުގެ ސަބަބުން އިންތިހާބަށް ޝަރުތު ހަމަ ނުވާނެ ކަމުގައި ބުނެފައެވެ. އަދި އަބްދުﷲ ޔާމިންގެ ކެނޑިޑެސީ ބަލައި ނުގަނތް ސަބަބެއް ގޮތުގައި އިލެކްޝަންސް ކޮމިޝަން އިން ވަނީ އެ ކަން ފާހަގަ ކޮންފައެވެ. 

މިކަމާއި ގުޅިގެން ކުރީގެ އުއްތަމަ ފަނޑިޔާރު އަހުމަދު އަބްދުﷲ ދީދީ ވިދާޅުވީ، ސާބިތު ދަރަނި ގުޅިފައިވާނީ ކޮންޓްރެކްޓަކުން ނުވަތަ އެނޫންވެސް އެފަދަ މަދަނީ މުއާމަލާތަކުން އުފެދޭ އިލްޒާމް ތަކާއި ކަމުގައެެވެ. 

މި މައްސަލައާއި ގުޅިގެން އަބްދުﷲ ޔާމީން ވިދާޅުވެފައިވަނީ، ހުކުމެއް އޮވެ، އެ ހުކުމުގެ ދަށުން ފައިސާއެއް ދައްކަން ޖެހޭކަން ވެސް އެނގިވަޑައިގަންނަވާ ކަމަށެވެ. ނަމަވެސް، ފައިސާ ދައްކަން ޖެހޭ މުއްދަތު ކަމާ ބެހޭ އިދާރާ އިން އެ މަނިކުފާނަށް ނުވަތަ އެ މަނިކުފާނުގެ ވަކީލުންނަށް އަދި އަންގާފައި ނުވާކަމަށާއި ތާރީހު އަންގަން ޖެހޭ ފަރާތަކީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ކަމުގައި ވާއިރު، އެ ފައިސާ ނުދައްކައިގެން މިހާތަނަށް އެ އިދާރާ އިން ނޯޓިހެއް ފޮނުވާފައި ނުވާ ކަމަށްވެސް ޔާމީން ވަނީ ވިދާޅުވެފައެވެ.

ރައީސް ޔާމީންގެ ކެނޑިޑެސީ އިލެކްޝަންސް ކޮމިޝަންއިން ބަލައި ނުގަނތް މައްސަލައިގެ އަޑުއެހުންތައް ސުޕްރިމް ކޯޓުގައި ނިންމާލައިފައިވާއިރު، ދެން މި މައްސަލައިގައި ކުރިއަށް އޮންނާނީ މައްސަލައިގެ ހުކުމް ކުރުމެވެ.