ރާއްޖޭގެ ދަރިންނަށް ތައުލީމު ދޭން ބޭނުންނަމަ، ޢިލްމު ހުރި ޢިލްމުވެރި ވެރިއަކު ރާއްޖޭގެ ވެރިކަމަށް އައްޔަނު ކުރަން ޖެހޭ ކަމުގައި ޕީއެންސީގެ ނައިބް ރައީސް، އާދަމް ޝަރީފް އުމަރު ވިދާޅުވެއްޖެއެވެ.
އޭނާ މިފަދައިން ވިދާޅުވީ، ޕީޕީއެމްގެ "ދިވެހީންގެ ޖަގަހަ" އަލިމަސް ކާނިވަލުގައި ހުޅުވުމަށް މިރޭ ބޭއްވި ރަސްމިޔާތުގައި ވާހަކަފުޅު ދައްކަވަމުންނެވެ.
އާދަމް ޝަރީފްގެ ވާހަކަފުޅުގައި ވަނީ، މި އަހަރުގެ ރިޔާސީ އިންތިހާބުގައި އަށް ކެނޑިޑޭޓެއް ދިވެހިންނަށް ފެންނަން އެބަ ތިބި ކަމަށާއި އެހެން ނަމަވެސް އޭގެ ތެރެއިން އެންމެ ޢިލްމީ ޤާބިލް ބޭފުޅަކީ ޑރ މުހައްމަދު މުއިއްޒުކަމުގައި ވިދާޅުވެފައެވެ. އަދި އެ ބޭފުޅުންގެ ތެރެއިން ހަމައެކަނި ޕީއެޗްޑީ ހޯލްޑަރަކީވެސް ޑރ މުހައްމަދު މުޢިއްޒު ކަމުގައި ވިދާޅުވެފައެވެ.
ރާއްޖޭގެ ދަރިންނަށް ތައުލީމު ދޭން ބޭނުންނަމަ، ޢިލްމު ހުރި ޢިލްމުވެރި ވެރިއަކު ރާއްޖޭގެ ވެރިކަމަށް އައްޔަނު ކުރަން ޖެހޭ، އެ ބޭފުޅަކީ ޑރ މުހައްމަދު މުއިއްޒު
އާދަމް ޝަރީފް ޢުމަރު
އާދަމް ޝަރީފް ވިދާޅުވީ މިހާރު ރާއްޖޭގައި ހިނގަމުން މިދާ ވެރިކަމުގެ ފުރަތަމަ ދުވަހުން ފެށިގެން ވެސް ފެންނަމުން މިދަނީ ކަޅުކަމާއި އަނދިރިކަން ކަމުގައެވެ.
އެގޮތުން އެމްޑީއެން އިން އިސްލާމްދީނާއި ދެކޮޅަށް ރިޕޯޓު ނެރުމާއި އެފަދަ ކަންކަމުގައި ޝާމިލުވާ ފަރާތްތަކުން ސަރުކާރުގެ އިސް މަގާމުތަކުގައި ތިބި ކަމާއި އެފަރާތްތަކަށް އެކި އެކި މަގާމްތައް މި ސަރުކާރުން ދިން ކަން ފާހަގަ ކުރައްވައި އާދަމް ޝަރީފް ވިދާޅުވީ، ރައީސް ޔާމީނުގެވެސް ފުރަތަމަ ސިޔާސަތު ކަމުގައިވާ އިސްލާމީ ޝަރީޢަތް ތަންފީޒުކުރުމުގެ މަސައްކަތް ޑރ މުއިއްޒު ކުރައްވާނެ ކަމާމެދު ޝައްކެތް ނުކުރައްވާކަމުގައެވެ.
ސިޔާސީ ހައްޔަރެއްގައި ރައީސް ޔާމީނު ބަހައްޓަވާކަމަށް ތުހުމަތު ކުރައްވައި އެމަނިކުފާނު ދޫކޮށްލެއްވުމަށް ގޮވާލައްވަމުން އާދަމް ޝަރީފް ވިދާޅުވީ އެ ޕާޓީގެ މިރޭގެ ޖަލްސާއަށް ގިނަ އަދަދެއްގެ ޒުވާނުން ހާޒިރުވެ ތިބިކަމުން ސާބިތު ކޮށްދެނީ، ޕީޕީއެމް/ޕީއެންސީ ކޯލިޝަންގެ ވެރިކަމެއްގައި ޒުވާނުންނަށް އިސްކަމެއްދޭނެ ކަމަށާއި ސަރުކާރު ހިންގުމުގައި ޒުވާނުންގެ ހިއްސާ ބޮޑުވާނެ ކަމުގައެވެ.
ޕީޕީއެމްގެ ރިޔާސީ ކެންޑިޑޭޓް ކުރީގެ ރައީސް އަބްދުالله ޔާމީނަށް ރިޔާސީ އިންތިހާބުގައި ވާދަކުރުމުގެ ފުރުސަތު ގެއްލުމުން ޕީއެންސީގެ ކެންޑިޑޭޓެއްގެ ގޮތުގައި އެ ޕާޓީ ހިމެނޭ ކޯލިޝަނުން ވާދަކުރައްވަނީ، މާލޭ ސިޓީގެ މޭޔަރުކަންވެސް މިހާރު ކުރައްވަމުން ގެންދަވާ ޑރ މުހައްމަދު މުޢިއްޒުއެވެ.
މިހާރު މާލޭގެ މޭޔަރު ކަމުގެ މަގާމުގައި ހުންނެވި މުއިއްޒު ވަނީ ކުރީގެ ރައީސް ޑރ.މުހައްމަދު ވަހީދުގެ ސަރުކާރާއި އަދި ކުރީގެ ރައީސް ޔާމީންގެ ސަރުކާރުގައި ހައުސިން މިނިސްޓަރުކަން ކުރައްވާފައެވެ.
Advertisement
This content is created and paid for by advertisers and does not involve Voice Journalists
