ކުރިއަށް އޮތް ރިޔާސީ އިންތިހާބުގައި ވާދަކުރައްވާ ކެންޑިޑޭޓުންގެ މެދުގައި ބާއްވާ ރިޔާސީ ބަހުސް ސެޕްޓެމްބަރު 1، ގައި ބޭއްވުމަށް ނިންމައިފި އެވެ.

ދައުލަތުގެ މީޑިއާ، ޕަބްލިކް ސާވިސް މީޑިއާ (ޕީއެސްއެމް) އިން ކޮންމެ ދައުރެއްގެވެސް އިންތިހާބާއި ދިމާކޮށް ބާއްވާ މި ބަހުސާއި ގުޅިގެން ކުރި އިއުލާނެއް ބުނީ މި ބަހުސް މިފަހަރު އޮންނާނީ ސެޕްޓެމްބަރު 1، ވަނަ ދުވަހުގެ ރޭ 9:00 ގައި ކަމަށެވެ.

އަދި މި ބަހުސްގައި ކެންޑިޑޭޓުންގެ ތަސައްވަރާއި، ސިޔާސަތުތަކާއި، ކުރިއަށް އޮތް ފަސްއަހަރާއިމެދު އުންމީދުކުރާ ގޮތް ހާމަކުރުމުގެ ފުރުސަތު ލިބިވަޑައިގަންނަވާނެ ކަމަށްވެސް ޕީއެސްއެމުން ބުނެފައިވެ އެވެ.

ގާނޫނު އަސާސީ އަށް ގެނެވުނު ބަދަލާއި އެކު ގިނަ ޕާޓީތައް ހިމެނޭހެން ރިޔާސީ އިންތިހާބު ބާއްވަން ފެށިފަހުން، ބޭއްވުނު އިންތިހާބު ތަކުގެ ތެރެއިން މިހާތަނަށް އެންމެ ގިނަ ކެންޑިޑޭޓުން ވާދަކުރާ ރިޔާސީ އިންތިހާބަކީ މި އަހަރު ބޭއްވޭ އިންތިޚާބެވެ.

މި އިންތިހާބުގައި ސިޔާސީ ޕާޓީތަކުން ފަސް ކެންޑިޑޭޓަކު އަދި އަމިއްލަ ގޮތުން ތިން ކެންޑިޑޭޓަކު ވާދަކުރާނެ އެވެ. އެއީ؛

1- އުމަރު ނަސީރު (އަމިއްލަ)

2- ހަސަން ޒަމީލް (އަމިއްލަ)

3- ރައީސް އިބްރާހިމް މުހައްމަދު ސޯލިހު (އެމްޑީޕީ)

4- ޑރ. މުހައްމަދު މުއިއްޒު (ޕީއެންސީ)

5- ގާސިމް އިބްރާހިމް (ޖުމްހުރީ ޕާޓީ)

6- އަހުމަދު ފާރިސް މައުމޫން (އަމިއްލަ)

7- އިލްޔާސް ލަބީބު (ދަ ޑިމޮކްރެޓްސް)

8- މުހައްމަދު ނާޒިމް (އެމްއެންޕީ)

ހުރިހާ ކެންޑިޑޭޓުންވެސް މިވަގުތު އަންނަނީ އެކި ގޮތްގޮތަށް ކެންޕެއިން ހަރަކާތްތައް ކުރިއަށް ގެންދަވަމުންނެވެ.