ހާމަކަން ބޮޑު ގޮތެއްގައި ކެމްޕޭނުކޮށް ޚިޔާލު ފާޅުކުރުމަށް ޖާގަ ދީފައިވާ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ ގއ. އަތޮޅަށް ކުރައްވަމުންގެންދަވާ ކެމްޕޭނު ދަތުރުފުޅުގައި އެއަތޮޅު ކޮލަމާފުއްޓަށް ވަޑައިގެން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

"2018 ގެ ކެމްޕޭނުގައި އަޅުގަނޑުމެންނަށް ތަފާތު އުނދަގޫތައް ގޮންޖެހުންތައް ކުރިމަތިވަމުން ދިޔަ، މިރަށުގެ ރައްޔިތުންނަށް ވަރަށް ސާފުކޮށް އެކަން ހާމަވާނެ، ވޯޓުލާން އޮތް ދުވަހުގެ ކުރީ ދުވަހު އަޅުގަނޑުމެންގެ ކެމްޕޭނުގައި ހަރަކާތްތެރިވާ 18 އެކްޓިވިސްޓަކު ހައްޔަރުކުރީ، ވޯޓު ލެވެނެ ގޮތެއް ނުވެފަ ތިބީ، އަޅުގަނޑުމެން އެއާއި ދޭތެރޭގައި މިއަދު ވިސްނަންވާނެ" ރައީސް ޞާލިޙް ވިދާޅުވިއެވެ.

Advertisement

ރައީސް ޞާލިޙް ވިދާޅުވީ ވޯޓުން ނިންމާ ނިންމުމެއްގެ ސަބަބުން އެކަން އަނެއްކާވެސް އިއާދަ ވެދާނެ ކަމަށެވެ.

މިކޯލިޝަންގެ ވެރިކަން ކުރިއަށް ދާއިރު އިންތިޚާބުގައި ވާދަކުރާއިރު އިދިކޮޅު ފަރާތްތަކާއި ދޭތެރޭގައި އެފަދަ އަނިޔާވެރި ޢަމަލުތަކެއް ނުހިންގާނެ ކަމަށް ރައީސް ވިދާޅުވިއެވެ.

މީގެ އިތުރުން ރައީސް ވިދާޅުވީ ސާފުކޮށް ކެމްޕޭނު ކުރުމަށް 8 ނުވަތަ 12 ކެންޑިޑޭޓުން ކުރިމަތިލެއްވިޔަސް އެފުރުސަތު އޮންނާނެ ކަމަށެވެ.

ރައީސް ޞާލިޙް ވިދާޅުވީ ކޮލަމާފުއްޓަކީ އެމްޑީޕީގެ އިސްލާޙީ ހަރަކާތުގައި ވަރަށް އިސްސަފުގައި ހަރަކާތްތެރިވާ ރައްޔިތަކު އުޅޭ ރަށެއް ކަމަށެވެ. އަދި ކޮލަމާފުށީގެ ރައްޔިތުން އޭރުވެސް އަދި މިހާރުވެސް ބޭނުންވަނީ ހަމަޖެހުމާއި ސުލްޙަ ކަމަށް ރައީސް ވިދާޅުވިއެވެ.

ރައީސް ވިދާޅުވީ ކޮލަމާފުށިންވެސް ފުރިހަމަ އަޤްލަބިއްޔަތު އެމްޑީޕީ ކޯލިޝަނަށް ލިބޭނެ ކަމުގެ ޔަޤީންކަން އެބައޮތް ކަމަށެވެ.

ރައީސް ޞާލިޙާއި އެމަނިކުފާނުގެ ކެމްޕޭނު  ޓީމުން ކޮލަމާފުއްޓަށް ކުރެއްވި ޒިޔާރަތުގައި ރައީސް ޞާލިޙް ވަނީ ކޮލަމާފުށީ ވޮލީކޯޓު ހުޅުވައިދެއްވައިފައެވެ.