އަންނަ މަހުގެ 9 ވަނަ ދުވަހު އޮންނަ ރިޔާސީ އިންތިހާބު ބޮއިކޮޓް ކުރަން ނުފެންނަ ކަމަށް ޕީޕީއެމް/ޕީއެންސީ ސެނެޓުން ދާދި ދެންމެއަކު ނިންމައިފިއެވެ.

ކުރިއަށް އޮތް ރިޔާސީ އިންތިހާބު، ބޮއިކޮޓް ކުރުމަށް އިދިކޮޅުު ޕީޕީއެމްގެ ލީޑަރ އަދި ކުރީގެ ރައީސް ޔާމީން އަބްދުލްގައްޔޫމް ވަނީ އިދިކޮޅު ކޯލިޝަނަށް އަންގާފައެވެ. އެފަދައިން އަންގައި އެމަނިކުފާނު އިދިކޮޅަށް ފޮނުއްްވި ނޯޓުގައި ވަނީ، އެމަނިކުފާނަށް އިންސާފް ނުލިބޭ ނަމަ ރިޔާސީ އިންތިހާބު ބޯއިކޮޓް ކުރުމަށެވެ. 

އެކަމާއި ގުޅިގެން މަޝްވަރާ ކުރުމަށް ޕީޕީއެމް/ޕީއެންސީގެ ލީޑަރުން މިއަދު ވަނީ ބައްދަލުވުމެއް ބާއްވައި، އެގޮތަށް އެކަން ކުރަން ފެނޭތޯ ވޯޓެއް ވެސް ނަގާފައެވެ. މައުލޫމާތު ލިބިފައިވާ ގޮތުގައި އެ ވޯޓުން އެގޮތަށް ކަން ނުކުރާށެވެ. 

މިކަމާއި ގުޅިގެން ޕީޕީއެމްގެ ސެކްރެޓަރީ ޖެނެރަލް މުހައްމަދު ތޮލާލް ވިދާޅުވީ ޔާމީން ދެއްވި ލަފާފުޅާ ގުޅިގެން މަޝްވަރާ ކުރެއްވުމަށް ފަހު، އެމަނިކުފާނު މިނިވަން ކުރެވެން އަންނަނީ އިންތިހާބުގައި ވާދަކޮށްގެން ކަމަށް ފެންނާތީ އެގޮތަށް ލަފާ އަރުވަން ސެނެޓުން ނިންމާފައިވާ ކަމަށެވެ.

އަދި ޔާމީންގެ ހައްގުގައި ކުރަން ޖެހުނު ކޮންމެ ކަމެއް ކުރުމަށް ވެސް ސެނެޓް އެއްކޮށް އިއްތިފާގުވާ ކަމަށް ތޮލާލް ވިދާޅުވިއެވެ.