އެއްވެސް ގުޅުމެއް ނެތް މައްސަލައެއްގައި ފްރޭމްކޮށް އަނިޔާވެރިވި ފަރާތްތަކާއި މެދު ޤާނޫނު އަރާ ހަމަކުރާނެ ކަމަށް މަޖިލީހުގެ ހޯރަފުށީ ދާއިރާގެ ކުރީގެ މެންބަރު މުޙައްމަދު އިސްމާޢީލް ވިދާޅުވެއްޖެއެވެ.
މުޙައްމަދު އިސްމާއިލް މިހެން ވިދާޅުވީ އޭނާ ކުރައްވައިފައިވާ ޓްވީޓެއްގައެވެ.
އޭނާގެ ޓުވީޓުގައި ބުނެފައިވަނީ އޭނާއާއި އެއްވެސްގުޅުމެއް ނެތް މައްސަލައެއްގައި އޭނާ ފުރޭމްކޮށް 45 ދުވަހު ޖަލުގެ ބާއްވައި، ފޯނު ފުލުހުންގެ ބެލުމުގެދަށުގަ އޮންތާ 1 އަހަރާ 6 މަސް ވެއްޖެކަމަށެވެ.
"އަޅުގަނޑަކީ ދުވަހަކުވެސް ފުލުހުން އަޅުގަނޑު ފުރޭމްކޮށްފައިވާފަދަ އެއްވެސް ކަމެއްކުރުމަށް ދުވަހަކުވެސް ހިތްވަރުދޭނެ މީހެއްނޫން، މައްސަލާގަ ހައްޔަރުކުރި 19 މީހުންގެތެރޭގަ އަޅުގަނޑު ދަންނަ އެއްވެސްމީހެއްނުވާއިރު ރާވާހިންގިކަމަށް ފުރޭމްކޮށް ގަސްތުގަ ފުލުހުން އަޅުގަނޑަށް އަނިޔާވެރިވެ ފުރޭމްކުރިކަން ކޯޓްތެރެއިން ސާފްވެގެންދާނެ إِنْ شَاءَ ٱللَّٰهُ . އަޅުގަނޑު ފުރޭމްކޮށް އަނިޔާވެރިވި ފަރާތްތަކާމެދު ޤާނޫނުއަރާ ހަމަކުރާނެ"
މުޙައްމަދު އިސްމާއިލް ވިދާޅުވެފައިވެއެވެ.
މީގެ އަހަރެއްހާ ދުވަސް ކުރިން މުޙައްމަދު އިސްމާއިލް ފުލުހުންގެ ބެލުމުގެ ދަށަސް ގެންގޮސްފައިވަނީ އިންޑިޔާ އައުޓް ހަރަކާތް ހިންގުމަށް ހަރަދުކުރާ މައިގަނޑު އެކަކީ އޭނާ ކަމަށް ތުޙުމަތު ކޮށް ނެރެފައިވާ ކޯޓު އަމުރެއްގެ ދަށުންނެވެ.
އެ އަމުރުގައި ވަނީ މުޙައްމަދު އިސްމާއީލް އެ ހަރަކާތް އިތުރަށް ފުޅާކޮށް، އެކަމުގައި އިތުރު މީހުން ބައިވެރިކުރުވާ ކަމަށެވެ. އަދި އެ ހަރަކާތް ހުއްޓުވަން ދައުލަތުގެ އިދާރާތަކުން ކުރަމުންދިޔަ މަސައްކަތަށް ގޮންޖަހައި އޭނާ ހުރަސްއަޅަމުންދާ ކަމަށް ވެސް ކޯޓު އަމުރުގައިވެއެވެ.
މީގެ އިތުރުން އިންޑިއާ އައުޓް ބެނާތަކާއި ކުރެހުންތަކާއި ލިޔުންތައް ތައްޔާރުކޮށް އެތަކެތި މާލެ އާއި އަތޮޅުތަކުގެ ރަށްތަކަށް ފޯރުކޮށްދޭ ކަމުގެ ތުހުމަތު ވެސް އޭނާގެ މައްޗަށް ކޮށްފައިވެއެވެ.
އެކަމުގެ ސަބަބުން ބައިނަލްއަޤްވާމީ ގުޅުންތަކާއި އަވަށްޓެރި ޤައުމުތަކާއި ރާއްޖެއާ ދެމެދު އޮންނަ ޚާރިޖީ އަދި ޘަޤާފީ ގުޅުންތަކަށް ނުރަނގަޅު އަސަރުކުރާ ކަމަށް ވެސް މުޙައްމަދު އިސްމާއިލް ހައްޔަރު ކުރުމަށް ކޯޓުން ނެރެފައިވާ އަމުރުގައިވެއެވެ.
Advertisement
This content is created and paid for by advertisers and does not involve Voice Journalists
