ކީރިތި ޤުރްއާނުގެ ދާއިރާއިން މަތީ ތަޢްލީމު ޙާޞިލުކުރަމުންދާ ބޭފުޅުންނާއި އަމާޒުކޮށްގެން ކުއްލިއްޔާ އޮފް ޤުރްއާން އެންޑް ސުންނާގެ ފަރާތުން އިންތިޒާމުކޮށްގެން "މަޙްފަލުލްޤުރްއާނީ" ތިން ވަނަ މަޙްފަލް މާދަމާ ފެށުމަށް ތައްޔާރުވެއްޖެއެވެ. 

މިފަދަ މަޙްފަލެއް ބޭއްވުމުގެ މައިގަނޑު މަޤްޞަދަކީ "ކީރިތި ޤުރްއާން ތަފާތު ޤިރާއަތްތަކަށާއި، ދިގުރާގަށް ކިޔެވުމުގެ ޚާއްސަ ހުނަރުތަކާއި އަޑު ގެންގުޅޭނެ ގޮތްތަކަށް ޤުރުއާނުގެ ދާއިރާގެ ލެކްޗަރަރުންނާއި މުދައްރިސުން އަހުލުވެރިކުރުވުން ކަމުގައި އެ ޔުނިވަސިޓީގެ ފަރާތުން މައުލޫމާތުދެއެވެ. 

ދުނިޔޭގެ މަޝްހޫރު ބައެއްޤާރީންނާއި ރާއްޖޭގެ ފުންނާބު އުސް ޤާރީންގެ ތަފާތު ކިޔެވުންތައް އިވިގެންދާނެ މި މަޙްފަލް ފެށުމަށް ހަމަޖެހިފައިވަނީ މާދަމާ, 2023 އޮގަސްޓު 19 ވަނަ ދުވަހު ހެނދުނު 08:45 ގައި ދިވެހިރާއްޖެ އިސްލާމީ ޔުނިވާސިޓީގެ ހޯލުގައެވެ. 

މަޙްފަލުލްޤުރްއާން ގެ ދައުވަތު 

ދިވެހިރާއްޖޭގައި އިސްލާމީ ތައުލީމް އެންމެ ފުޅާ ދާއިރާއެއްގައި ދެމުން އަންނަ އައި.ޔޫ.އެމްގެ ފާހަގަ ކުރެވެނީ ޤުރުއާނުގެ ދާއިރާގެ އިތުރުން ދީނީ އެކި އެކި ކަންމަށް ހޭލުންތެރިކަން އިތުރު ކުރުމަށް މުހިއްމު ބައްދަލުވުންތައް ބާއްވާމުން އަންނަ ވަރަށް ހަރަކާތްތެރި މުއައްސަސާއެއްގެ ގޮތުގައެވެ. މިގޮތުން ކީރިތި ޤުރުއާނުގެ ތަފާތު މަހްރަޖާން ތަކާއި، ކިޔެވުމުގެ އިޖާޒާ ޕްރޮގްރާމާއި، ޤުރްއާނުގެ ޢިލްމާ ގުޅޭ ތަފާތު އެތަކެއް ވޯކްޝޮޕްތަކާއި، ޓްރައިން ޕްރޮގްރާމުތައް އެތަނުގެ ފަރާތުން އަންނަނީ ހިންގަމުންނެވެ.