ޕީޕީއެމުން ޕްލޭން ބީ ނުވަތަ ޕްލޭން ސީ އަކާއި މެދު ވިސްނާނީ ރައީސް ޢަބްދުﷲ ޔާމިން ޢަބްދުލްޤައްޔޫމަށް ވާދަ ނުކުރެވޭ ފަދަ ޙާލަތެއް މެދުވެރިވެއްޖެނަމަ ކަމަށް ޕީޕީއެމުން ބުނެފިއެވެ.

ޕީޕީއެމުން މިހެން ބުނެފައިވަނީ އެޕާޓީއިން މިއަދު ނެރުނު ނޫސް ބަޔާނެއްގައެވެ.

އެބަޔާނުގައި ބުނެފައިވަނީ ޕީޕީއެމްގެ ޕްލޭން ބީ އެއް ވުޖޫދުކޮށް ޕީއެންސީއިން ނެރޭ ކެންޑިޑޭޓަކީ ޕީޕީއެމްގެ ކެންޑިޑޭޓަކަށް ނިންމައިފިކަމަށްބުނެ ބައެއް މީޑިއާތަކުން ފަތުރަމުން ދަނީ ދޮގު ޚަބަރެއްކަމަށެވެ.

ޒިންމާދާރު ނޫސްވެރިކަން ކުރާއިރު، ކަމުގެ ހަޤީޤީ މައުލޫމާތު ހޯއްދެވުމަށްފަހު ނޫންގޮތަކަށް ނޫސްތަކުގައި ނުލިޔުމަށް އެބަޔާނުގައި ވަނީ ގޮވައިލައިފައެވެ.

މީގެއިތުރުން ޕީޕީއެމްގެ ފަރާތުން ޕީއެންސީގެ ރިޔާސީ ކެންޑިޑޭޓް އެންޑޯޒް ކުރަން ނިންމައި ޕީޕީއެމްގެ ޕްލޭން ބީއެއްގެ ގޮތުގައި ވުޖޫދު ކޮށްފައިނުވާނެ ކަމަށްވެސް އެބަޔާނުގައި ބުނެފައިވެއެވެ.

"ޕީޕީއެމުން ޕްލޭން ބީ ނުވަތަ ސީ އަކާއިމެދު ވިސްނާނީ، ރައީސް ޢަބްދުﷲ  ޔާމީން ޢަބްދުލްޤައްޔޫމަށް ވާދަނުކުރެވޭނެ ޙާލަތެއް މެދުވެރިވުމުން އެކަނި" ޕީޕީއެމްގެ ބަޔާނުގައި ވެއެވެ.

މީގެއިތުރުން އެބަޔާނުގައި ބުނެފައިވަނީ  ދިވެހިރާއްޖޭގައި އޮތް މިވަގުތު އެންމެބޮޑު އިދިކޮޅު ޕާޓީ ޕީޕީއެމްގެ ރިޔާސީ ކެންޑިޑޭޓަކީ ރައީސް ޔާމިންކަމަށެވެ.

އަދި އެޕާޓީގެ ފަރާތުން ސްޕްރީމް ކޯޓުގައި މިވަގުތު ހިނގަމުންދާ ރައީސް ޔާމިންގެ ކެންޑިޑެސީގެ މައްސަލައަށް ތަދައްޚުލް ވެފައިވަނީ ޕީޕީއެމްގެ ރިޔާސީ ކެންޑިޑެސީ ބަލައިނުގަންނަން އީސީ އިން ނިންމާފައިވަނީ ޤާނޫނު އަސާސީ ނުބައިކޮށް ތަޠްބީޤް ކޮށްގެން ކަމަށާއި، ރައީސް ޔާމީންގެ ކެންޑިޑެސީ ބަލައިގަތުމަށް އީސީގެ މައްޗަށް ސްޕްރީމްކޯޓުން އަމުރުނެރެދިނުމަށް ކަމަށެވެ. އަދި އެފުރުސަތު ނުލިބޭނަމަ ޕީޕީއެމަށް ކެންޑިޑޭޓަކު ނެރުމަށް ފުރުޞަތު ލިބިގަތުމަށް ކަމަށެވެ.

ރައީސް ޔާމިންގެ ރިޔާސީ ކެންޑިޑެސީގެ މައްސަލައިގެ އަޑުއެހުމެއް އިއްޔެ ވަނީ ވަރަށް ދިގުކޮށް ސްޕްރީމް ކޯޓުގައި ކުރިއަށް ގެންގޮސްފައެވެ.

މެންދުރު ފަހުގެ ވަގުތެއްގައި ފެށި އަޑުއެހުން ރޭގެ ވަރަށް ދަންވުމާއި ހަމައަށް ކުރިއަށް ގެންގޮސްފައިވެއެވެ.