މިސަރުކާރުން މިފަސްއަހަރު ވަނީ ދައުލަތުގެ ފައިސާ އިސްރާފްކޮށްފައި ކަމަށް ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުޙައްމަދު މުޢިއްޒު ވިދާޅުވެއްޖެއެވެ.

ޑރ މުޢިއްޒު މިހެން ވިދާޅުވީ ރޭ ކ ގުރައިދޫގައި ބޭއްވުނު ކެމްޕޭނު ޖަލްސާގައި ވާހަކަދައްކަވަމުންނެވެ.

މުޢިއްޒު ވިދާޅުވީ ކެމްޕޭނުގައި މިވީ ކުޑަ ދުވަސްކޮޅުގެ ތެރޭގައި ރަށްރަށުގެ ތަރައްޤީއަށް ކުރައްވާނެ ކަންކަމުގެ ވާހަކަ ދެއްކެވީމަ ހާދަ ގިނަ ވައުދެކޭ ތިވަނީ ބައެއްމީހުން އެބަ ބުނާ ކަމަށެވެ. މުޢިއްޒު ވިދާޅުވީ އަސްލު އެކަންކަމަކީ ރަށްރަށާއި އަޅާ ބަލާއިރު މާގިނަ ކަންކަމެއް ނޫން ކަމަށާއި، އެކަންކަން ގިނަހެން ހީވަނީ ނުކޮށް ގިނަ ދުވަސްވީމައި ކަމަށެވެ.

Advertisement

އަދި އެކަންކަން ކުރެވޭވަރަށް ދައުލަތަށް ފައިސާ ވަންނަކަމަށާއި، އާމްދަނީ ލިބޭ ކަމަށް މުޢިއްޒު ވިދާޅުވިއެވެ. މުޢިއްޒު ވިދާޅުވީ ލިބޭ ފައިސާއިން ނުވާނެ ކަމަށް ހީވަނީ އާމްދަނީ އިން އިސްރާފް ކުރާތީ ކަމަށެވެ.

"މިސަރުކާރު ފަސް އަހަރު ދައުލަތުގެ ފައިސާ  އިސްރާފްކޮށްފައި ވަނީ، އެއަށްވަނީ ޚިޔާނާތްތެރިވެފަ ހަޤީޤަތުގަ، ކޮވިޑް ތެރޭގައި އެދިޔަ ދުވަސްތަކުގައި އެގެއްލުވާލި އެތައް ސަތޭކަ ބިލިއަން ރުފިޔާއަށް ވީގޮތެއް އަދިވެސް ކިޔައިނުދޭ" ޑރ މުޢިއްޒު ވިދާޅުވިއެވެ.

މުޢިއްޒު ވިދާޅުވީ ލިބޭ ފައިސާ ރަނގަޅުގޮތުގައި ހަރަދު ކުރާނަމަ ރަށްރަށުގެ ތަރައްޤީގެ ކަންކަމަކީ މާބޮޑެތި ކަންކަމެއް ނޫން ކަމަށެވެ.

ބޮޑެތި މަޝްރޫޢުތަކުގެ ވާހަކަ ދައްކާފައި ހުންނާނީ އެކަންކަމާއި ގުޅޭ ކުންފުނިތަކުން އިންވެސްޓް ކޮށްގެން ނުވަތަ ލޯނު ނަގައިގެން ކުރަން ހުރި ކަންކަން ކަމަށާއި، ނުކުރެވޭ ވަރުގެ ކަމެއްގެ ވާހަކަ ނުދައްކަވާނެ ކަމަށް ޑރ މުޢިއްޒު ވިދާޅުވިއެވެ. އަދި އެކަން ކުރާނެ ގޮތް ނޭނގިއެއްވެސް އެވާހަކައެއް ނުދައްކަވާނެ ކަމަށްވެސް އޭނާ ވިދާޅުވިއެވެ.

ޑރ މުޢިއްޒު ވިދާޅުވީ ރައީސް ޔާމިންގެ އަރިހުން ދަސްކުރެއްވެވީ އެގޮތް ކަމަށާއި، ރައީސް ޔާމީނަކީ ވަޢުދެއް ވެވަޑައިގެންފިނަމަ އެވަޢުދެއް ފުއްދަވާނެ ގޮތް އެނގިވަޑައިގަންނަވާ ބޭފުޅެއް ކަމަށެވެ. އަދި އެކަންކަން ރައްޔިތުނަށް ދެއްކެވި ބޭފުޅެއް ކަމަށެވެ.

ޑރ މުޢިއްޒު ވިދާޅުވީ އޭނާގެ ބަހާއި ޢަމަލާއި ދިމާވާނެ ކަން ޔަޤީން ކުރެއްވުމަށެވެ.

ގުރައިދޫގައި ބޭއްވުނު ކެމްޕޭނު ޖަލްސާގައި އެރަށު ޒުވާނުންތަކެއް ވަނީ ޑރ މުޢިއްޒަށް ތާއީދު ކުރުމަށް ނިންމައި ޕީޕީއެމް އަށް ސޮއިކޮށް ފޯމުތައް ހަވާލުކޮށްފައެވެ.