ރައީސް އިބްރާހިމް މުހައްމަދު ޞާލިހުގެ އަނިޔާވެރިކަން ހައްދެއް ނެތް މިންވަރަށް ގޮއްސިކަމަށާއި އޭގެ ޓާގެޓަކަށް ވެ ވަޑައިގަތީ ރައީސް ޔާމީނުކަމަށް ވިދާޅުވެ ހުރިހާ ފަރާތްތަކުންވެސް އެކުވެރިކަމާއެކު މުއިއްޒު ވެރިކަމަށް ގެނައުމަށް މަސައްކަތް ކުރުމަށް ޑރ މުހައްމަދު ޖަމީލް ގޮވާލައްވައިފިއެވެ.
ރައީސް ޔާމީނުގެ ވަކީލުންގެ ޓީމުގައި އިސްކޮށް ހިމެނިވަޑައިގަންނަވާ ޑރ ޖަމީލު މުއިއްޒުއަށް ތާއީދު ކުރައްވާކަން ހަމަކުރައްވައިފައި މިވަނީ މިއަދު ކުރެއްވި ޓުވީޓެއްގައެވެ.
މިވަގުތު އެންމެން ގުޅިގެން އިބޫނޫން ގޮތެއް ހޯދުމަށް ޑރ. މުޢިއްޒު އިންތިޚާބު ކުރުމަށް ހީވާގިކޮށް މަސައްކަތް ކުރުމަށް އިލްތިމާސްކުރަން.
ޑރ މުހައްމަދު ޖަމީލް އަހުމަދު
މި އަހަރުގެ ރިޔާސީ އިންތިހާބުގައި ވާދަކުރެއްވުމަށް ރައީސް ޔާމީންގެ ކެންޑިޑެސީ ހުށަހެޅި އިރު ޑރ ޖަމީލަކީ އެ މަނިކުފަނުންގެ ރަނިންގްމޭޓެވެ. އެހެންނަމަވެސް ރައީސް ޔާމީނަށް ރިޔާސީ އިންތިހާބުގެ ވާދަ ނުކުރެވޭނަކަމަށް އިލެކްޝަންސް ކޮމިޝަނުން ކަނޑައެޅީ ރަނގަޅަށް ކަމުގައި ސުޕްރީމް ކޯޓުން ކަނޑައެޅުމާއެކު އިންތިހާބުގައި ވާދަކުރުމުގެ ފުރުސަތު ޔާމީނަށް ބަންދުވީއެވެ.
އެ ދަނޑިވަޅުގައި ޕީޕީއެމް/ޕީއެންސީގެ ކެނޑިޑޭޓެއްގެ ގޮތުގައި މުއިއްޒު ނެރުމަށް ނިންމުމާއެކު އެ ކޯލިޝަނުގެ ތެރޭގައި ބައިބައިވުންތަކެއް އުފެދުނުކަމުގެ އަދުތައް ފެތުރުނެވެ. އެހެންނަމެވެސް ޑރ ޖަމީލު ހިމެނޭހެން އެ ކޯލިޝަނުގެ އިސްކޮށް ހަރަކާތްތެރިވާ ހުރިހާ އިސްވެރިން މިހާރުވަނީ ޑރ މުއިއްޒުއަށް ތާއީދުކުރައްވާކަން ހަމަކުރައްވައިފައެވެ.
Advertisement
This content is created and paid for by advertisers and does not involve Voice Journalists
