ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިހާބު، އެމްޑީޕީގެ ރިޔާސީ ކެނޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެއްބުރުން ކާމިޔާބު ކުރައްވާނެ ކަމަށް އެމަނިކުފާނުގެ ކެންޕެއިން ތަރުޖަމާނު، ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
ރައީސް ޞާލިހުގެ ކެންޕެއިން ތަރުޖަމާނުގެ ފަރާތުން މިއަދު ބޭއްވުނު ނޫސްވެރިންގެ ބައްދަލުވުމުގައި ނޫސްވެރިއަކު ވަނީ، ކުރިއަށް އޮތް ރިޔާސީ އިންތިހާބުގައި ރައީސް ޞާލިހް އާއި ވާދަވެރި ކެންޑިޑޭޓު ޑރ. މުހައްމަދު މުޢިއްޒު އަށް އިންތިހާބު ކާމިޔާބު ވާނެތޯ އާއި އިންތިހާބު ކާމިޔާބު ކުރުމުގައި ގޮންޖެހުމަކަށް މުއިއްޒު ވާނެތޯ ސުވާލު ކޮށްފައެވެ. އަދި އެ އިންތިހާބު، އެއްބުރުން މުޢިއްޒުއަށް ކާމިޔާބު ވާނެތޯ ވެސް ވަނީ ސުވާލު ކޮށްފައެވެ.
އެއަށް ޖަވާބު ދެއްވަމުން މާރިޔާ ވިދާޅުވީ، މުއިއްޒު އަކީ ޕީއެންސީއާއި ޖަމިއްޔަތުއް ސަލަފް ގެ ކެންޑިޑޭޓެއް ކަމަށާ، އަދި ޕީއެންސީ އަދި ސަލަފްގެ މެންބަރުންގެ އަދަދު ހުރި މިންވަރަށް ބަލާފައި، ކުރިއަށް އޮތް ރިޔާސީ އިންތިހާބު، ރައީސް ޞާލިހަށް ކާމިޔާބު ވާނެ ކަމާއިމެދު ޝައްކު ނުކުރައްވާ ކަމަށެވެ.
ދެން ޕީއެންސީ ސަލަފްގެ އަދަދުތައް ތިބޭފުޅުންނަށް ފެނިވަޑައިގަންނަވާނެ. އެމްޑީޕީީ އާއި، އަދާލަތު ޕާޓީއާއި، އެމްޑީއޭގެ އަދަދުތައް އެއީ ތިބޭފުޅުންނަށް ހަމަ ވަރަށް ރީތިކޮށް ފެނިވަޑައިގަންނަވަމުންދާ އަދަދުތަކެއް... އިރާދަކުރެއްވިޔާ އަޅުގަނޑުމެން ހަމަ ކޮންފިޑެންޓްލީ ދަންނަވާނަން، އެއްބުރުން އަޅުގަނޑުމެން، ރައީސް ޞާލިހު ނަންގަވާނެ މި އިންތިހާބު.
މާރިޔާ އަހުމަދު ދީދީ
މީގެ ކުރިންވެ ބައްދަލުވުންތަކެކޭ އެއްފަދައިން މާރިޔާގެ މިއަދުގެ ނޫސްވެރިންގެ ބައްދަލުވުމުގައިވެސް، އިދިކޮޅު ޕީޕީއެމް/ޕީއެންސީގެ ކެންޑިޑޭޓު ޑރ މުހައްމަދު މުއިއްޒުއަށް ވަނީ ވަރަށް ބޮޑަށް ފާޑުވިދާޅުވެފައެވެ.
Advertisement
This content is created and paid for by advertisers and does not involve Voice Journalists
