ބޮޑު ޗުއްޓީއަކަށް ފަހު ރައްޔިތުންގެ މަޖިލީހުގެ ތިންވަނަ ދައުރުގެ ފުރަތަމަ ޖަލްސާ މިފެށޭ ހަފްތާގެ ހޯމަ ދުވަހުގެ ހެނދުނު 9:00 ގައި ބޭއްވުމަށް ތާވަލުކޮށްފިއެވެ.

މިއަހަރުގެ ދެވަނަ ދައުރުގެ ޖަލްސާތައް 22 ޖޫން 2023 ވީ ބުރާސްފަތި ދުވަހު ނިންމާލީ، މަޖިލީހުގައި މަސައްކަތްތައް ނުނިމި ހުރުމާއެކު ދައުރު ދިގުދަންމާލުމަށް މެމްބަރުން އެދިވަޑައިގަންނަވަމުން ދަނިކޮށެވެ.

ދެވަނަ ދައުރުގެ އެންމެ ފަހު ޖަލްސާގައި ވެސް މަޖިލީހުގެ މެމްބަރުން ވަނީ ކުރަން ހުރި މަސައްކަތްތައް ނުނިންމައި ޗުއްޓީއަށް ދާތީ އެކަމުގެ ކަންބޮޑުވުން ފާޅުކުރައްވާފައެވެ. ދެވަނަ ދައުރުގެ ފަހު ޖަލްސާ ކުއްލި ގޮތަކަސް ނިންމާލައިފައިވަނީ އެމްޑީޕީގެ ޕީޖީ ގްރޫޕުން މަޖިލީހުގެ މަސައްކަތްތައް ނިންމުމަށް އެދި ރައީސް ނަޝީދަށް ސިޓީއެއްވެސް ހުށަހަޅާފައި  ވަނިކޮށެވެ.

Advertisement

މެމްބަރުންގެ ކަންބޮޑުވުންތައް ފާޅުކުރައްވައި މަޖިލީހުގެ ތިން ބައިކުޅަ އެއްބައި މެމްބަރުންގެ ސޮޔާއެކު، ދައުރުން ބޭރުން މަޖިލީހުގެ ޖަލްސާތަކެއް ބާއްވާދިނުމަށް އެދި ސިޓީއެއް ހުށަހެޅުއްވުމާއި ގުޅިގެން ދައުރުން ބޭރުން ދެ ޖަލްސާއެއް ތާވަލުކުރެވިގެން ދިޔައެވެ.

 ފުރަތަމަ ޖަލްސާ ތާވަލުކުރީ 03 ޖުލައި 2023 ވީ ހޯމަ ދުވަހުގެ ހެނދުނަށެވެ. ނަމަވެސް ޖަލްސާ ވަނީ ފެށުނުތާ 3 މިނެޓުގެ ތެރޭގައި ނިންމާލާފައެވެ.

ދައުރުން ބޭރުން ބޭއްވި ދެވަނަ ޖަލްސާ 10 ޖުލައި ވާ ހޯމަ ދުވަހު ކުރިއަށް ގެންގޮސް، ކޮމިޓީތައް އެކުލަވާލާނެ ގޮތާއި ގުޅޭ ރިޕޯޓު ފާސްކޮށްފައިވާއިރު، މި ދެ ޖަލްސާގެ ރިޔާސަތު ބަލަހައްޓަވާފައިވަނީ މެންބަރު ޙަސަން އަފީފެވެ.

ރައްޔިތުންގެ މަޖިލީހުގައި ނުނިމި ހުރި މަސައްކަތްތަކުގެ ތެރޭގައި، މަޖިލީހުގެ ކޮމިޓީތައް އެކުލަވާލުމުގެ މަސައްކަތާއި މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ ހިމެނެއެވެ. އަދި ބަންޑާރަނައިބު އިބްރާހީމް ރިފްއަތާއި ފޮރިން މިނިސްޓަރ އަބްދުﷲ ޝާހިދުގެ އިތުބާރު ނެތްކަމުގެ މައްސަލަވެސް، ނުނިމި ހުރި މަސައްކަތްތަކުގެ ތެރޭގައި ހިމެނެއެވެ.