ވެރިކަން ލިބިވަޑައިގެންފިނަމަ ރާއްޖޭގެ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލަ ތާ އަބަދަށް ހައްލު ކޮށްދެއްވާނެ ކަމަށް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

"ދިވެހީންގެ ޖަގަހަ" ނަމުގައި މުއިއްޒުގެ ކެމްޕެއިން ޖަގަހަ ހުޅުވުމަށް ރޭ ބޭއްވި ބައްދަލްވުމުގައި ވާހަކަފުޅު ދައްކަވަމުން މުއިއްޒު ވިދާޅުވީ ރާއްޖެ އަށް ކުރިމަތިވެފައިވާ ގިނަ މައްސަލަތަކުގެ އަސްލަކީ ބޯހިޔާވަހިކަމުގެ ދަތިކަން ނަމަވެސް، ކުރީގެ ރައީސް ޔާމީން އަބްދުލްގައްޔޫމް ގެ ވެރިކަން ނިމުމާއެކު އެކަން ހައްލު ކުރުމުގެ މަސައްކަތް ހުއްޓުމަކަށް އައިސްފައިވާ ކަމަށެވެ. 

އަދި މިސަރުކާރުން ބޯހިޔާވަހިކަމުގެ މައްސަލަ ހައްލު ކޮށްދިނުމަށް ކަމަށް ބުނެ ދީފައިވާ ގޯއްޗާއި ފުލެޓް ތަކުގެ ތެރެއިން ބޮޑުބަޔަކީ ވުޖޫދުގައި ވެސް އަދި ނެތް ތަންތަން ކަމަށް ވިދާޅުވެ މުއިއްޒު ވަނީ މިސަރުކާރުން ގޯއްޗާއި ފްލެޓް ދިން ގޮތަށް ވަރަށް ބޮޑަށް ފާޑުވިދާޅުވެފައެވެ.

"މި ސަރުކާރުން އެބަ ބަހާ ފްލެޓާއި ގޯއްޗާއި މިހެން ގޮސް ވަރަށް ގިނަ އެއްޗެހި. ބަހާއިރު އޭގެ 70 އިންސައްތަ ދުނިޔެއަކު ނެތް. އިއްޔެގަ ވެސް ނެރެފި ލިސްޓެއް. ނެރުނު އިރުގައި އޭގެ ބޮޑު އިންސައްތައެއް އަދި ނުވެސް އަޅާ. ބިންގާ ވެސް ނާޅާ. ޕްލޭނެއް ވެސް ނެތް. ބަޖެޓެއްވެސް ނެތް. އެކަމަކު ލިސްޓް ހަދައިފި، ލިސްޓް ނެރެފި،" މުއިއްޒު ވިދާޅުވި އެވެ.

މުއިއްޒު ވިދާޅުވީ މި ސަރުކާރުން ފުލެޓްތަކާއި ގޯތި ދިނުމަށް ނިންމާފައިވާ މީހުންގެ އަތުން އެ އަތުނުލާނެކަމަށެވެ. އަދި އެމީހުންނަށާއި ދެން ތިބި މީހުންނަށް ވެސް އެ މައްސަލަ ހައްލު ކޮށްދޭން މަސައްކަތް ކޮށްދެއްވާނެ ކަމަށް އޭނާ ވިދާޅުވި އެވެ. 

މުއިއްޒުގެ ވިދާޅުވީ، އޭނާގެ ސަރުކާރެއްގައި ގެދޮރުވެރިކަމަކީ އަސާސީ ހައްގެއް ކަމަށް ދެކި މަސައްކަތް ކުރާނީ ގެދޮރުވެރިކަމުގެ މައްސަލަ ތާއަބަދަށް ހައްލު ކުރެވޭނެ މަގުން ކަމަށެވެ.

"އިރާދަކުރެއްވިއްޔާ ބޯހިޔާވަހިކަމުގެ މި މައްސަލަ އަޅުގަނޑުމެން ތާއަބަދަށް ހައްލު ކޮށްދޭނަން،" މުއިއްޒު ވިދާޅުވި އެވެ.

މިއާއެކު މުޢިއްޒު ވިދާޅުވީ ފަސް އަހަރުގެ ވެރިކަން ނިމޭއިރު ބޯހިޔާވަހިކަން ނެތް އެއްވެސް ރައްޔިތަކު ނުހުންނާނެ ކަމަށެވެ. 

މުއިއްޒު ވަނީ އޭނާގެ ވެރިކަމެއްގައި ބޯހިޔާވަހިކަމުގެ މައްސަލަ ހައްލު ކުރުމަށް ގެންގުޅުއްްވާނެ ބައެއް ޕްލޭންވެސް ހިއްސާ ކުރައްވާފައެވެ.

އެގޮތުން ވިދާޅުވީ ހުޅުމާލޭގެ ހިޔާ އަވަށާއި ގުޅިފަޅާއި ގިރާވަޅުފަޅު އަދި ފުށިދިއްގަރު ފަޅަކީ ބޯހިޔާވަހިކަމާއި ގެދޮރުވެރިކަމުގެ މައްސަލަ ހައްލުކޮށްދެއްވޭނެ ތަންތަން ކަމަށެވެ. 

އެހެނީ، ފުށިދިއްގަރުފަޅު އެކަނިވެސް 1600 އަކަފޫޓްގެ 11،000 ގޯއްޗާއި 1400 އަކަފޫޓްގެ 20،000 ފްލެޓް އެޅޭނެ ބިން ލިބޭނެ ކަމަށާ، އަދި ގުޅިފަޅުގައި 5،000 ގޯއްޗާއި 15،000 ފްލެޓް އެޅޭނެ ބިން ލިބޭނެ ކަމަށް އޭނާ ވިދާޅުވި އެވެ.