ޕީޕީއެމް/ޕީއެންސީން ރިޔާސީ އިންތިހާބު ކަމިޔަބުކުުރުމަށްޓަކައި ފަށައިފައިވާ ދަތުުރުގެ މައިގަނޑު އަމާޒަކީ ރައީސް އަބްދުﷲ ޔާމީން އަބްދުލް ޤައްޔޫމް މިނިވަންކޮށް އެ މަނިކުފާނުގެ ސިޔާސަތުތައް ދެމެހެއްޓުން ކަމުގައި ޕީއެންސީގެ ރައީސް އަދި ޕީޕީއެމް/ޕީއެންސީ ކޯލިޝަން ހިންގެވުމާއި ވަގުތީގޮތުން ޙަވާލުވެ ހުންނެވި އަބްދުއްރަޙީމް އަބްދުﷲ (އަދުރޭ) ވިދާޅުވެއްޖެއެވެ. 

އަބްދުއްރަޙީމް މިފަދައިން ވިދާޅުވީ ޕީޕީއެމް/ޕީއެންސީ ކޯލިޝަންގެ ފަރާތުން ރިޔާސީ އިންތިހާބުގައި ވާދަކުރައްވާ ޑރ މުޙައްމަދު މުޢިއްޒުއާއި ރަނިންގްމޭޓް ހުސައިން މުޙައްމަދު ލަތީފްގެ ކެމްޕެއިނަށް ހދ އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގައި އެ އަތޮޅު ހަނިމާދޫއަށް ވަޑައިގެން އެ ރަށުން އެ ބޭފުޅުންނަށް ތާއީދުކުރައްވާ ފަރާތްތަކާއި ބައްދަލު ކުރައްވައި ދެއްކެވި ވާހަކަފުޅުގެ ތެރެއިންނެވެ.  

އަބްދުއްރަހީމްގެ ވާހަކަފުޅުގައި ވަނީ އެ ބޭފުޅުންގެ ސަރުކާރުގައި އެހެންގައުމެއްގެ ސިފައިން ދިވެހި ފަސްގަނޑުގައި ވަޒަންވެރިވުމުގެ ފުރުސަތެއް ނުދެއްވާނެކަމުގައި ވިދާޅުވެފައެވެ. 

މީގެ އިތުރުން ރައީސް ޔާމީނުގެ ވެރިކަމުގައި ހިންގެވި އުމްރާނީ ތަރައްގީގެ މަޝްރޫއުތަކުގައި އަމަލީ ގޮތުން ބައިވެރިވެ ވަޑައިގަންނަވާ އެ ކަމުގެ އިލްމާއި ތަޖުރިބާ ހުންނެވި ބޭފުޅެއްގެ ގޮތުގައި މުއިއްޒު ސިފަކުރައްވަމުން އަބްދުއްރަހީމް ވިދާޅުވީ، ބޮދު ތިލަދުންމައްޗަށް ނިސްބަތްވެ ވަޑައިގަންނަވާ ބޭފުޅޭއްގެ ހައިސިއްޔަތުން ޑރ މުޢިއްޒު ވެރިކަމަށް ވަޑައިގަތުން ވެގެންދާނީ ބޮޑު ތިލަދުންމައްޗަށް ލިބިގެންދަނެ ޝަރަފެއްކަމުގައެވެ. 

އެހެންކަމުން ކުރިއަށް އޮތް 25 ވަރަކަށް ދުވަހު އެންމެ ވަގުތު ކޮޅެއްވެސް ނަގައި ނުލައްވައި ހަނިމާދޫގެ ފުރިހަމަ މެޖޯރިޓީ ޑރ މުއިއްޒުއަށް ހޯއްދަވައިދެއްވުމަށް މަސައްކަތް ކޮށްދެއްވުމަށް ހަނިމާދޫ ރައްޔިތުންގެ އަރިހުގައި އަބްދުއްރަހީމް ވަނީ އެދިވަޑައިގެންފައެވެ. 

ރިޔާސީ އިންތިހާބުގެ ކެމްޕެއިންގައި ޕީޕީއެމް/ޕީއެންސީ ކޯލިޝަނުން ބޮޑު ތިލަދުންމައްޗަށް ކުރަމުންގެންދާ ދަތުރުގައި ހަނިމާދޫގެ އިތުރުން ނޮޅިވަރަމާއި ކުޅުދުއްފުށްޓަށް ވަޑައިގަތުމަށް ހަމަޖެހިފައިވާއިރު މާދަމާ މަކުނުދޫއާއި ހޯރަފުށީގެ އިތުރުން އިހަވަންދޫއަށް ވަޑައިގަތުމަށްވަނީ ހަމަޖެހިފައެވެ. އަދި ހޯމަ ދުވަހު ހއ އުތީމާއި ވަށަފަރުގެ އިތުރުން ކެލާއަށާއި ބާރަށް އަދި ދިއްދޫއަށް ދަތުރުކުރާނެއެވެ.