ބިން ހިއްކުމުގެ ނަމުގައި ސަރުކާރުން ގުރައިދޫގެ މުސްތަގުބަލު ނަގާލާފައިވާކަމަށް އެ ރަށު ކައުންސިލްގެ ރައީސް ހުސެއިން ޔާމީން ރަޝީދު ވިދާޅުވެއްޖެ އެވެ.
ޔާމީން މިފަދައިން ވިދާޅުވެފައި ވަނީ ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑީޑޭޓު ޑރ މުޙައްމަދު މުއިއްޒު ގުރައިދޫއަށް ވަޑައިގެން، އެ ރަށުގެ ބޭއްވި ކެމްޕޭނު ޖަލްސާގައި ވާހަކަދައްކަވަމުން ނެވެ.
ޔާމީން ވިދާޅުވީ މި ސަރުކާރުން ފަޚުރުވެރިކަމާއެކު ގުރައިދޫގައި ބިން ހިއްކާ ވާހަކަ ދެއްކި ނަމަވެސް، ސަރުކާރުން އެ މަސައްކަތް ކުރަމުންދަނީ ރައްޔިތުންނާއި ރަށަށް ވަރަށް ބޮޑަށް ގެއްލުންވާގޮތަށް ކަމަށެވެ. އަދި މިހާރު ސަރުކާރުން އެކަން ކުރަމުންދާ ގޮތުގެ ސަބަބުން ރަށުގެ މުސްތަގުބަލަށް ހިޔަނި އެޅިގެންދާނެކަމަށް ޔާމީން ވިދާޅުވި އެވެ.
ގުރައިދޫ ޖަލްސާގައި ޔާމީން ވާހަކަދައްކަވަނީ
"މާގިނަ ކަންތައްތަކެއް ކޮށްދެވިގެން، ގުރައިދޫގެ ބިން ހިއްކި ވާހަކަ މާ ބާރަށް ދައްކާއިރުގައި، 21 ހެކްޓަރު ހިއްކަން މި އިންނެވި ވަޒީރު (ކުރީގެ ހައުސިން މިނިސްޓަރު ޑރ މުއިއްޒު) ޕްލޭނު ކުރައްވާފައި އޮތް ތަނެއް، އަޅުގަނޑުމެންގެ ރައީސް ޔާމީން ގެނައި މަހާޖައްރާފުން މި ރާއްޖޭގެ ޚާއްސަކޮށް މި ގުރައިދޫގެ މުސްތަުބަލު ހަލާކުކޮށްލީ. ބިން ހިއްކަންށޭ ކިޔާ ބަހައްޓާފައި ގިރާ ސަރަހައްދު ހިމާޔަތްކުރުމުގެ މަޝްރޫއެއް މިހާ ހިންގީ. ރައީސް ޔާމިނުގެ ސަރުކާރުގައި އެމަނިކުފާނާއި ޑރ މުއިއްޒު ހުންނަވައިގެން ގިރާ ސަރަހައްދު ހިމާޔަތްކުރި ރަށްރަށް ވެސް ހުރީ އެއަށް ވުރެ ރަނގަޅަށް އެކަން ކޮށްފަ"
ގުރައިދޫ ކައުންސިލްގެ ރައީސް
ޔާމިނު ވިދާޅުވީ ގުރައިދޫ އަދި މާފުށީގައި ވެސް ސަރުކާރުން ބިން ހިއްކުމުގެ މަޝްރޫއު ކުރިއަށް ގެންގޮސްފައިވަނީ ރައްޔިތުން އެދޭ ގޮތަށް ނޫން ކަމަށެވެ. އަދި ރައްޔިތުންނަށް ފައިދާވާ ގޮތަށް ވެސް ނޫން ކަމަށެވެ.
އެހެން ކަމުން އެކަން ބަދަލުކޮށްދެއްވާ، ރައްޔިތުންނަށް ގެއްލުން ނުވާގޮތަށް އެ މަސައްކަތް ކޮށްެއްވުމަށް ޑރ މުއިއްޒުގެ އަރިހުން އެދިވަޑައިގަންނަވާކަމަށް ޔާމީން ވިދާޅުވި އެވެ.
ޔާމީން އިތުރަށް ވިދާޅުވީ، ޑރ މުއިއްޒުގެ ވެރިކަމެއްގައި، އެމަނިކުފާނު ވެލައްވާ ވައުދުތައް ފުއްދަވާދެއްވާނެ ކަމުގެ ޔަގީންކަން އޮތްކަމަށެވެ. އެގޮތުން އެމަނިކުފާނަކީ ރައީސް ޔާމީންގެ ފިކުރުގެ ބޭފުޅެއް ކަމަށާއި، އެމަނިކުފާނުގެ ސިޔާސަތުތައް ހިއްޕަވައިގެން ހުންނެވި ބޭފުޅަކަށް ވުމުން، ވައުދުފުއްދާނެކަމުގެ އިތުބާރާއި ޔަގީންކަން އޮތްކަމަށް ޔާމީން ވިދާޅުވި އެވެ. އެއީ ރައީސް ޔާމިނަކީ ވެސް ރައްޔިތުންނަށް ވައުދެއް ވެއްޖެ ނަމަ އެކަން ފުއްދަވާ ދެއްވާ ބޭފުޅެއްކަމަށް ވާތީ ކަމަށް އޭނާ ވިދާޅުވި އެވެ.
އޭގެ އިތުރުން ޔާމީން ވިދާޅުވީ އެއްބުރުން ޑރ މުއިއްޒަށް މިއަހަރުގެ ސެޕްޓެމްބަރު މަހުގެ 9 ގައި ބާއްވާ ރިޔާސީ އިންތިޚާބު ކާމިޔާބުކޮށްދިނުމަށް ޒުވާނުން ތިބީ ތައްޔާރަށް ކަމަށެވެ. ގައުމާއި މެދުގައި ވިސްނާ ޒުވާނުން ތިބީ ހާލަތު ބަދަލުކުރުމަށް ތައްޔާރަށް ކަމަށާއި، އެކަން ރިޔާސީ އިންތިޚާބުގެ ނަތީޖާއިން ދައްކައިދޭނެކަމުގެ ޔަގީންކަން ދެއްވާކަމަށް ޔާމީން ވިދާޅުވި އެވެ.
Advertisement
This content is created and paid for by advertisers and does not involve Voice Journalists
