މަންޒަރު ވަރަށް ސާފު ކަމަށާއި ޕީޕީއެމް ޕީއެންސީގެ ލީޑަރޝިޕް އެއްކޮށް ތިއްބެވީ ޑރ މުއިއްޒުގެ ފަހަތްޕުޅުގައި ކަމުގައި ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ.
ރައީސް އަބްދުالله ޔާމިންގެ ކެންޑިޑެސީ މައްސަލައިގައި ސުޕްރިމް ކޯޓުގެ ހުކުމަށް ފަހު ޕީޕީއެމް/ޕީއެންސީގެ ތެރޭގައި ބައިބައިވުންތަކެއް އުފެދުނުކަމުގެ އަޑުތައް ފެތުރުނެވެ.
އަދި އަންގާރަ ދުވަހުގެ ރޭ ޕީޕީއެމް ގެ އޮފީސް ދޮރުމަތީގައި ކުރިއަށް ދިޔަ އެއްވުމުގައި ޑރ މުއިއްޒުއަށް ތާއީދު ނުކުރައްވާ މޭރުމަކުން ޝިޔާމް ވާހަކަދެއްކެވިކަމަށް ބުނެ ނޫސްވެރިއަކު ކުރި ސުވާލަކަށް ޖަވާބުދެއްވަމުން ޝިޔާމް ވިދާޅުވީ އެ ހުރިހާ ބޭފުޅުންވެސް މިރޭގެ ބައްދަލުވުމުގައި ތިއްބެވުމުގެ އެންމެ ބޮޑު ހެއްކަކީ ރާއީސް ޔާމިން ފުރިހަމަ ތާއީދު ޑރ މުއިއްޒުއަށް އޮންނެވުންކަމުގައެވެ.
" އަޅުގަނޑުމެން އެންމެ މިތިބީ ޑރ މުއިއްޒުގެ ފަހަތްޕުޅުގައި އެ ބޭފުޅާ ވެރިކަމަށް ގެނައުމަށް "
ނައިފަރު ދާއިރާގެ މެންބަރު އަހުމަދު ޝިޔާމް
މީގެ އިތުރުން ޝިޔާމް ވިދާޅުވީ އަންގާރަ ދުވަހުގެ ރޭގެ އެއްވުމަކީ ރައީސް ޔާމީން މިނިވަން ކުރުމަށް ގޮވާލާ ބޭއްވި އެއްވުމެއް ކަމަށާއި، އެއީ ޕީޕީއެމް/ޕީއެންސީގެ ކެންޑިޑޭޓް ގެ ކެމްޕެއިން އެއްވުމެއް ނޫން ކަމަށެވެ. އަދި އެ އެއްވުމުގައި ދެއްކެވި ވާހަކަފުޅުތަކަކީ ރައީސް ޔާމީންގެ ގެ ދިފާއުގައި ދެއްކެވި ވާހަކަފުޅުތަކެއް ކަމަށާއި އައިން އެއްވެސް ވާހަކައަކާ އެބޭފުޅުން ޑރ މުއިއްޒުއަށް ކުރައްވާ ތާއީދާއި ގުޅުމެއް ނެތް ކަމަށެވެ.
ޕީޕީއެމް/ޕީއެންސީ ކޯލިޝަންގެ ރިޔާސީ ކެންޑިޑޭޓް ޑރ މުހައްމަދު މުއިއްޒުގެ ރިޔާސީ ކެންޑިޑެސީ ހުށަހެޅިފަހުން ފުރަތަމަ ފަހަރަށް އެ ކޯލިޝަންގެ ލީޑަރޝިޕް އެކުގައި މީޑިޔާތަކުގެ ކުރިމައްޗަށް އައިސް އެ ބޭފުޅުން ޑރ މުއިއްޒުއަށް ތާއީދު ކުރައްވާކަން ރޭ ވަނީ ހާމަ ކޮށްފައެވެ.
Advertisement
This content is created and paid for by advertisers and does not involve Voice Journalists
