މިއަހަރުގެ ރިޔާސި އިންތިހާބު ކަމިޔާބުގެ ދެވަނަ ދައުރަކަށް ވެރިކަން ކުރަން ލިބިއްޖެ ނަމަ ރާއްޖޭގެ ސްކޫލުތަކުގައި އިސްލާމް މާއްދާ އިނގިރޭސި ބަހުން ކިޔަވަން ބޭނުންވަ ކުދިންނަށް އެ ފުރުސަތު ފަހުކޮށްދިނުމަށް އެ ޕާޓީގެ މެނިފެސްޓޯގައި ހިމަނައިފިއެވެ. 

"އުފާވެރި ދިރިއުޅުން" ގެ ނަމުގައި ރައީސް އިބްރާހިމް މުޙައްމަދު ޞާލިހުގެ ރިޔާސީ މެނިފެންޓޯގެ ފުރަތަމަ ބައި އިއުލާންކޮށްފައިވާއިރު، މި މެނިފެސްޓޯގެ ދަށުން "މާދަމާގެ މީހާ މިއަދު" ގެ ނަމުގައި އާންމުކުރި ތައުލީމީ ދާއިރާގެ ވައުދުތަކުގެ ތެރޭގައި ވަނީ އިސްލާމް މާއްދާ އިނގިރޭސި ބަހުން ކިޔަވަން ބޭނުންވާ ކުދިންނަށް ސްކޫލް ނިޒާމުގެ ތެރެއިން ފަހިކޮށްދިނުން ހިމަނައިފައެވެ. 

"އުފާވެރި ދިރިއުޅުން" ގެ ދަށުން މައިގަނޑު ހިމެނޭ ފަސް ބަޔަކީ، ތައުލީމާއި ސިއްހަތާއި އަންހެނުން އަދި ކުޑަކުދިންގެ ހައްގުތައް ރައްކާތެރިކުރުމަށް ކޮށްދިނުމުގެ ސިޔާސަތުތަކެވެ. 

މެނިފެސްޓޯގައި އިސްލަމް މާއްދާ އިނގިރޭސިބަހުން އުނގެނުމުގެ ފުރުސަތު ދިނުމަށް ނިންމީ، ރާއްޖެއިން ބޭރަށް ކުދިން ތައުލީމު ހާސިލް ކުރަން ދާއިރު ވެސް އިސްލާމް މާއްދާ އިނގިރޭސިން ކިޔަވައިފައި އޮތުމަކީ ހަޔާތުގެ ކުރިއެރުމަށް މުހިންމު ކަމެއް ކަމަށް ވުމުގެ އިތުރުން، ރާއްޖޭގައި ވެސް "އިންގްލިޝް އޭޒް އަ ފަސްޓް ލޭންގުއޭޖު" ކިޔަވާ ދަރިވަރުންގެ އަދަދު އިތުރު ވަމުން އައުމުގެ ސަބަބުން އެ ކުދިންނަށް ދިވެހި ބަހެކޭ އެއް ވަރަށް އިނގިރޭސި ބަސްވެސް އެނގޭތީ ކަމުގައި އެ ޕާޓީން މައުލޫމާތު ދެއެވެ. 

ރައީސް އިބްރާހިމް މުޙައްމަދު ޞާލިޙު ދެވަނަ ދައުރަކަށް އިންތިޚާބުވެ ވަޑައިގެންފިނަމަ، ކޮށްދެއްވާނެ ކަމަށް ވައުދުވެވަޑައިގަންނަވާ ކަންކަމުގެ މެނިފެސްޓޯ އިއުލާނުކުރަން ފަށައިފައިވަނީ ރޭ ދ ކުޑަހުވަދޫގައި ބޭއްވި އެ މަނިކުފަނުގެ ކެމްޕެއިން ޖަލްސާއިންނެވެ.