މިސަރުކާރުން ހިންގާ ބިންވެރިޔާ ސްކީމްގެ ދަށުން މާލޭ ރައްޔިތުންނަށް ދޫކުރަ ގޯތިތައް އަންގާރަ ދުވަހު ދޫކުރާނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް ނ އަތޮޅަށް މިއަދު ކުރައްވަމުން ގެންދަވާ ކެމްޕޭނު ދަތުރުފުޅުގައި އެއަތޮޅު ކުޑަފަރީ ރައްޔިތުންނާއި ބައްދަލު ކުރައްވައި ދެއްކެވި ވާހަކަފުޅުގައި ރައީސް ވިދާޅުވީ މާލެއިން ގޯތި ދޫކުރުން އޮތީ އެންމެ ފަހުގެ މަރުހަލާގައި ކަމަށާއި އަންގާރަ ދުވަހު ގޯތިތައް ދޫކުރަން ފަށާނެ ކަމަށެވެ.

ސަރުކާރުން ހިންގާ ބިންވެރިޔާ ސްކީމްގެ ދަށުން ގޯއްޗަށް އެދި ހުށައެޅި މީހުންގެ ތެރެއިން 19،857 މީހުން ގޯއްޗަށް ޝަރުތު ހަމަވެއެވެ. ބިންވެރިޔާ ސްކީމްގެ ދަށުން ގޯއްޗަށް ހުށައަޅައިފައިވަނީ 15،164 ފޯމެވެ. އެއީ މުޅި އެކު 23،088 މީހަކު ބައިވެރިވާ ގޮތައް ހުށައެޅުނު ފޯމުތަކެކެވެ. އޭގެ ތެރެއިން 12،794 ފޯމެއްގެ ޝަރުތު ހަމަވާ އިރު އެއީ 19،857 މީހަކު ބައިވެރިވާ ފޯމުތަކެކެވެ.

ސަރުކާރުން ނިންމާފައިވަނީ ވަކި ފަރުދަކަށް ނަމަ ދޫކުރާ އެންމެ ކުޑަ ގޯތީގެ ބޮޑުމިނަކީ 1،250 އަކަފޫޓް، ޖޮއިންޓް އެޕްލިކޭޝަނެއްނަމަ އިތުރުވާ ކޮންމެ މީހަކަށް 400 އަކަފޫޓު އަދި ހަތް މީހުންނަށްވުރެ ގިނަ މީހުން ބައިވެރިވެގެން ހުށަހަޅާ އެޕްލިކޭޝަނެއްނަމަ ޖުމްލަ 4،000 އަކަފޫޓުގެ ގޯތި ދޫކުރުމަށެވެ.

ސަރުކާރުން ބުނެފައިވަނީ ހުޅުމާލެ އިން 2،200 ގޯއްޗާއި ގުޅީފަޅުން 2،000 އަށްވުރެ ގިނަ ގޯތި ދޫކުރާނެ ކަމަށެވެ.