ޕީޕީއެމް/ޕީއެންސީ ގެ ލީޑަރޝިޕަށް ތަރައްގީގެ ރާސްތާ ދަސްކޮށްދެއްވި ރައީސް އަބްދުالله ޔާމީން ކަމަށާއި، އެ ކޯލިޝަނުގެ ވެރިކަމެއްގައި އެންމެ އިސް މަސައްކަތަކަށްވާނީ ރައީސް ޔާމީނުގެ ތަރައްގީގެ ލެގަސީ ދެމެހެއްޓުން ކަމުގައި ޕީޕީއެމް/ޕީއެންސީ ގެ ރިޔާސީ ކެނޑިޑޭޓް ޑރ މުހައްމަދު މުޢިއްޒު ވިދާޅުވެއްޖެއެވެ. 

ރޭ ޕީޕީއެމް ގެ އޮފީހުގައި ކުުރިއަށްދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުއިއްޒު ވިދާޅުވީ ދިވެހި ގައުމަށް ތަރައްގީ ހޯއްދަވައިދެއްވި ދުރުވިސްނޭ ވެރިއަކި ރައީސް ޔާމީނުކަމަށާއި، އެ ޕާޓީގެ ވެރިކަމެއްގައި މަސައްކަތްވެސް ކުރައްވާނީ ރައީސް ޔާމީނު ގެ މަޝްވަރާއާއި ލަފާފުޅުގެ މަތިން ކަމުގައި ޑރ މުއިއްޒު ވިދާޅުވިއެވެ. 

މީގެ އިތުރުން މީޑިޔާއިން ކުރެއްވި ސުވާލަކަށް ޖަވާބު ދެއްވަމުން މުއިއްޒު ވިދާޅުވީ އެ ޕާޓީގެ ވެރިކަމެއްގައި ހާރިޖީ ސިޔާސަތުތައް އެކުލަވާލާނީ ހުރިހަ ގައުމެއްވެސް ހަމަ ހަމަކޮށް ވަކި ގައުމެއް ބާކީނުކޮށް، އަދި ވަކި ގައުމަކަށް ހާއްސަ އިސްކަމެއް ނުދީ ކަމުގައި ވިދާޅުވެފައެވެ. އަދި މުއިއްޒު ވިދާޅުވީ އިންޑިޔާ ސިފައިން މި ގައުމުގައި ތިބުމަކީ ހައްލު ލިބެންޖެހޭ މައްސަލައެއްކަމަށާއި ދިވެހި ގައުމާއި ދިވެހިންގެ މިނިވަންކަމުގެ ދިފާއުގައި އެ މައްސަލައަށް ހައްލު ހޯއްދަވައިދެއްވާނެ ކަމުގައެވެ. 

ރައީސް ޔާމީނުގެ ކެންޑިޑޭސީގެ މައްސަލައިގައި ސުޕްރީމް ކޯޓުގެ ހުކުމައެކު ޕީޕީއެމް/ޕީއެންސީ ތެރޭގައި ބައިބައިވުން އުފެދުނުކަމަށް ދެކެވުނު ވާހަކަތަކަށް ރައްދުދެއްވައި އެ ޕާޓީގެ ލީޑަރުން ވިދާޅުވީ، ޕީޕީއެމް/ޕީއެންސީ ގެ ކެންޑިޑޭޓު ނިކުމެ އެހުންނެވީ ރައީސް ޔާމީނުގެ ފުރިހަމަ އިތުބާރާއި ކޯލިޝަންގެ ހުރިހާ މެމްބަރުންގެ ފުރިހަމަ ތާއީދާއެކު ކަމުގައި އެ ޕަޓީގެ ލީޑަރޝިޕުން ވަނީ ވިދާޅުވެފައެވެ.