ށ އަތޮޅު ދެކޮމަންޑޫ ގުޅުވައިލުމަށް ބޭނުންވާ ބިން ހިއްކައި ނިމިއްޖެކަމަށް އެމަޝްރޫޢު ކުރިއަށް ގެންދިޔަ ކުންފުނި އެމްޓީސީސީ އިން ބުނެފިއެވެ.

އެމްޓީސީސީއިން ބުނެފައިވަނީ ކޮމަންޑޫ ޝޯޕްރޮޓެކްޝަން ރެކްޓިފިކޭޝަންއާއި މަތިކޮމަންޑޫ ކަނެކްޓިވިޓީ މަޝްރޫޢުގެ ދަށުން، ކުރިޔަށްގެންދިޔަ ބިން ހިއްކުމުގެ މަސައްކަތް ނިމިފައިވާ ކަމަށެވެ.

 މީގެ އިތުރުން، މަތި ކޮމަންޑޫ ގޮނޑުދޮށް ހިމާޔަތްކުރުމުގެ މަސައްކަތުގެ %45 ނިމިފައިވާއިރު، ކޮމަންޑޫގެ ރިވެޓްމެންޓް ރެކްޓިފިކޭޝަން މަސައްކަތުގެ %52 ވަނީ ފުރިހަމަކުރެވިފައި ކަމަށްވެސް އެމްޓީސީސީއިން ވަނީ ބުނެފައެވެ. މިއާއިއެކު މުޅި މަޝްރޫޢުގެ %50 މަސައްކަތް ވަނީ މިހާރު ނިމިފައި ކަމަށް އެމްޓީސީސީއިން ބުނެއެވެ.

އެމްޓީސީސީއިން ބުނީ މި މަޝްރޫޢުގެ ދަށުން، 16.7 ހެކްޓަރުގެ ބިން ހިއްކައި 200 މީޓަރު ދިގުމިނުގެ ބުރިޖަކުން ކޮމަންޑޫ އަދި މަތިކޮމަންޑޫގައި ހިއްކާ ސަރަޙައްދު ގުޅުވާލުން ހިމެނޭކަމަށެވެ. މީގެ އިތުރުން، 3,182 މީޓަރުގެ ރިވެޓްމަންޓްއެއް ޖެހުމާއި، 353 މީޓަރުގެ ގްރޮއިންސް ހަރުކުރުމާއި އަދި 30 މީޓަރުގެ ބޭރުތޮށީގެ ރެކްޓިފިކޭޝަން މަސައްކަތް ހިމެނޭ ކަމަށް އެކުންފުނިން ހާމަކޮށްފައިވެއެވެ

 މިއީ 235.75 މިލިޔަން ރުފިޔާގެ މަޝްރޫޢެއް ކަމަށް އެމްޓީސީސީއިން ބުނެއެވެ.

މި މަޝްރޫޢުގެ މަސައްކަތް އެމްޓީސީސީއިން ފަށައިފައިވަނީ މިދިޔަ ޖުލައި މަހުގެ ތެރޭގައެވެ.