ކުރީގެ ރައީސް ޢަބްދުالله ޔާމިން ޢަބްދުލްޤައްޔޫމަކީ މުޅި ޤައުމުގެ މަސްލަހަތާއި ގުޅިފައިވާ ބޭފުޅެއްކަން ހުރިހާ ޕާޓީއެއްގެ ހުރިހާއެންމެންވެސް ޤަބޫލުކުރާ ކަމަށް ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.

ޝިޔާމް މިހެން ވިދާޅުވީ ޕީޕީއެމް ޕީއެންސީ ކޯލިޝަނުން ރައީސް ޔާމިން މިނިވަންކުރުމަށް ގޮވާލައި ބޭއްވި އިހްތިޖާޖުގައި ވާހަކަ ދައްކަވަމުންނެވެ.

ޝިޔާމް ވިދާޅުވީ ބައެއްގެ ސިޔާސީ މަޤްސަދުތައް ހާސިލް ކޮށްދިނުމަށްޓަކައި، ސްޕްރީމް ކޯޓުގެ ފަނޑިޔާރުންގެ ބެންޗުން ރައީސް ޔާމިން ދިވެހި ޤައުމާއި ރައްޔިތުންނަށްޓަކައި ވަމުންދާ ޤުރުބާނީ ހަނދާން ނައްތާލައިފައިވާކަމަށެވެ. ޝިޔާމް ވިދާޅުވީ އެއީ މިޤައުމުން ޑިމޮކްރަސީގައި ފަހަތަށް އެޅި ފިޔަވަޅެއް ކަމަށެވެ.

ރައީސް ޔާމިން ހުންނެވި ހާލަތުގައި އެހެން ޤައުމުތަކުގައި ކަންކުރާ ގޮތް ރައީސް ޔާމިންގެ ވަކީލުން ވަރަށް ސާފުކޮށް ކިޔައިދެއްވި ކަމަށާއި، އަދި ސްޕްރީމް ކޯޓުގެ ފަނޑިޔާރުންގެ ބެންޗުގައި ތިއްބެވި ބޭފުޅުންނަށްވެސް މިއެޅުއްވޭ ފިޔަވަޅަކީ ޑިމޮކްރަސީގެ މަގުގައި ފަހަތަށް އެޅޭ ފިޔަވަޅެއްކަން އެނގިލައްވާނެ ކަމަށްވެސް ޝިޔާމް ވިދާޅުވިއެވެ.

އެކަމާއި ހިތާމަކުރައްވާ ކަމަށް ޝިޔާމް ވިދާޅުވިއެވެ.

ޝިޔާމް ވިދާޅުވީ ރައީސް ޔާމިންގެ މައްސަލަ އަޑުއައްސަވަން ޔޫއެންގެ ބޭފުޅަކުވެސް ޝަރީޢަތުގެ މަޖިލީހުގައި ހުންނެވިތަން ދެކިލެއްވި ކަމަށެވެ. އަދި ޑިމޮކްރަސީއަކީ ހުޅަނގަށް އެކަނި އިނގޭ އެއްޗެއްތޯ ޝިޔާމް ސުވާލުކުރައްވައިފައިވެއެވެ.   

މީގެއިތުރުން މިސަރަހައްދުގައި ޑިމޮކްރަސީ އަށް ވަނީ އިންޑިޔާއިން ބޭނުންވާ ގޮތަކަށް ހިންގާ ސަރުކާރެއްގެ ޢަމަލުތައްތޯ ނުވަތަ އިންޑިޔާއިން ބޭނުންވާ ގޮތައް އޮޕަރޭޓުވާ ފަނޑިޔާރުގެ ތަކުން ކުރާ ޙުކުމްތައްތޯ ޝިޔާމް ވަނީ ސުވާލުކުރައްވައިފައެވެ.

ދިވެހިރާއްޖެގައި މިވަގުތު ހުރި އެންމެ ތާއީދު ބޮޑު ލީޑަރަށް ވާދަނުކުރެވޭ އިންތިޚާބެއް އިންސާފުވެރި ވާނެކަމަށް ޤަބޫލުކުރައްވަނީ ކިހިނެއްތޯވެސް ޝިޔާމް ވިދާޅުވިއެވެ.