ސްކޫލް ޗުއްޓީއެއް އަހަރު މެދުތެރެއިން ވެސް ލިބޭނެ ގޮތް ހަމަޖައްސާނެ ކަމަށް ޕީއެންސީގެ ރިޔާސީ ކެންޑިޑޭޓް މާލޭގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕެއިނަށް ދ. ކުޑަހުވަދުއަށް ވަޑައިގެން ރޭ އެރަށު ބޭއްވި ޖަލްސާގައި މުޢިއްޒު ވަނީ، އޭނާއަށް ވެރިކަން ލިބިލައްވައިފި ނަމަ، 2025 ވަނަ އަހަރުން ފެށިގެން ސުކޫލު ބޮޑު ޗުއްޓީ ޑިސެމްބަރަށް ބަދަލުކުރައްވާނެ ކަން އިއުލާން ކުރައްވައިފަ އެވެ.
އެކަމާއި ގުޅިގެން ރިސޯޓު ތަކުގައި މަސައްކަތްކުރާ މުވައްޒަފުންގެ ކަންބޮޑުވުންތައް ލިބެމުންދާ ކަން ފާހަގަކުރައްވައި، އެ މައްސަލަ ހައްލު ކޮށްދެއްވާނެ ކަމަށް އިއްޔެ ކުރެއްވި ޓުވީޓެއްގައި ވަނީ ވިދާޅުވެފަ އެވެ.
އެ މައްސަލަ ހައްލު ކުރާނެ ގޮތުގެ ތަފްސީލް ދެއްވަމުން ފ. ނިލަންދޫގައި ރޭ ބޭއްވި ކެމްޕެއިން ޖަލްސާގައި ވާހަކަދައްކަމުން މުއިއްޒު ވިދާޅުވީ ސްކޫލް ބޮޑު ޗުއްޓީ ޑިސެމްބަރަށް ބަދަލުކުރި ނަމަވެސް ޓޫރިޒަމް ދާއިރާގައި މަސައްކަތް ކުރާ އާއިލާތަކަށް އެއްވެސް ގެއްލުމެއް ނުދެއްވާނެ ކަމަށެވެ. އެގޮތުން އަހަރުގެ މެދުތެރެއިން ހަތަރު ހަފްތާގެ ޗުއްޓީއެއް ސްކޫލް ދަރިވަރުންނަށް ލިބޭނެ ގޮތް ހައްދަވައިދެއްވާނެ ކަމަށް މުޢިއްޒު ވިދާޅުވިއެވެ.
"އަހަރުގެ މެދުތެރޭގައި ހަތަރު ހަފްތާގެ ސްކޫލް ބަންދެއް އަޅުގަނޑުމެން ހަމަޖައްސާނެ ވާހަކަ. ހަތަރު ހަފްތާ ލިބޭނެ ޖޫން/ޖުލައިގެ ތެރޭގައި. ހަތަރު ހަފްތާ ހިމެނޭ ސްކޫލް ޗުއްޓީއެއް އަހަރު މެދުތެރެއިން ވެސް ލިބިގެންދާނެ، އަހަރުގެ ފަހުކޮޅު އޮންނަ ބޮޑު ބަންދުގެ އިތުރަށް،"
ޑރ. މުހައްމަދު މުޢިއްޒު
މުއިއްޒު ވިދާޅުވީ މިގޮތަށް ހަމަޖެއްސުމުން ޓޫރިޒަމް ދާއިރާގައި މަސައްކަތް ކުރާ ފަރާތްތަކަށް ވެސް އެ ފަރާތްތަކުގެ އާއިލާއާއެކީގައި ވަގުތު ހޭދަކުރަން ފުރުސަތު ލިބިގެންދާނެ ކަމަށެވެ.
މުއިއްޒު ވިދާޅުވީ މި ކަން މި ގޮތަށް ނިންމީ ތައުލީމީ ދާއިރާގެ ތަޖުރިބާކާރުންނާ މަޝްވަރާކުރުމަށްފަހު ކަމަށެވެ. މި ގޮތަށް ބަދަލުކުރުމުން ވެސް އަހަރު ތެރޭގައި ކިޔަވަން ބޭނުންވާ ހުރިހާ ގަޑިއެއް ހަމަވާ ކަމަށް ވެސް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
