ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ލަޝްކަރު ފޫގަޅާލައިގެން މި ނިކުންނަނީ ޕީއެންސީގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ހޮވަންކަމަށް ޕީޕީއެމްގެ ނައިބު ރައީސް އަދި މަޖިލީހުގެ ގުރައިދޫ ދާއިރާގެ މެމްބަރު މުޙައްމަދު ޣައްސާނު މައުމޫނު ވިދާޅުވެއްޖެ އެވެ. 

ޣައްސާނު މިފަދައިން ވިދާޅުވެފައިވަނީ ޕްރޮގްރެސިވް ކޮންގްރެސް ކޯލިޝަންގެ ފަރާތުން މިއަހަރުގެ ސެޕްޓެމްބަރު މަހުގެ 9 ގައި ބާއްވާ ރިޔާސީ އިންތިޚާބުގައި ވާދަކުރައްވާނެ ކެންޑިޑޭޓަކީ މުއިއްޒުކަމުގައި ކަނޑައަޅާ، އެމަނިކުފާނުގެ ކެންޑިޑެސީ ފޯމު އިލެކްޝަންސް ކޮމިޝަނަށް ހުށައެޅުއްވުމާއި ގުޅިގެން ކުރެއްވި ޓްވީޓެއްގަ އެވެ. 

މުއިއްޒުގެ ކެންޑިޑެސީ ފޯމު އިލެކްޝަންސް ކޮމިޝަނަށް ހުށައެޅީ، ރިޔާސީ އިންތިޚާބު ބޮއިކޮޓު ނުކުރުމަށް ޕީޕީއެމް-ޕީއެންސީ ޖޮއިންޓު ސެނެޓުން ނިންމާ، އެކަން ރައީސް ޔާމިނަށް އެންގެވުމަށްފަހު އެމަނިކުފާނުގެ ތާއީދާއި އެކުގައި ކަމަށް ޕީޕީއެމުން ވަނީ ބުނެފަ އެވެ. 

Advertisement

މުއިއްޒަށް މަރުހަބާ ދަންނަވާ ޣައްސާނު ކުރެއްވި އެ ޓްވީޓުގައި ވިދާޅުވީ ރައީސް ޔާމިނަކީ ވައުދު ފުއްދަވާ ރައްޔިތުންދެކެ ލޯބިފުޅުވާ ރައީސެއް ކަމަށެވެ.

ރައީސް ޔާމީނު، އެމަނިކުފާނުގެ ސަޕޯޓަރުންނާއި ޕީޕީއެމްގެ އާންމު މެމްބަރުން މަގުމަތިކޮށްނުލާނެ ކަމުގެ ޔަގީންކަން ޕީޕީއެމުން ދިޔައީ އަބަދުވެސް ދެމުންނެވެ. 

އެކަމަށް އިޝާރާތްކުރައްވާ ޣައްސާނު ވިދާޅުވީ، ރައީސް ޔާމިނުގެ އެ ނިންމެވުމާއެކު، ދެން ޕީޕީއެމް ޕީއެންސީން ފޫގަޅާލައިގެން ނިކުންނާނީ ރިޔާސީ އިންތިޚާބު ކާމިޔާބުކޮށް ޑރ މުއިއްޒު ވެރިކަމަށް ގެނައުމަށް ކަމަށެވެ. 

އަދި މާތްﷲ ގެ ވާގިފުޅާއެކު ރިޔާސީ އިންތިޚާބު ކާމިޔާބު ކުރެވޭނެ ކަމުގެ ފުރިހަމަ ޔަގީންކަން އޮތްކަމަށް ޣައްސާނު ވަނީ ވިދާޅުވެފަ އެވެ.