އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހުގެ ހުވަދޫ އަތޮޅަށް ކުރައްވާ ކެމްޕޭނު ދަތުރުފުޅުގައި އެ އަތޮޅު ވިލިނގިއްޔަށް ވަޑައިގަންނަވާތީ، އެމަނިކުފާނާ ދެކޮޅަށް އަޑުއުފުލަން އެއްވެ ތިބި އެ ރަށުގެ އިދިކޮޅު ސަޕޯޓަރުން ހަމަނުޖެހުން ހިންގީ އިދިކޮޅުު ލީޑަރޝިޕުން ހިތްވަރުދީގެން ކަމަށް ރައީސް ޞާލިހް ގެ ކެންޕެއިން ޓީމުން ތުހުމަތު ކޮށްފިއެވެ. 

އިއްޔެ ހަވީރު ރައީސް އެ ރަށަށް ވަޑައިގެންނެވުމުގެ ކުރިން، އެމަނިކުފާނާ ދެކޮޅަށް އަޑުއުފުލަން ގިނަ އަދަދެއްގެ ޕީޕީއެމް ސަޕޯޓަރުން އެ ރަށުގެ ހުޅަނގު ފަރާތު ބަނދަރު މައްޗަށް އެއްވެ ތިއްބެވެ.

ރައީސް ވަޑައިގެންނެވުމުގެ ކުޑަވަގުތު ކޮޅެއްގެ ކުރިން، ފުލުހުން ދަމާފައިވާ ޓޭޕުތައް ކަނޑާލައި، ކުރިއަށް ޖެހެން މަސައްކަތް ކުރުމުން ފުލުހުން ވަނީ އެ މީހުން ފަހަތަށް ޖައްސައިފަ އެވެ.

Advertisement

ފަހަތަށް ޖެއްސުމުގެ ތެރެއިބް ސަޕޯޓަރުންގެ ތެރެއިން ބަޔަކާއި ފުލުހުންނާ ދެމެދު ވަނީ ކުރިމަތިލުންތަކެއްވެސް ހިނގާފައެވެ. އަދި އެ ހަމަނުޖެހުމުގެ ތެރެއިން އެ ތަނުގައި ސްޕީކަރުތައް ބަހައްޓާފައިހުރި ލޮރީއެއްގެ ތެރެއިން ތިން މީހަކު ވަނީ ހައްޔަރުކޮށްފަ އެވެ.

އެކަމާއި ގުޅިގެން، ރައީސް ޞާލިހު ގެ ކެންޕެއިން ޓީމުން ނެރުނު ނޫސް ބަޔާނެއްގައި ވަނީ، އެއީ އެމަނިކުފާނުގެ ކެމްޕެއިނަށް ހުރަސްއެޅުމަށް ހިންގި ހަރަކާތެއް ކަމަށް ބުނެ އެކަން ހަރުކަށި އިބާރާތުން ކުށްވެރިކޮށްފައެވެ. 

އަދި ހުރިހާ ކެންޑިޑޭޓުންނަށް ވެސް މިނިވަންކަމާއެކު ކެންޕެއިން ކުރުމުގެ ފުރުސަތު ސަރުކާރުންދެމުންދާ ކަމަށާ، އެހެންނަމަވެސް ކެންޕެއިން ކުރަންވާނީ ވަކި ހުދޫދެއްގެ ތެރެއިން، އަމާންކަމާއި އެކު، އެއްބަޔަކު އަނެއް ބައެއްގެ ތަކެއްޗަށް ގެއްލުން ނުދީ ކަމަށް ރައީސް ޞާލިހް ގެ ކެންޕެއިން ތަރުޖަމާނު މާރިޔާ އަހުމަދު ދީދީވެސް ވިދާޅުވެފައިވާ ކަމަށް އެ ބަޔާނުގައި ވެއެވެ. 

"ގއ. ވިލިނގިލީ ޕީޕީއެމް ސަޕޯޓަރުން އަނިޔާވެރިވެ ހަމަނުޖެހުން ހިންގާފައިވަނީ ޕީޕީއެމްގެ ލީޑަރޝިޕުން ހިތްވަރުންދީގެން ކަމަށް އިބޫއަސްލަމް 2023 ކެންޕެއިން ޓީމުން ގަބޫލުކުރަމެވެ. އަދި ހުރިހާ ޕާޓީ އަކުންވެސް ލީޑަރޝިޕް ދައްކައި، ޑިމޮކްރަސީގެ ހަމަތަކާއި އުސޫލުތަކުގެ މަތީން، އަމާންކަމާއިއެކު ކެންޕެއިން ކުރުމަށް ގޮވާލަމެވެ." ރައީސް ޞާލިހުގެ ކެންޕެއިން ޓީމުން ނެރެފައިވާ ބަޔާނުގައި ވެއެވެ.