ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމު މިނިވަންކުރެވޭނީ ދަ ޑިމޮކްރެޓްސްގެ ރިޔާސީ ކެންޑިޑޭޓަށް ވޯޓުދީގެންކަމަށް ވިދާޅުވެ އެމްޑީޕީން ނިކުމެ ވަޑައިގެން ދަ ޑިމޮކްރެޓްސްއަށް އިންތިޚާބު ހޯއްދަވާދެއްވުމަށް މަސައްކަތްޕުޅު ކުރައްވަމުން ގެންދަވާ މަޖިލީހުގެ ރައީސް މުޙައްމަދު ނަޝީދު ދައްކަވަމުން ގެންދަވާ ވާހަކަތަކަށް ރައްޔިތުން ނުހެއްލުމަށް ރައީސް ޔާމީން އެދިވަޑައިގެންފި އެވެ. 

އެމަނިކުފާނު މިފަދައިން އެދިވަޑައިގެންފައި ވަނީ ރައީސް ޔާމީން މިނިވަންކުރުމަށް މަސައްކަތްޕުޅު ކުރައްވާ ކަމަށާއި، އެމަނިކުފާނު މިނިވަން ކުރެވޭނީ ދަ ޑިމޮކްރެޓްސްއަށް ވޯޓުދީގެންކަމަށް ނަޝީދު ވިދާޅުވަމުންދާ ދަނޑިވަޅެއްގައި ރައީސް ޔާމީންގެ އިސް ޤާނޫނީ ވަކީލު ޑރ މުޙައްމަދު ޖަމީލު އަހުމަދު މެދުވެރިކޮށް ދެއްވި މެސެޖެއްގަ އެވެ. 

އެގޮތުން ޑރ ޖަމީލު ވިދާޅުވީ ރައީސް ޔާމިނަށް ނުހައްގުން އަނިޔާކުރުމުގައި އެންމެ އިސްކޮށް ހުންނެވި ފަރާތަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުކަމަށްވާއިރު، މަޖިލީހުގެ ރައީސްގެ ހައިއިއްޔަތުން ޖުޑިޝަލް ސާވިސް ކޮމިޝަން (ޖޭއެސްސީ) ގައި އިންނަވާ ރައީސް ނަޝީދުވެސް އެ އަނިޔާ ދިނުމުގައި ފުރިހަމަޔަށް ބައިވެރިވާކަމަށް ރައީސް ޔާމިނު ވިދާޅުވެފައިވާ ކަމަށެވެ. 

Advertisement

ނަޝީދުގެ އިތުރުން ހޯމް މިނިސްޓަރު އިމްރާނު އަކީވެސް ރައީސް ޔާމިނަށް އަނިޔާވެރިވެފައިވާ ބޭފުޅެއްކަމަށް ރައީސް ޔާމީން ވިދާޅުވާކަމަށް ޑރ ޖަމީލު ވިދާޅުވިއެވެ. 

ޑރ ޖަމީލު ވިދާޅުވީ ރިޔާސީ އިންތިޚާބު ބޯމަތިވުމުން، ރައީސް ޔާމިނުގެ ނަންފުޅު ބޭނުންކުރައްވައިގެން ނަޝީދު ކުރައްވަމުން ގެންދަވާ މަސައްކަތްޕުޅަކީ ޕީޕީއެމް ބައިބައި ކުރުމުގެ މަސައްކަތް ކަމަށެވެ. ރައީސް ޔާމީން މިނިވަންކުރާނެ ކަމަށް ބުނެ ނަޝީދު މިހާރު ވާހަކަފުޅު ދައްކަވަމުން ގެންދަވަނީ ޕީޕީއެމްގެ ސަޕޯޓަރުންގެ ތާއީދު ހޯދާ އެމީހުންގެ ވޯޓު އަނބުރާލުމުގެ ބޭނުމުގައި ކަމަށް ޑރ ޖަމީލު ވިދާޅުވި އެވެ.

އެއާއެކު ޑރ ޖަމީލު ވިދާޅުވީ ދަ ޑިމޮކްރެޓްސްއިން މިހާރު ކުރަމުންދާ ކަންކަމާއި، ނަޝީދު ދައްކަވަމުންދާ ވާހަކަތަކުގައި ޕީޕީއެމްގެ އެއްވެސް އާންމު މެމްބަރަކު އަދި ރައީސް ޔާމީންގެ ސަޕޯޓަރަކު ނުޖެހުމަށް ރައީސް ޔާމީން އިލްތިމާސްކުރައްވާ ކަމަށެވެ.

ޑރ ޖަމީލު އިތުރަށް ވިދާޅުވީ ރައީސް ޔާމީން އެދިވަޑައިގަންނަވަނީ މި އިންތިޚާބުގައި އެމަނިކުފާނު އެންޑޯސްކުރައްވާފައިވާ ޕީއެންސީގެ ރިޔާސީ ކެންޑިޑޭޓު ޑރ މުޙައްމަދު މުއިއްޒަށް ތާއީދުކޮށްދެއްވާ އެމަނިކުފާނަށް ވޯޓުދީ މި ރިޔާސީ އިންތިޚާބު އިދިކޮޅު ކޯލިޝަނަށް ހޯދާދިނުމަށް ރައްޔިތުން މަސައްކަތްޕުޅު ކޮށްދެއްވުމަށް ކަމަށެވެ.