ކެންޑިޑޭޓުންނަށް ތާއީދު ކުރުމުގެ ތެރެއިންވެސް ކެމްޕޭނަކަށް ހުރަސްއަޅާ އަނިޔާވެރިކަން އިސްކުރުމަކީ ބަލައިގަނެވޭނެ ކަމެއް ނޫން ކަމަށް ސަރުކާރު ހިންގާ ކޯލިޝަންގައި ހިމެނޭ އަދާލަތު ޕާޓީގެ ރައީސް އަދި ހޯމް މިނިސްޓަރު ޢިމްރާން އަބްދުالله ވިދާޅުވެއްޖެ އެވެ.
ޢިމްރާން ރޭ ކުރެއްވި ޓްވީޓެއްގައި ވިދާޅުވީ، ކެމްޕޭނު ކުރުމުގައިވެސް އަދި ކެންޑިޑޭޓަކަށް ތާއީދުކުރާކަން ހާމަކުރުމުގައިވެސް އެއްވެސް ފަރާތަކުން ތަހުޒީބު މުޖުތަމައުތަކުގައި ގެންގުޅޭ ހަމަތަކުން އެއްކިބާވެ ކެމްޕޭނަކަށް ހުރަސްއަޅާ އަނިޔާވެރިކަން އިސްކުރުމަކީ ބަލައިގަނެވޭނެ ކަމެއް ނޫން ކަމަށެވެ. އަދި އެފަދަ ކަންކަމުން ދުރުވެތިބުމަށް އޭނާ ވަނީ ގޮވާލާފައެވެ.
ޢިމްރާން މިފަދައިން ވިދާޅުވެފައި މިވަނީ، އިއްޔެ އިދިކޮޅު ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ކ. ގުރައިދޫއަށް ވަޑައިގަންނަވަން ހަމަޖެހިފައި ވަނިކޮށް އެމްޑީޕީ ސަޕޯޓަރުން ނުކުމެ ޕީޕީއެމް ސަޕޯޓަރުންނަށް ހަމަލާދީ މާރާމާރީ ހިންގާފައިވާ ދަނޑިވަޅެއްގައެވެ.
ގުރައިދޫގައި ދެޕާޓީގެ ސަޕޯޓަރުންގެ މެދުގައި ހަމަނުޖެހުން ހިނގައި ގަޔަށް ބޮލަށް އަރާ ހިސާބަށް ދިޔައިރުވެސް، އެރަށުގައި ހަރަކާތްތެރިވަމުން ގޮސްފައި ވަނީ ވަރަށް މަދު ފުލުހުން ކަން ފާހަގަކޮށްލަންޖެހެއެވެ.
ގުރައިދޫ ހަމަ ނުޖެހުމާއި ގުޅިގެން ފުލުހުން ބުނީ، ގުރައިދޫގައި ދެ ބައެއްގެ މެދުގައި މިއަދު ހިންގި ހަމަނުޖެހުމެއްގައި ބަޔަކަށް އަނިޔާވެފައިވާ ކަމަށެވެ. އަދި މި ހަމަނުޖެހުމާއި ގުޅިގެން 22 އަަހަރުގެ ދިވެހި ފިރިހެނަކު ވަނީ ހައްޔަރުކޮށްފައިވާ ކަމަށާ މައްސަލަ ތަހުގީގު ކުރަމުންދާ ކަމަށެވެ.
Advertisement
This content is created and paid for by advertisers and does not involve Voice Journalists
