މިއަހަރުގެ ސެޕްޓެމްބަރު މަހުގެ 9 ގައި ބާއްވާ ރިޔާސީ އިންތިޚާބު ކާމިޔާބު ކުރާނީ ޕީޕީއެމް-ޕީއެންސީ ކޯލިޝަނުން ކަމަށް، އެ ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ. 

އަބްދުއްރަހީމް މިފަދައިން ވިދާޅުވެފައި ވަނީ ޕީއެންސީގެ ރިޔާސީ ކެންޑިޑޭޓު ޑރ މުހައްމަދު މުއިއްޒުގެ ކެންޑިޑެސީ ފޯމު އިލެކްޝަންސް ކޮމިޝަނަށް ހުށައެޅުއްވުމަށް ފަހު ކުރެއްވި ޓްވީޓެއްގަ އެވެ. 

އެގޮތުން އަބްދުއްރަހީމް ވިދާޅުވީ ރިޔާސީ އިންތިޚާބުގައި ބައިވެރިވެވަޑައިގަތީތީ ޑރ މުއިއްޒަށާއި، އެމަނިކުފާނުގެ ރަނިންމޭޓު، ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުޙައްމަދު ލަތީފަށް ޝުކުރު އަދާކުރައްވާ ކަމަށެވެ. 

Advertisement

އަދި އެ ދެބޭފުޅުންނަށް ރައީސް ޔާމިނުގެ ފުރިހަމަ ތާއީދު އޮތް ކަމަށާއި ރައްޔިތުންގެ ސަޕޯޓާއި މަސައްކަތުން ރިޔާސީ އިންތިޚާބު ކާމިޔާބު ކުރެވޭނެކަމުގެ ޔަގީންކަން އޮތްކަމަށް އަބްދުއްރަހީމް ވިދާޅުވި އެވެ. 

ޕީއެންސީގެ ފަރާތުން ރިޔާސީ އިންތިޚާބުގައި ބައިވެރިވުމަށް ޑރ މުއިއްޒު ފޯމު ހުށައަޅާފައިވަނީ މިއަދު ހެނދުނުގެ ވަގުތެއްގަ އެވެ. 

ޕީޕީއެމްގެ ރިޔާސީ ކެންޑިޑޭޓު ރައީސް ޔާމީން އަބްދުލްގައްޔޫމުގެ ކެންޑިޑެސީ ފޯމު ބަލައިނުގަތުމަށް އިލެކްޝަންސް ކޮމިޝަނުން ނިންމި ނިންމުން ސުޕްރިމް ކޯޓުން ދެމެހެއްޓުމާއި ގުޅިގެން، ރައީސް ޔާމިނު ވަނީ އެމަނިކުފާނަށް ތާއީދުކުރާ އެތައް ބައެއްގެ ހައްގު ފޭރިގެންފައިވާކަމަށް ޤަބޫލުކުރެވޭތީ، ރިޔާސީ އިންތިޚާބު ބޮއިކޮޓް ކުރުމަކީ ސެނެޓަށް ފެންނަކަމެއް ކަމަށް ވާ ނަމަ އެކަން ކުރުމަށް އެދިވަޑައިގެންފަ އެވެ. 

އެހެން ނަމަވެސް ސެނެޓުގެ ނިންމުމަކަށް ވީ ރިޔާސީ އިންތިޚާބުގައި ބައިވެރިވުމެވެ. އަދި ރައީސް ޔާމީންގެ މިހާރު ވަނީ ސެނެޓުގެ އެ ނިންމުމަށް ތާއީދުކުރައްވާފަ އެވެ. 

ޕީއެންސީގެ ފަރާތްޕުޅުން ޑރ މުއިއްޒު ކުރިމަތިލެއްވީ ރައީސް ޔާމިނުގެ ވެސް ތާއީދާއި އެކުގައިކަމަށް ޕީޕީއެމްގެ ސެކެޓްރީ ޖެނެރަލް ތަލާލު ވަނީ މީޑިއާއަށް ވިދާޅުވެފަ އެވެ.