އިދިކޮޅުު ލީޑަރ، ރައީސް އަބްދުالله ޔާމީން އަބްދުލްގައްޔޫމް ޖަލުން ނެރެން ޖެހޭނެ ކަމަށާ، އެމަނިކުފާނު ޖަލުން ނެރުމަށް ޕީޕީއެމްގެ ލީޑަރުންނާއިއެކު މަގުމައްޗަށް ނުކުންނަވާނެ ކަން، ރައްޔިތުންގެ މަޖިލީހުގެ ރައީސް އަދި އެމްޑީޕީގެ ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރޭ ޏ. ފުވައްމުލަކު ގައި ބޭއްވި، ޑިމޮކްރެޓްސްގެ ކެންޑިޑޭޓް އިލްޔާސް ލަބީބުގެ ކެމްޕެއިން ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މިސަރުކާރުން ރައީސް ޔާމީނާމެދު އަމަލު ކުރައްވާފައިވާ ގޮތަކީ އެންމެންގެ ކަންބޮޑުވުން އޮތް ކަމެއް ކަމަށެވެ.
އެގޮތުން، އެމްއެމްޕީއާރްސީގެ ވައްކަމުގައި 273 މީހުން ހިމެނޭ ކަން އެނގޭއިރު، އެ މައްސަލާގައި ހަމައެކަނި ރައީސް ޔާމީން ހިފާ ހައްޔަރުކޮށް ފަސް އަހަރު ވަންދެން ޖަލުގައި ގެންގުޅެފައިވާ ކަމަށާ، އެއީ އިންސާފުގެ ގޮތުގައި ބަލައެއް ނުގަނެވޭނެ ކަމަށް ނަޝީދު ވިދާޅުވި އެވެ. އެހެންކަމުން ރައީސް ޔާމިން މިހާރުން މިހާރަށް ޖަލުން މިނިވަންކުރަން ޖެހޭ ކަމަށް އެމަނިކުފާނު ވިދާޅުވެއްޖެއެވެ.
މިއާއެކު ނަޝީދު ވިދާޅުވީ މީހުން ޖަލުން ނެރުމަކީ އެމަނިކުފާނު އެމްޑީޕީގައި އުޅުއްްވިއިރު ފައްކާކޮށްފައިވާ "ނިޒާމެއް" ކަމަށާ، ރައީސް ޔާމީންވެސް ދާދި އަވަހަށް ޖަލުން މިނިވަން ވާނެ ކަމަށެވެ. އަދި އެކަމަށްޓަކައި ޕީޕީއެމްގެ ބޭފުޅުންނާއެކު މަގު މައްޗަށް ވެސް ނުކުންނަވާނެ ކަމަށް ވިދާޅުވިއެެވެ.
"އަޅުގަނޑުމެންނަށް އިނގޭ ހަގީގަތުގައި މީހުން ޖަލުން ނެރެން. އެމްޑީޕީގައި އަޅުގަނޑުމެން އުޅުން އިރުގައި ފައްކާކޮށްފައި އޮތް ނިޒާމެއް އެއީ ޖަލުން ނެރުމުގެ ނިޒާމު. އަޅުގަނޑު އަޅުގަނޑުގެ ރަހްމަތްތެރި ޕީޕީއެމް މެންބަރުންނަށް ޔަގީންކޮށް އަރުވަން. އިރާދަކުރެއްވިއްޔާ ދެން ގިނަ ދުވަހަކު ރައީސް ޔާމީން ދެން ޖަލުގައި ނުހުންނަވާނެ. އަޅުގަނޑުމެން އިހްތިޖާޖުގައި ވެސް ބައިވެރިވާނަން. ތިބޭފުޅުންނާއެކުގައި މަގުމަތީގައިވެސް ތިބޭނަން. ބައިނަލްއަގްވާމީ ފަރާތްތަކާއެކުގައި ވާހަކަދައްކަންވެސް ދާނެ. އެކިއެކި ބައިނަލްއަގްވާމީ ވަކީލުން ދިވެހިރާއްޖެ ވަޑައިގެން ވަކާލާތުވެސް ކުރައްވާނެ. ރައީސް ޔާމީން އިރާދަކުރެެއްވިއްޔާ އަޅުގަނޑުމެން ޖަލުން ނެރޭނަން،"
މަޖިލީހުގެ ރައީސް މުހައްމަދު ނަޝީދު
މީގެ އިތުރުން ރައީސް ނަޝީދު ވަނީ ކުރިއަށް އޮތް ރިޔާސީ އިންތިހާބުގައި "ގޯހެއް" ނުހެދުމަށް ޕީޕީއެމްގެ މެންބަރުންނަށް ނަސޭހަތްތެރިވެފައެވެ. އެގޮތުން ރައީސް ސޯލިހަށް ދެވަނަ ބުރެއްގައި ވޯޓްދޭން ޖެހޭނެ އެއްވެސް ގޮތަކަށް އަމަލު ނުކުރެއްވުމަށް ވަނީ އެދި ވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
