ގެދޮރުވެރިޔާ ސްކީމުގެ ދަށުން ފްލެޓަށް އެދި ހުށަހެޅި މީހުންގެ ތެރެއިން ޝަރުތު ހަމަވާ ހުރިހާ ފަރާތްތަކަށް ފްލެޓްދިނުމަށް ސަރުކާރުން ނިންމުމާއެކު އެފަރާތްތަކަށް ދިނުމަށް އިތުރު 3500 ފްލެޓް އެޅުމަށް ނިންމައިފިއެވެ. 

ހައުސިން މިނިސްޓަރީން މިއަދު އިއުލާނު ކުރި ފުލެޓު ލިބޭ މީހުންގެ ވަގުތީ ލިސްޓުގައި 15000ށް ވުރެ ގިނަ މީހުން ފްލެޓަށް ޝަރުތު ހަމަވާއިރު، ޝަރުތު ހަމަވި މީހުންނަށް ފްލެޓު ދިނުމަށްޓަކައ އިތުރު 3،500 ޔުނިޓު އިމާރާތް ކުރާނެ ބަޔަކު ހޯދަމުންދާ ކަމަށާއި އެކަން ވަރަށް އަވަހަށް ހަމަޖެހި މަސައްކަތް ހަވާލުކުރެވިގެން ދާނެ ކަމުގައި، ހައުސިން މިނިސްޓްރީގެ ސްޓޭޓު މިނިސްޓަރު އަދި ފްލެޓު ކޮމިޓީގެ ޗެއާ އަކްރަމް ކަމާލުއްދީން ވިދާޅުވެއެވެ. 

މިސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ފުލެޓުތަކަށް އެދުމަށް މިދިޔަ އަހަރުގެ ޖޫން 26 ގައި ހުޅުވާލި ފުރުސަތުގައި  20،697 މީހުން ފްލެޓަށް އެދި ފޯމު ހުށަހަޅައިފައިވެއެވެ. 

ގެދޮރުވެރިޔާ ސްކީމުގެ ދަށުން ހުޅުމާލޭގެ ދެވަނަ ފިޔަވަހީގައި ސަރުކާރުން އަންނަނީ 18 ބުރީގެ 32 ޓަވަރު އިމާރާތް ކުރަމުންނެވެ. އޭގެތެރޭގައި ހިމެނެނީ ދެ ކޮޓަރީގެ 1،200 ޔުނިޓް، ތިން ކޮޓަރީގެ 2،800 ޔުނިޓެވެ.

އޭގެ އިތުރުން މިމަހުގެ ދެ ވަނަ ދުވަހު ފަހި ދިރިއުޅުން ކޯޕަރޭޝަނުން ވަނީ ހުޅުމާލޭގައި އިތުރު 4،000 ހައުސިން ޔުނިޓު އެޅުމަށް އިންޑިއާގެ ކަލްޕަޓަރު ޕްރޮޖެކްޓްސް އިންޓަނޭޝަނަލް ލިމިޓެޑް (ކޭޕީއައިއެލް) އާ ހަވާލުކޮށްފަ އެވެ. އޭގެ އިތުރުން 2،000 ޔުނިޓު އިމާރާތް ކުރާން ވަނީ ބަޔަކާ ހަވާލުކޮށްފައެވެ.