ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިޚާބުގައި، ޕީޕީއެމް/ޕީއެންސީ ކޯލިޝަންގެ ފަރާތުން ވާދަކުރައްވާ ޑރ. މުހައްމަދު މުޢިއްޒު ގެ ތަރުޖަމާނަކަށް ޕީޕީއެމްގެ ސެކެރެޓަރީ ޖެނެރަލް، މުހައްމަދު ޠޮލާލް ހަމަޖައްސަވައިފި އެވެ. 

މުޢިއްޒުގެ ތަރުޖަމާނަކަށް ޠޮލާލް ހަމަޖައްސާފައިވާކަން އިއުލާނުކޮށް ޕީޕީއެމުން ކޮށްފައިވާ ޓުވީޓެއްގައި ވަނީ ތޮލާލްއަށް މަރުހަބާ ކިޔާފައެވެ. 

ޕީޕީއެމްގެ ރިޔާސީ ކެންޑިޑޭޓްގެ ގޮތުގައި އެ ޕާޓީގެ ރައީސް، ރައީސް ޔާމީން އަބްދުލްގައްޔޫމް ކަނޑައެޅުމުން، އެމަނިކުފާނުގެ އިންތިހާބީ އޭޖެންޓްގެ ގޮތުގައި ހަމަޖެއްސެވީވެސް ތޮލާލެވެ. 

Advertisement

ޑރ. މުހައްމަދު މުއިއްޒު ގެ ތަރުޖަމާނަކަށް ތޮލާލް ހަމަޖައްސަވާފައި ވާއިރު، އޭނާގެ ކެމްޕެއިން މެނޭޖަރަކަށް ކުރީގެ ޑިރެކްޓާ އޮފް އޮޕަރޭޝަންސް ކެޕްޓަން މުހައްމަދު އަމީން، އަދި ޑެޕިއުޓީ ކެންޕެއިން މެނޭޖަރަކަށް ކުރީގެ ހެލްތު މިނިސްޓަރު އަބްދުالله ނާޒިމް އިބްރާހިމް ވަނީ ހަމަޖައްސަވާފައެވެ.

މީގެ އިތުރުން މުއިއްޒުގެ އެސިސްޓެންޓް ކެމްޕެއިން މެނޭޖަރ އަކަށް މަޑަވެލި ދާއިރާގެ ކުރީގެ މެންބަރު މުއާޒް މުހައްމަދު ރަޝީދު ވެސް ވަނީ ހަމަޖައްސަވާފައެވެ. 

ޕީއެންސީގެ ކެނޑިޑޭޓެއްގެ ގޮތުގައި މުއިއްޒު އިންތިހާބުގައި ވާދަ ކުރައްވާއިރު، އޭނާގެ ކެންޑިޑޭޓު ނަންބަރަކީ 4 އެވެ.