މި އަހަރުގެ ރިޔާސީ އިންތިހާބު ނިމޭ އިރު އިދިކޮޅު ޕީޕީއެމްގެ ނަން ދިވެހިރާއްޖޭގެ ސިޔާސީ މަސްރަހުން ފޮހެވިގެންދާނެކަމަށް އެމްޑީޕީގެ ރިޔާސީ ކެންޑިޑޭޓުގެ ތަރުޖަމާނު މާރިޔާ އަހުމަދު ދީދީ ވިދާޅުވެއްޖެއެވެ.
އެމްޑީޕީގެ ރިޔާސީ ކެންޑިޑޭޓު ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ކެމްޕެއިން ހަރަކާތްތަކާއި ގުޅޭގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި މާރިޔާ ވިދާޅުވީ، ވެރިކަން ލިބިވަޑައިގެންފިނަމަ ކުރީގެ ރައީސް ޔާމީން އަބްދުލްގައްޔޫމް ޖަލުން މިނިވަން ކުރައްވާނެ ކަމަށް އިދިކޮޅުު ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވަމުންދިޔަ ނަމަވެސް، އެމަނިކުފާނު އެކަން ނުކުރައްވާނެކަމަށެވެ. އަދި އެކަން ކުރެވޭނެ ގާނޫނީ ހަމައެއްވެސް ނެތްކަމަށް ކަމަށް މާރިޔާ ވިދާޅުވި އެވެ.
މިއާއެކު މާރިޔާ ވިދާޅުވީ، ޕީޕީއެމުން މުއިއްޒުގެ ސަރުކާރެއްގައި، ނުވަތަ ކުރިއަށް އޮތް ރިޔާސީ އިންތިހާބުގައި ބައިވެރިވުމުގެ ވިސްނުމެއް ގެންގުޅުއްވި ނަމަ އޭނާ އެ ޕާޓީގެ ނައިބު ރައީސްއެއްގެ މަގާމުގައި މުޢިއްޒު ހުންނެވިއިރު، އެކަން ކުރެވުނީސްކަމަށެވެ.
އެހެންނަމަވެސް ރައީސް ޔާމީން ނިންމެވީ ޕީއެންސީއިން ރިޔާސީ އިންތިހާބުގައި ބައިވެރިވުމަށްކަމަށާއި އަދި އިންތިހާބުގައި އެންމެ ގިނައިން މަންދޫބުންވެސް ނަގާފައިވަނީ ޕީއެންސީއިންކަމަށް ނޫސްތަކުގެ ހެޑްލައިންތަކުންވެސް ފާހަގަކުރެއްވިފައިވާކަމަށް މާރިޔާ ވިދާޅުވިއެވެ.
ދަަންނަވަން މިއުޅެނީ، ޕީޕީއެމްގެ ކުލަވެސް ކަރުދާސްކޮޅުގައި ނެތޭ. އެ އިންތިހާބު ނިމިގެންދާއިރު، ޕީޕީއެމް، މި ރާއްޖޭގެ މި ކަރުދާސްކޮޅުން ފޮހެލިހެން، ފޮހެވިގެންދާނޭ.
މާރިޔާ އަހުމަދު ދީދީ
ރިޔާސީ އިންތިޚާބަށް ޕީއެންސީން ޑރ. މުޢިއްޒު ނެރެން އިދިކޮޅުން ނިންމީ ރައީސް ޔާމީނަށް އިންތިޚާބުގައި ވާދަނުކުރެވޭ ހާލަތެއްގައި ބެކްއަޕް ކެންޑިޑޭޓެއްގެ ގޮތުގައެވެ. އެއަށްފަހު، އެމަނިކުފާނަށް އިންތިޚާބުގައި ވާދަނުކުރެވޭނެކަން އިލެކްޝަންސް ކޮމިޝަނުން ނިންމައި އެ ނިންމުމަށް ސްޕްރީމް ކޯޓުން ތާއީދު ކުރުމުން، މުޢިއްޒުގެ ކެންޑިޑެސީ ފޯމު ހުށަހަޅައި އިދިކޮޅު ކެންޑިޑޭޓެއްގެ ގޮތުގައި މުޢިއްޒު ނެރުނީއެވެ.
Advertisement
This content is created and paid for by advertisers and does not involve Voice Journalists
