ޕީޕީއެމް ޕީއެންސީގެ ކެންޑިޑޭޓް ޑރ މުޙައްމަދު މުޢިއްޒުގެ ރަނިންގމޭޓް ހުސެއިން މުޙައްމަދު ލަތީފް (ސެމްބެ) އައްޑޫ ސިޓީއަށް ވަޑައިގަތުމުން އޭނާ އަށް ހޫނު މަރުޙަބާ އެއް ކިޔައިފިއެވެ.

ރިޔާސީ އިންތިޚާބުގެ ކެމްޕޭން ދަތުރުގައި ހުސެއިން މުޙައްމަދު އައްޑޫ ސިޓީ އަށް ވަޑައިގަތުމުން އެސިޓީގެ އެތައް ބަޔަކު ނުކުމެ ވަނީ އޭނާއަށް މަރުޙަބާ ކިޔައިފައެވެ.

ޑރ މުޢިއްޒުގެ ރަނިންގމޭޓް އަދި ފަރެސްމާތޮޑާ ދާއިރާގެ މެމްބަރު ހުސެއިން އައްޑޫ އަށް ވަޑައިގެން އެސިޓީގެ ރައްޔިތުންނާއި ބައްދަލު ކުރައްވައިފައިވެއެވެ.

ހުސެއިން އައްޑޫ ސިޓީގައި ހުންނެވިއިރު ޕީޕީއެމް ޕީއެންސީގެ ކެންޑިޑޭޓް ޑރ މުޢިއްޒު ރޭ ވަނީ މާލެ އަތޮޅު ގުރައިދުއަށް ވަޑައިގެން އެރަށުގައި ބޭއްވުނު ކެމްޕޭނު ޖަލްސާގައިވެސް ބައިވެރިވެވަޑައިގެންފައެވެ.

އިންތިޚާބަށް 19 ދުވަހަށް ވެފައިވާއިރު ބައެއް ރަށްރަށުގައި ސިޔާސީ ފޯރި ވަރަށް ބޮޑަށް ގަދަވެފައިވެއެވެ. އިންތިޚާބުގައި ވާދަކުރުމަށް ކުރިމަތިލެއްވި ހުރިހާ ކެންޑިޑޭޓުންވެސް ދަނީ ވަރަށް ފޯރިއާއި ކެމްޕޭނު ކުރައްވަމުންނެވެ.

އިންތިޚާބަށް ކުޑަ ދުވަސްކޮޅަކަށް ވެފައިވާއިރު އިއްޔެ އިލެކްޝަންސް ކޮމިޝަނުން ވަނީ ވޯޓުލާ މީހުންގެ ފައިނަލް ލިސްޓު ނެރެފައެވެ. އަދި ކުރިއާލައި ވޯޓު ލާން ދާން ޖެހޭތަނެއް ބަލައި ޔަޤީންކުރުމަށް އެކޮމިޝަނުން ވަނީ އިލްތިމާސް ކޮށްފައެވެ.