ވެރިކަން ލިބިވަޑައިގެންފިނަމަ ރ އަތޮޅު ފައިނުގައި އެއަރޕޯޓެއް އަޅުއްވައިދެއްވާނެކަމަށް އެމްއެންޕީގެ ރިޔާސި ކެނޑިޑޭޓް ކަރނަލް ރިޓަޔަރޑް މުހައްމަދު ނަޒިމް ވިދާޅުވެއްޖެއެވެ.
ރިޔާސީ ކެމްޕެއިންގައި "އުޖާލާ އަމާން ރާއްޖެ" ގެ ނަމުގައި ރ ދުވާފަރުގައި ބޭއްވި ކެމްޕެއިން ޖަލްސާގައި ވާހަކަ ދައްކަވަމުން ނާޒިމް ވިދާޅުވީ، ފައިނު އެއަރޕޯޓަކީ އެ ސަރަހައްދުގެ ތަރައްގީއަށް މުހިއްމު އެެއަރޕޯޓެއް ކަމުގައި ވިދާޅުވެފައެވެ.
މީގެ އިތުރުން އެމްއެންޕީގެ ވެރިކަމެއްގައި ދުވާފަރު ހިމެނޭ ސަރަހައްދަށް ގެންނަ އިންވެސްޓްމެންޓް ބޭންކުން އެކި ކަންކަމަށް ލޯނު ބޭނުންވާ މީހުންނަށް އެކަން ހަމަޖެހިގެންދާނެ ކަމަށް ނާޒިމު ވިދާޅުވިއެވެ. އަދި އާންމުން ގެދޮރު ހެދުމަށް ސަރުކާރުން ގެރެންޓީ ދޭނެ ކަމަށް ވިދާޅުވާ ވިދާޅުވުން ރޭގެ ޖަލްސަގައިވެސް ނާޒިމް ތަކުރާރުކުރެއްވިއެވެ.
ކުރީގެ ރައީސް ޔާމީންގެ ވެރިކަމަމުގައިވެސް ފައިނުގައި އެއަރޕޯޓެއް އެޅުމަށް ނިންމިއެވެ. އެހެން ނަމަވެސް ފައިނުގައި އެއަރޕޯޓެއް އަޅައިފިިނަމަ ތިމާވެށްޓަށް ބޮޑެތި ގެއްލުންތަކެއް ލިބޭނެތީ އެ މަޝްރޫއަށް ބޮޑެތި ފާޑުކިޔުންތަކެއް އަމާޒުވަމުން ދިއުމުގެ ސަބަބުން އެ މަޝްރޫއު ކުރިއަށް ނުގެންގޮސް ހުއްޓާލީއެވެ.
ރިޔާސި އިންތިހާބުގެ ކެމްޕެއިންގައި ކާނަލް ނާޒިމްއާއި ކެމްޕެއިންޓީމުން އަތޮޅުތެރޭގެ ރަށްރަށަށް ދަތުރުތައް ކުރަމުން ދެންދާއިރު، ވެރިކަމަށް ހޮވި ވަޑައިގެންފިނަމަ ކޮށްދެއްވާނެ ގިނަ ކަންކަމެއްގެ ވައުދުތައް ނާޒިމް ދަނީ ވެވަޑައިގަންނަވަމުންނެވެ.
Advertisement
This content is created and paid for by advertisers and does not involve Voice Journalists
