ރައީސް އިބްރާހިމް މުޙައްމަދު ޞާލިޙަށް އޮތް ތާއީދު އެއްދުވަހުން އަނެއްދުވަހަށް އަންނަނީ ބޮޑުވަމުން، ފުޅާވަމުން އިތުރުވަމުން ކަމަށް މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

ޝަރީފް މިހެން ވިދާޅުވީ އޭނާ ކުރެއްވެވި ޓްވީޓު ތަކެއްގައެވެ.

ޝަރީފް އިތުރަށް ވިދާޅުވީ އެކަކުވެސް ބާކީ ނުކޮށް ރައްޔިތުންގެ އުންމީދުތަކުގައި ކުލަ ޖައްސަން ރައީސް ޞާލިޙް ދަނީ ގަދަ އަޅައި މަސައްކަތް ކުރަމުންކަމަށް ގިނަ ރައްޔިތުން ޤަބޫލު ކުރާ ކަމަށެވެ.

މީގެއިތުރުން ޝަރީފް ވިދާޅުވީ އިދިކޮޅު ޕީޕީއެމް އޮތީ ޑިޕްރެޝަންގައި ކަމަށެވެ.

"ޕީޕީއެމްގެ ލީޑަރަށް ކުރިމަތިވެފައިއޮތް ހާލަތު ޤަބޫލުކުރާކަށް އެޕާޓީގެ ލީޑަރޝިޕުން ބޭނުމެއްނުވޭ، ހަޤީޤަތާއި ކުރިމަތިލާކަށް ބޭނުމެއްނުވޭ" ޝަރީފް ވިދާޅުވެފައިވެއެވެ.

ޝަރީފް ވިދާޅުވެފައިވަނީ ރައީސް ނަޝީދު ކިތަންމެ ވަރަކަށް ގަދަ ބަސްވިދާޅުވިޔަސް، ރައީސް ޞާލިޙަށް މަލާމާތްކޮށް ފުރައްސާރަ ކުރެއްވިޔަސް ރައީސް ނަޝީދު މިހާރު މާޔޫސްވެއްޖެ ކަމަށެވެ.

"ދަ ޑިމޮކްރެޓްސްގެ ލީޑަރުން އެމްޑީޕީ ރޫޅާލަން ކުރާ މަސައްކަތް ކާމިޔާބު ނުވާނެކަން ގިނަ ރައްޔިތުން ގަބޫލުކުރޭ" ޝަރީފް ވިދާޅުވެފައިވެއެވެ.

މިއާއި އެކު ޝަރީފް ވިދާޅުވެފައިވަނީ ދެން ތިބީ ދެވަނަބުރުން ޖާގަލިބޭނެ ޕާޓީތަކެއް ނޫން ކަމަށެވެ. އަދި ފެންނަ މަންޒަރަށް ބަލާއިރު އެއްބުރުން ރައީސް ޞާލިޙް ކާމިޔާބު ކުރައްވާނެ ކަމަށްވެސް ޝަރީފް ވަނީ ވިދާޅުވެފައެވެ.

އީސީއިން ރައީސް ޔާމިންގެ ކެންޑިޑެސީ ބަލައިނުގަތް މައްސަލަ މިހާރު އޮތީ ސްޕްރީމް ކޯޓުގައެވެ. ރައީސް ޔާމިންގެ ކެންޑިޑެސީ އީސީ އިން ބަލައިނުގަތުމުން ޕީޕީއެމް ޕީއެންސީ ކޯލިޝަނުން މިހާރުވަނީ އެކޯލޮޝަންގެ ވަގުތީ ކެންޑިޑޭޓެއްގެ ގޮތުގައި ޑރ މުޢިއްޒު  ހަމަޖައްސައިފައެވެ.

ޑރ މުޢިއްޒު ވަގުތީ ކެންޑިޑޭޓޭއްގެ ގޮތުގައި ހަމަޖެއްސިނަމަވެސް އަދިވެސް އެކޯލިޝަންގެ އުންމީދުއޮތީ ރައީސް ޔާމިނާއި ގުޅިފައިކަމަށް އެޕާޓީގެ އިސްލީޑަރުން އަންނަނީ މެދުނުކެނޑި ބުނަމުންނެވެ.