ޕީޕީއެމް/ޕީއެންސީ ކޯލިޝަންގެ ރިޔާސީ ކެންޑިޑޭޓް ޑރ މުހައްމަދު މުޢިއްޒުގެ ވެރިކަމެއްގައި، ފަތުރުވެރިކަމުގެ ދާއިރާގައި މަސައްކަތް ކުރާ މުވައްޒަފުންނަށް ކޮށްދެއްވާނެ ބައެއް ކަންކަން ހާމަކުރައްވައިފިއެވެ.
ރިޔާސީ ކެމްޕެއިނަށް ފ. އަތޮޅަށް ކުރައްވާ ދަތުރުގައި މިރޭ ނިލަންދޫގައި ބޭއްވި ޖަލްސާގައި ވާހަކަދައްކަވަމުން މުޢިއްޒު ވިދާޅުވީ މީގެ ކުރިން ސިވިލް ސާވަންޓުންނާއި ޑޮކްޓަރުންނާއި ނަރުހުންނާ އަދި ޓީޗަރުން ފަދަ ދާއިރާތަކަށް ބޯހިޔާވަހިކަމުގެ މަޝްރޫއުތައް ހިންގާފައިވެ އެވެ.
އެހެންނަމަވެސް ވިއްސަކަށް ހާސް ދިވެހި މުވައްޒަފުން މަސައްކަތް ކުރާ، ފަތުރުވެރިކަމުގެ ސިނާއަތަށް އެފަދަ ކަމެއްވެސް ހިންގާފައި ނުވާ ކަން ފާހަގަކުރައްވައި މުޢިއްޒު ވިދާޅުވީ އެމުވައްޒަފުންނަކީ އެހެން ވަޒީފާތައް އަދާކުރާ މުވައްޒަފުންނާ އެއްގޮތަށް އަހަންމިއްޔަތުކަން ދޭންޖެހޭ ބައެއް ކަމަށެވެ.
އެހެންކަމުން އެ ފުރުސަތު، ރާއްޖޭގެ އިގުތިސާދުގެ އެންމެ ބޮޑު ސިނާއަތް ކަމަށްވާ ޓޫރިޒަމްގެ ދާއިރާގައި މަސައްކަތްކުރާ މުވައްޒަފުންނަށް ވެސް އޮންނަން ޖެހޭނެ ކަމަށް ގަބޫލުކުރައްވާކަމަށް އޭނާ ވިދާޅުވި އެވެ. އަދި އޭނާގެ ވެރިކަމުގައި އެކަން ކޮށްދެއްވާނެ ކަމަށްވެސް ވަނީ ވަޢުދުވެވަޑައިގެންފައެވެ.
"އެެހެންވީމާ އަޅުގަނޑު ތަކުރާރުކޮށް މިދަންނަވާ ޕޮލިސީގެ ތެރެއިން ދިވެހި ކޮންމެ ރައްޔިތެއްގެ އެންމެ އަސާސީ ހައްގެކަމުގައި އަޅުގަނޑުމެން ގަބޫލުކުރަނީ ގެދޮރުވެރިކަން ކަމުގައި ވާތީ އަޅުގަނޑުމެންގެ ސަރުކާރެއްގައި އެންމެ ކުރީކޮޅުފަށާ ހައުސިން މަޝްރޫއުތަކުގެ ތެރޭގައި ވަކި ޚާއްސަ ކެޓަގަރީއެއް ހަދާ ޓުއަރިޒަމް އިންޑަސްޓްރީގައި މަސައްކަތްކުރާ މުވައްޒަފުންނަށް ޚާއްސަ ކުރެވިފައިވާ ހައުސިން ކެޓަގަރީއެއް ގާއިމުކޮށް ސޯޝަލް ހައުސިން ފޯރުކޮށްދިނުމަކީ އަޅުގަނޑުމެންގެ ސިޔާސަތުގައި ހިމެނޭ ކަމެއް"
ޑރ. މުހައްމަދު މުޢިއްޒު
މީގެ އިތުރުން ވެސް މުޢިއްޒުވަނީ، ޓޫރިޒަމްގެ ދާއިރާގެ ކުންފުނިތައް ހިންގާ އިސްވެރިންނާއި ރައްޔިތުންގެ މަޖިލީހުގައި ވެސް މަޝްވަރާކޮށް، ކަމާބެހޭ ގާނޫނާއި ގަވާއިދު ހަދައިގެން، އެ ދާއިރާގެ މުވައްޒަފުންނަށް ހާއްސަ އިތުރު ފައިދާތައް ލިބޭ ރިޓަޔަމަންޓް ޕެންޝަން ސްކީމެއް ވެސް އޭނާގެ ވެރިކަމެއްގައި ތައާރަފުކުރައްވާނެ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
